ទីក្រុងប៉េកាំង ៖ លោកស្រី Zhou Qunfei សហគ្រិនស្ត្រីដ៏ឆ្នើមមួយរូប និងជាមហាសេដ្ឋីនីជនជាតិចិន ដែលជាស្ថាបនិក និងអគ្គនាយិកាក្រុមហ៊ុនផលិតគ្រឿងបន្លាស់កញ្ចក់ និងបច្ចេកវិទ្យាដ៏ធំមួយរបស់ចិន…
ទីក្រុងប៉េកាំង ៖ លោកស្រី Zhou Qunfei សហគ្រិនស្ត្រីដ៏ឆ្នើមមួយរូប និងជាមហាសេដ្ឋីនីជនជាតិចិន ដែលជាស្ថាបនិក និងអគ្គនាយិកាក្រុមហ៊ុនផលិតគ្រឿងបន្លាស់កញ្ចក់ និងបច្ចេកវិទ្យាដ៏ធំមួយរបស់ចិន «Lens Technology»។
កាលពីថ្មីៗនេះ លោកស្រីបានទាក់ទាញការចាប់អារម្មណ៍យ៉ាងខ្លាំងលើប្រព័ន្ធផ្សព្វផ្សាយពិភពលោក បន្ទាប់ពីត្រូវបានរៀបចំឱ្យអង្គុយនៅចន្លោះកណ្តាលរវាងនាយកប្រតិបត្តិក្រុមហ៊ុន Apple លោក Tim Cook និងនាយកប្រតិបត្តិក្រុមហ៊ុន Tesla លោក Elon Musk នៅក្នុងកម្មវិធីលៀងសាយភោជន៍ ដែលរៀបចំដោយប្រធានាធិបតីចិន លោក ស៊ី ជីងពីង (Xi Jinping) នៅក្នុងរដ្ឋធានីប៉េកាំង ដើម្បីទទួលស្វាគមន៍ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។ ហេតុនេះហើយ ទើបបានជាសាធារណជន ដែលមិនធ្លាប់ស្គាល់លោកស្រីងឿងឆ្ងល់ និងចោទសួរថា តើស្ត្រីរូបនេះជានរណា?
កើតនៅឆ្នាំ ១៩៧០ នៅក្នុងគ្រួសារក្រីក្រមួយក្នុងភូមិដាច់ស្រយាលមួយនៃខេត្តហ៊ូណាន (Hunan) លោកស្រី Zhou Qunfei បានសម្រេចបោះបង់ការសិក្សាត្រឹមអាយុ ១៥ ឆ្នាំ ដើម្បីផ្លាស់ទីលំនៅទៅកាន់ទីក្រុងសេនជិន (Shenzhen) ខេត្តក្វាងតុង (Guangdong) ហើយធ្វើការជាកម្មការិនីរោងចក្រ។
នៅឆ្នាំ ១៩៩៣ ក្នុងវ័យ ២៣ ឆ្នាំ លោកស្រីបានប្រមូលប្រាក់សន្សំ និងបបួលសាច់ញាតិមួយចំនួន បង្កើតអាជីវកម្មខ្នាតតូចក្នុងអគារលំនៅដ្ឋានមួយក្នុងស្រុកបាវអាន (Bao’an) នៃទីក្រុងសេនជិន ដោយផ្តោតលើការបោះពុម្ពឡូហ្គោ ម៉ាកសញ្ញា លេខសំគាល់ជាដើម នៅលើកញ្ចក់នាឡិកា។ លុះមួយទសវត្សរ៍ក្រោយមក ក្រុមហ៊ុន Lens Technology ត្រូវបានបង្កើតឡើងជាផ្លូវការ។
ក្រុមហ៊ុនរបស់លោកស្រីបានបោះជំហានទៅមុខយ៉ាងស្វាហាប់ក្នុងឆ្នាំ ២០០៧ បន្ទាប់ពីសម្រេចបានកិច្ចសន្យាចូលទៅក្នុងខ្សែសង្វាក់ផ្គត់ផ្គង់របស់ក្រុមហ៊ុនអាមេរិក Apple នៅក្នុងនាមជាក្រុមហ៊ុនផ្គត់ផ្គង់កញ្ចក់ការពារអេក្រង់ទូរស័ព្ទ iPhone ជំនាន់ដំបូង។ លុះនៅពេល iPhone ពង្រីកខ្លួនល្បីរន្ទឺទូទាំងពិភពលោក ក្រុមហ៊ុន Apple បានក្លាយជាអតិថិជនធំបំផុតរបស់ក្រុមហ៊ុន Lens ដោយបានរួមចំណែករហូតដល់ទៅជាងពាក់កណ្តាលនៃចំណូលប្រចាំឆ្នាំសរុបរបស់ខ្លួន នៅដើមទសវត្សរ៍ឆ្នាំ ២០១០។
ក្រុមហ៊ុន Lens ត្រូវបានចុះបញ្ជីជាផ្លូវការនៅលើសន្ទស្សន៍ ChiNext នៃផ្សារភាគហ៊ុន Shenzhen ក្នុងខែមីនា ឆ្នាំ ២០១៥ ដែលបានធ្វើឱ្យលោកស្រី Zhou ក្លាយជាស្ត្រីមានបំផុតម្នាក់នៅក្នុងប្រទេសចិន តាមរយៈការកសាងមុខរបរដោយខ្លួនឯង ឬកើតចេញពីបាតដៃទទេ។ ក្រៅពីនេះ ក្រុមហ៊ុនក៏បានឈានជើងចូលផ្សារភាគហ៊ុនទីក្រុងហុងកុងក្នុងឆ្នាំ ២០២៥ ផងដែរ។ គិតត្រឹមពាក់កណ្តាលខែឧសភា ឆ្នាំ ២០២៦ ក្រុមហ៊ុន Lens Technology ដែលបានចុះបញ្ជីផ្សារភាគហ៊ុន Shenzhen មានតម្លៃទីផ្សារប៉ាន់ស្មានប្រហែល ១៨៣,៣ ពាន់លានយន់ ឬប្រហែល ២៧ ពាន់លានដុល្លារអាមេរិក។
ការរៀបចំកន្លែងអង្គុយសម្រាប់លោកស្រី Zhou នៅចំកណ្តាលរវាងលោក Elon Musk និងលោក Tim Cook ត្រូវបានអ្នកវិភាគមើលឃើញថា មិនមែនជារឿងចៃដន្យនោះទេ។ ប៉ុន្តែដោយសារលោកស្រី គឺជាដៃគូផលិតកម្មដ៏សំខាន់បំផុតមួយរបស់ក្រុមហ៊ុន Apple លើផ្នែកកញ្ចក់អេក្រង់ ហើយក្រុមហ៊ុន Lens ទៀតសោត ក៏មានទំនាក់ទំនងផ្គត់ផ្គង់កាន់តែស៊ីជម្រៅជាមួយគ្រឿងបន្លាស់រថយន្តអគ្គិសនីរបស់ក្រុមហ៊ុន Tesla ផងដែរ។ បើតាមរបាយការណ៍មួយចំនួនបង្ហាញថា Lens គឺជាអ្នកផ្គត់ផ្គង់គ្រឿងបន្លាស់កញ្ចក់អេក្រង់ និងបច្ចេកវិទ្យាអុបទិកសម្រាប់មុខងារចក្ខុវិស័យម៉ាស៊ីន ឬ Vision Systems សម្រាប់មនុស្សយន្ត Optimus របស់ក្រុមហ៊ុន Tesla។
ម្យ៉ាងវិញទៀត រដ្ឋាភិបាលចិនក៏ចង់បង្ហាញពិភពលោកនូវគំរូជោគជ័យនៃខ្សែសង្វាក់ផលិតកម្មកម្រិតខ្ពស់របស់ខ្លួន តាមរយៈសហគ្រិនស្ត្រីដែលតស៊ូចេញពីបាតដៃទទេរូបនេះផងដែរ៕ ប្រភព ៖ South China Morning Post
ចែករំលែកព័តមាននេះ