ទីបំផុត! លោក គឹម ប្រុស ប្រធានសាខា ក.ប.ប បាត់ដំបង ត្រូវបានដកតំណែង និងលុបឈ្មោះចេញពីក្របខ័ណ្ឌមន្ត្រីរាជការហើយ
បាត់ដំបង ៖ ទីបំផុត ! សម្រេចបញ្ចប់តំណែង និងលុបឈ្មោះ លោក គឹម ប្រុស ប្រធានសាខា…
បាត់ដំបង ៖ ទីបំផុត ! សម្រេចបញ្ចប់តំណែង និងលុបឈ្មោះ លោក គឹម ប្រុស ប្រធានសាខា ក.ប.ប. ខេត្តបាត់ដំបង ចេញពីក្របខ័ណ្ឌមន្ត្រីរាជការ ។ នេះបើយោងតាមលិខិតរបស់ក្រសួងពាណិជ្ជកម្ម ដែលបានប្រកាសនាថ្ងៃទី១៤ ខែឧសភានេះ ។
ក្នុងសេចក្តីសម្រេចដែលមានហត្ថលេខាដោយ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានបញ្ជាក់ក្នុងប្រការ១ ថា ៖ ត្រូវបានបញ្ចប់មុខតំណែង និងលុបឈ្មោះចេញពីក្របខ័ណ្ឌមន្ត្រីរាជការ លោក គឹម ប្រុស អត្តលេខ ១៧៣០៥០០០២០ ពីប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តបាត់ដំបង នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ។
សូមរំលឹកថា ៖ លោក គឹម ប្រុស បានបង្កឱ្យមានការភ្ញាក់ផ្អើល និងផ្ទុះប្រតិកម្មយ៉ាងខ្លាំងនៅលើបណ្ដាញសង្គម បន្ទាប់ពីលោកបានអះអាងថា ទុរេនដែលដាក់លក់នៅផ្សារភូពុយ ខេត្តបាត់ដំបង គឺជាទុរេននាំចូលមកពីខេត្តកំពង់ចាម និង រាជធានីភ្នំពេញ ។
ករណីខាងលើនេះដែរ ដើមចមដែលនាំឱ្យមានវិធានការវិន័យដ៏ក្ដៅគគុកនេះ ត្រូវបានគេមើលឃើញថា ផ្ដើមចេញពីការបំភ្លឺជាសាធារណៈរបស់លោកដែលបានបញ្ជាក់ថា ទុរេននៅផ្សារភូពុយ ខេត្តបាត់ដំបង គឺជាទុរេនដឹកមកពីកំពង់ចាម និងភ្នំពេញ ដែលជាការលើកឡើងផ្ទុយពីការពិត និងខ្វះការត្រួតពិនិត្យឱ្យបានច្បាស់លាស់ ។
ការលើកឡើងនេះ មិនត្រឹមតែរងការចំអកពីមហាជនប៉ុណ្ណោះទេ ប៉ុន្តែត្រូវបានគេចាត់ទុកថា ជាការធ្វេសប្រហែសក្នុងតួនាទីជាមន្ត្រីការពារអ្នកប្រើប្រាស់ ដែលតម្រូវឱ្យមានភាពសុក្រឹតបំផុតក្នុងការផ្ដល់ព័ត៌មានដល់សាធារណជន៕
ចែករំលែកព័តមាននេះ