ម្ចាស់ចម្ការម្នាក់ថា ដំណាំឈូកមានតម្លៃខ្ពស់ជាងស្រូវ និងមានទីផ្សារល្អ
- ព្រៃវែង
ខេត្តព្រៃវែង ៖ នៅថ្ងៃទី ១៣ ឧសភា ឆ្នាំ២០២៦ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម…
ខេត្តព្រៃវែង ៖ នៅថ្ងៃទី ១៣ ឧសភា ឆ្នាំ២០២៦ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចុះពិនិត្យមើលការងារដាំឈួក របស់កសិករ នៅឃុំកំពង់ឬស្សី ស្រុកពោធិ៍រៀង និងជួបប្រជុំជាមួយនឹងអាជ្ញាធរព្រមទាំងមន្ត្រីជំនាញក្នុងខេត្តព្រៃវែង ដើម្បីរកវិធីសាស្ត្រជួយជំរុញការផលិតក្នុងស្រុក និងពង្រីកសក្តានុពលកសិ-ឧស្សាហកម្ម ដែលធ្វើអោយជីវភាពប្រជាពលរដ្ឋកាន់តែប្រសើ។
ក្នុងពេលចុះពិនិត្យនោះ ឯកឧត្ដមរដ្ឋលេខាធិការ បានណែនាំបន្ថែមដល់កសិករអំពីបច្ចេកទេសដាំដុះ និងការគ្រប់គ្រងទឹក ដើម្បីធានាបាននូវទិន្នផលខ្ពស់ ហើយឯកឧត្តម ក៏បានជួបពិភាក្សាជាមួយកសិករម្ចាស់ចម្ការឈូក និងសហគមន៍ ដើម្បីស្វែងយល់ពីតម្រូវការទីផ្សារ និងបញ្ហាសត្វល្អិតចង្រៃ។
ឯកឧត្ដមរដ្ឋលេខាធិការ បានកោតសរសើរចំពោះកសិករក្នុងស្រុកពោធិ៍រៀង ដែលបានបំប្លែងផ្ទៃដីកសិកម្ម ឱ្យទៅជាតំបន់ដាំដុះឈូកដ៏មានសក្តានុពល។ ឈូកមិនត្រឹមតែជាដំណាំសម្រាប់បរិភោគប៉ុណ្ណោះទេ ប៉ុន្តែវាក៏ជាផ្នែកមួយនៃ ទេសចរណ៍កសិកម្ម ដែលអាចទាក់ទាញភ្ញៀវទេសចរមកកម្សាន្ត និងទិញផលិតផលដោយផ្ទាល់។
បើតាមការលើកឡើងរបស់លោក អៀន អឿន ម្ចាស់ចំការឈូក ដែលរស់នៅភូមិជ្រៃក្រហឹម ឃុំកំពង់ឬស្សី ស្រុកពោធិ៍រៀង បានអោយដឹងថា ដំណាំឈូកមានតម្លៃខ្ពស់ជាងស្រូវ ដោយឈូកស្ងួតមានតម្លៃជាង ៥ ពាន់រៀលក្នុងមួយគីឡូក្រាម ហើយរយៈពេល ៣ខែ គឺឈូកអាចប្រមូលផលបាន។ ហើយការប្រមូលផលនេះទៀតសោត គឺមានរយៈពេលរហូតដល់ទៅ ២ខែ ទើបអស់។ ហើយលោកក៏បានបន្ថែមទៀតថា ក្នុងមួយហិចតា ផាត់ការចំណាយទៅលើប្រេងនិងឈ្នួលរួច អាចនៅសល់ពី ៣លាន ទៅ ៤ លានរៀល ទៅតាមតម្លៃឈូកឡើងចុះនៃទីផ្សារ៕
ចែករំលែកព័តមាននេះ