ខេត្តស្ទឹងត្រែង៖អ្នកនាំពាក្យសាលាដំបូងខេត្តស្ទឹងត្រែង បានចេញសេចក្តីប្រកាសព័ត៌មានស្តីពីការចាត់វិធានការច្បាប់យ៉ាងតឹងរ៉ឹង លើសំណុំរឿងឆបោកតាមប្រព័ន្ធបច្ចេកវិទ្យា (Online Scam) និងការនាំចូលទំនិញគេចពន្ធ ដែលបានប្រព្រឹត្តទៅក្នុងភូមិសាស្ត្រខេត្តស្ទឹងត្រែង។ យោងតាមសេចក្តីថ្លែងការណ៍កាលពីថ្ងៃទី១៣ ខែឧសភា ឆ្នាំ២០២៦…
ខេត្តស្ទឹងត្រែង៖អ្នកនាំពាក្យសាលាដំបូងខេត្តស្ទឹងត្រែង បានចេញសេចក្តីប្រកាសព័ត៌មានស្តីពីការចាត់វិធានការច្បាប់យ៉ាងតឹងរ៉ឹង លើសំណុំរឿងឆបោកតាមប្រព័ន្ធបច្ចេកវិទ្យា (Online Scam) និងការនាំចូលទំនិញគេចពន្ធ ដែលបានប្រព្រឹត្តទៅក្នុងភូមិសាស្ត្រខេត្តស្ទឹងត្រែង។
យោងតាមសេចក្តីថ្លែងការណ៍កាលពីថ្ងៃទី១៣ ខែឧសភា ឆ្នាំ២០២៦ ចៅក្រមស៊ើបសួរបានសម្រេចឃុំ
ខ្លួនបណ្តោះអាសន្នលើជនត្រូវចោទជាជនជាតិខ្មែរចំនួន ៤នាក់ រួមមានឈ្មោះ ចាន់ ប៊ុនអែម, ប៊ុនថន ភក្តី, ចាន់ លីណា និង តេង គឹមហុង។ ចំណែកជនសង្ស័យផ្សេងទៀត រួមមានបុរសជនជាតិចិនម្នាក់ និងស្ត្រីជនជាតិខ្មែរឈ្មោះ SOONG ព្រមទាំងបក្ខពួកមួយចំនួនទៀត កំពុងស្ថិតក្នុងដំណាក់កាលគេចខ្លួននៅឡើយ។ជនត្រូវចោទទាំងអស់ ត្រូវបានចោទប្រកាន់ពីបទល្មើសសំខាន់ៗចំនួន ២៖១.បទឆបោកតាមប្រព័ន្ធបច្ចេកវិទ្យា (Online Scams)២. សមគំនិតក្នុងអំពើឆបោក និងការលួចនាំចេញ-ចូលទំនិញគេចពន្ធ។
សូមបញ្ជាក់ថាកាលពីថ្ងៃទី៩ ខែឧសភា ឆ្នាំ២០២៦ កម្លាំងចម្រុះរួមមាន មន្ត្រីគយ និងរដ្ឋាករ កងរាជអាវុធហត្ថ និងនគរបាលខេត្ត ក្រោមការដឹកនាំសម្របសម្រួលនីតិវិធីពីតំណាងអយ្យការអមសាលាដំបូងខេត្តស្ទឹងត្រែង បានចុះបង្ក្រាបទីតាំងក្រុម ហ៊ុនស្ទឹងត្រែងសេកុង អឹមផត អិចផត ឯ.ក ស្ថិតនៅភូមិរាជានុកូល សង្កាត់-ក្រុង-ខេត្តស្ទឹងត្រែង ដោយបានដកហូតវត្ថុ តាងរួមមាន បារីចិនចម្រុះម៉ាកជាច្រើនប៊ិច ស្រាចម្រុះម៉ាកជាច្រើនកេស កុំព្យូទ័រយួរដៃប្រើរួច ម៉ាក DELL ចំនួន១២គ្រឿង ទូរស័ព្ទដៃប្រើរួច ម៉ាក Iphone ចំនួន៦៧៥គ្រឿង Wifi Router ប្រើរួចម៉ាក ASUS ចំនួន១២គ្រឿង Key Bourd ប្រើរួច ម៉ាក AOC ចំនួន២២០គ្រឿង កុំព្យូទ័រប្រើរួចALL IN ONE ម៉ាក CX&KL ចំនួន៦៨គ្រឿង CPUម៉ាកWJCOOLMAN ចំនួន២ គ្រឿង ទូរស័ព្ទថ្មី ម៉ាកHMD ចំនួន៦៣គ្រឿង IPAD ចំនួន២៥គ្រឿង សម្ភារៈប្រើប្រាស់ និងម្សៅដីចំនួន១០កេស និងឃាត់ ខ្លួនជនជាតិខ្មែរចំនួន៤ (បួន) នាក់ ដែលមានអត្តសញ្ញាណដូចខាងលើ ដែលបទល្មើសនេះប្រព្រឹត្តតាំងពីអំឡុងឆ្នាំ២០១៧ រហូតដល់ថ្ងៃទី ៩ ខែឧសភា ឆ្នាំ២០២៦។
បច្ចុប្បន្ន ជនត្រូវចោទខាងលើដែលនៅក្នុងឃុំ និងបន្តស្រាវជ្រាវតាមចាប់ខ្លួនបក្ខពួកដែលកំពុងគេចខ្លួន ដើម្បីយកមកផ្តន្ទាទោសតាមច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ក្រមព្រហ្មទណ្ឌ និងច្បាប់ស្តីពីគយ។
បើតាមអ្នកប្រកបអាជីវកម្មដឹកអ្នកដំណើរក្ន៧ងក្រុងស្ទឹងត្រែងនិយាយថា ក្រុមហ៊ុនស្ទឹងត្រែងសេកុង អឹមផត អិចផត ឯ.ក ដែលមានអាសយដ្ឋានស្ថិតនៅភូមិរាជានុកូល សង្កាត់-ក្រុង-ខេត្តស្ទឹងត្រែង ជាក្រុមហ៊ុន ដឹកជញ្ជូនភ្ញៀវនិងទំនិញចេញ-ចូលឡាវ-កម្ពុជា៕
ចែករំលែកព័តមាននេះ