រាជធានីភ្នំពេញ ៖ កម្លាំងនគរបាលប៉ុស្តិ៍ចោមចៅទី១ បានធ្វើការស្រាវជ្រាវរហូតឈានដល់ការឃាត់ខ្លួនក្រុមជនសង្ស័យជំនាញខាងគាស់ផ្ទះនានាលួចទ្រព្យសម្បត្តិ បានចំនួន៦នាក់ ដែលក្រុមនេះ ធ្លាប់ធ្វើសកម្មភាពបានសម្រេចជាបន្តបន្ទាប់ចំនួន៦លើក រួចមកហើយ។ ដោយឡែកលើកចុងក្រោយ គេចខ្លួនបានត្រឹមតែរយៈពេល៤ថ្ងៃប៉ុណ្ណោះ ក៏អស់លក្ខណ៍ ហើយនគរបាលបានកសាងសំណុំរឿងចោទប្រកាន់ក្រុមនេះពីបទរក្សាទុក និងប្រើប្រាស់គ្រឿងញៀន ព្រមទាំងលាក់ទុកអាវុធ(ដាវ)ផងដែរ ។
ការឃាត់ខ្លួននោះបានធ្វើឡើងកាលពីវេលាម៉ោង៣និង១០នាទីរសៀលថ្ងៃទី៣០ ខែមិថុនា ឆ្នាំ២០២៦ នៅចំណុចដីឡូត៌មួយកន្លែង ជិតវត្តអង្គតាមិញ ស្ថិតនៅក្នុងភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យទាំងនោះ សុទ្ធតែមានសារធាតុញៀនទាំងអស់ ក្នុងនោះរួមមាន ៖
១.ឈ្មោះ វ័ន្ត វុឌ្ឍិន ភេទប្រុស អាយុ៣៣ឆ្នាំ ស្នាក់នៅសង្កាត់បឹងទំពុនទី២ ខណ្ឌមានជ័យ។
២.ឈ្មោះវី បូរ៉ា ភេទប្រុស អាយុ២២ឆ្នាំ ស្នាក់នៅបន្ទប់ជួល ភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ។
៣.ឈ្មោះ ម៉ន ម៉េងហុង ភេទប្រុស អាយុ២៨ឆ្នាំ មុខរបរកម្មកររោងចក្រ ស្នាក់នៅបន្ទប់ជួល ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ។
៤.ឈ្មោះ ប្រុស ស្រីអូន ភេទស្រី អាយុ១៧ឆ្នាំ ស្នាក់នៅបន្ទប់ជួល ភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ។
៥.ឈ្មោះ ស្រី ពេជ្រភេទស្រី អាយុ២៦ឆ្នាំ
និង៦.ឈ្មោះ សន ហេង ភេទប្រុស អាយុ២២ឆ្នាំ ។ ទាំង២នាក់ខាងក្រោមនេះ ស្នាក់នៅមិនពិតប្រាកដ ។
នគរបាល ក៏ដកហូតបានម៉ូតូ ១គ្រឿង ម៉ាក Honda SCOOPY ពណ៌ខ្មៅ ពាក់ស្លាកលេខ ភ្នំពេញ 1CC-2252 , ដាវដែកកែច្នៃដងឈើ ១ដើម, កាំបិតប៉័ងតោងចំនួន២ដើម, កូនសោម៉ូតូចំនួន៣, ក្បាលមួលវីសចំនួន២, ទូរសព្ទ ១គ្រឿងម៉ាក OPPO A15 និងក្រាមសថ្លាចំនួន១ក្រាម ថង់តូច ។
នគរបាល បានប្រាប់ឲ្យដឹងថា ក្រុមជនសង្ស័យធ្លាប់បានធ្វើសកម្មភាពគាស់ផ្ទះ លួចទ្រព្យសម្បត្តិបានសម្រេចចំនួន៦លើក រួចមកហើយ ចំណែកលើកចុងក្រោយ ថ្ងៃទី២៥ ខែមិថុនា ឆ្នាំ២០២៦ វេលាម៉ោងជាង១១យប់ គាស់ផ្ទះមួយកន្លែង ដែលម្ចាស់មិននៅ ស្ថិតនៅក្នុងភូមិត្រពាំងថ្លឹង២ សង្កាត់ចោមចៅទី១ ខណ្ឌពោធិ៍សែនជ័យ។ ពេលនោះ លួចយកបានទ្រព្យមួយចំនួន រួចគេចខ្លួនបាត់ លុះដល់វេលាម៉ោង១១យប់ថ្ងៃទី២៦ បានទៅធ្វើសកម្មភាពលួចនៅក្នុងផ្ទះដដែលនោះម្ដងទៀត បន្ទាប់មកក៏បានគេចខ្លួនបាត់អស់ទៀត ប៉ុន្តែលើកនេះត្រូវបានប្រជាពលរដ្ឋឃើញ ក៏រាយការប្រាប់នគរបាលប៉ុស្តិ៍ចោមចៅទី១ ឲ្យជួយអន្តរាគមន៍ ។
នគរបាល បានប្រាប់ឲ្យដឹងបន្ថែមទៀតថា ក្រោយពេលទទួលបានដំណឹងនេះ កម្លាំងនគរបាលប៉ុស្តិ៍ខាងលើ ក៏បានចុះធ្វើការស្រាវជ្រាវរហូតដល់ការឃាត់ខ្លួនបានទាំងសម្បុក នាវេលាម៉ោង៣ និង១០នាទីរសៀលថ្ងៃទី៣០ ខែមិថុនា បន្ទាប់មកនាំទៅសាកសួរនៅប៉ុស្តិ៍ចោមចៅទី១ ដើម្បីកសាងសំណុំរឿងចាត់ការតាមច្បាប់ ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ