រាជធានីភ្នំពេញ ៖ ប្រជាពលរដ្ឋ ស្នើសុំឲ្យបើកច្រកប្រឡាយសាធារណៈ ខណៈភាគីរោងចក្រ នៅខណ្ឌពោធិ៍សែនជ័យ តវ៉ាថា ការសង់របងថ្មលើប្រឡាយនេះ ដើម្បីរក្សាសន្តិសុខ ។
ប្រជាពលរដ្ឋរស់នៅក្នុងភូមិក្រាំង សង្កាត់ត្រពាំងក្រសាំង ខណ្ឌពោធិ៍សែនជ័យ បានបង្ហាញការមិនពេញចិត្ត និងស្នើសុំឱ្យមានការបើកច្រកផ្លូវ នៅលើខ្នងប្រឡាយសាធារណៈមួយកន្លែង ដែលបច្ចុប្បន្ន ត្រូវបានបិទជិតដោយរបងឯកជនរបស់រោងចក្រ និងផែស្ងួត។ ករណីនេះបានបង្កឱ្យមានការជជែកដេញដោលគ្នាយ៉ាងខ្លាំង រវាងផលប្រយោជន៍សាធារណៈ និងសន្តិសុខរបស់ក្រុមហ៊ុនវិនិយោគ ។
តាមប្រភពព័ត៌មានពីប្រជាពលរដ្ឋ បានឱ្យដឹងថា ប្រឡាយទឹកនេះ មានប្រវែងជិត ៤០០ម៉ែត្រ និងទទឹងប្រហែល ៩ម៉ែត្រ ដោយបច្ចុប្បន្នត្រូវបានរៀបចំដាក់លូបេតុងខ្នាតធំ (ទទឹង ៥ ម៉ែត្រ និងកម្ពស់ ២,៥ម៉ែត្រ) ក្នុងគោលបំណងបញ្ចៀសទឹកភ្លៀង និងកាត់បន្ថយការលិចលង់ក្នុងរដូវវស្សា។ ទីតាំងនេះ ជាចំណុចតភ្ជាប់ពីលូធំក្រោមផ្លូវល្បឿនលឿន មកទល់នឹងប្រឡាយកាត់ទទឹងជាប់ផ្លូវឆេកូ (ផ្លូវបង្គោលឡានអគ្គិសនីធំៗ) ។
ប្រជាពលរដ្ឋ បានលើកឡើងថា ប្រឡាយ និងខ្នងលូនេះ ជាសម្បត្តិរដ្ឋរួម។ បច្ចុប្បន្ន ដោយសារតែមានរបងបិទជិត ធ្វើឱ្យពួកគាត់ត្រូវបង្ខំចិត្តដើរវាង និងលោតផ្លោះប្រឡាយនៅផ្នែកខាងក្រៅរបងឆ្ពោះទៅរកគោលដៅ ទាំងប្រថុយប្រថាន និងលំបាកលំបិន។ ប្រសិនបើច្រកនេះ ត្រូវបានបើក និងជួសជុលខ្នងប្រឡាយឱ្យបានត្រឹមត្រូវ វានឹងក្លាយជាផ្លូវដោះស្រាយមួយយ៉ាងសំខាន់សម្រាប់អ្នកភូមិធ្វើដំណើរថ្មើរជើង ជិះយានយន្តតូចៗ ឬដឹកសត្វចិញ្ចឹមបានយ៉ាងងាយស្រួល ។
ឆ្លើយតបនឹងការលើកឡើងនេះ បុរសម្នាក់ដែលអះអាងខ្លួនជាតំណាងភាគីរបងរោងចក្រ និងផែស្ងួត បានបំភ្លឺប្រាប់ប្រព័ន្ធផ្សព្វផ្សាយថា ដើមឡើយប្រឡាយនេះ មិនស្ថិតនៅទីតាំងនេះទេ។ របងរបស់រោងចក្រ គឺមានស្រាប់តាំងពីមុនមកម្ល៉េះ ប៉ុន្តែក្រោយមក ទើបអាជ្ញាធរបានដោះស្រាយគោលនយោបាយរៀបចំប្រព័ន្ធបង្ហូរទឹក ទើបពង្រីកប្រឡាយមកដល់ចំណុចរបងនេះ ។
តំណាងរូបនោះ បានសង្កត់ធ្ងន់លើកត្តាសន្តិសុខថា ៖ «បើសិនជាឥឡូវ ទៅបើកចំហ ហើយគេចូលមកលួចអីវ៉ាន់ខាងខ្ញុំនេះអស់ ចង់និយាយអ៊ីចឹងណា.. ព្រោះរោងចក្រយើងនៅជាប់នឹងប្រឡាយ។ បើបើក ដើម្បីប្រជាពលរដ្ឋម្នាក់ ឬពីរនាក់ តែធ្វើឱ្យបាត់បង់ទ្រព្យសម្បត្តិអ្នកវិនិយោគរាប់ម៉ឺននាក់ នៅក្នុងហ្នឹង វាមិនចំណេញទេ» ។
ទោះជាយ៉ាងណាក៏ដោយ ភាគីរោងចក្រ បានបង្ហាញជំហរច្បាស់លាស់ថា ពួកគាត់មិនមានចេតនារឹងរូសជាមួយអាជ្ញាធរឡើយ។ ប្រសិនបើរដ្ឋបាលខណ្ឌ មានគម្រោងអភិវឌ្ឍន៍ធ្វើជាផ្លូវសាធារណៈនៅលើខ្នងលូ ដែលពួកគាត់បានសាងសង់នោះ ភាគីរោងចក្រ នឹងឯកភាពសហការវាយរបងនេះចេញភ្លាមៗ ដោយគ្មានការតវ៉ាឡើយ។ ប៉ុន្តែក្នុងដំណាក់កាលចំពោះមុខ ដែលរដ្ឋមិនទាន់មានគម្រោងធ្វើផ្លូវ ពួកគាត់សុំរក្សារបងនេះសិន ដើម្បីការពារចោរកម្ម ។
ជុំវិញករណីវិវាទដ៏រ៉ាំរ៉ៃនេះ សាធារណជន និងប្រជាពលរដ្ឋ កំពុងរង់ចាំមើលចំណាត់ការជាផ្លូវការពីសំណាក់អាជ្ញាធរ។ ទោះជាយ៉ាងណា លោក ប៉ា លីដា អភិបាលរងខណ្ឌពោធិ៍សែនជ័យ ដែលទទួលបានរហស្សនាមថា «ញញួរដែក» ជុំវិញការចុះអនុវត្តច្បាប់រៀបចំសណ្តាប់ធ្នាប់ មិនទាន់មានការបញ្ជាក់ ឬផ្តល់ចម្លើយណាមួយ ជុំវិញវិធានការលើករណីបិទច្រកប្រឡាយនេះ នៅឡើយទេ ។
ព័ត៌មានបន្ថែមជុំវិញករណីនេះ នឹងមានការផ្សាយជូនជាបន្តបន្ទាប់ទៀត ប្រសិនបើមានការបកស្រាយផ្លូវការណាមួយពីអាជ្ញាធរពាក់ព័ន្ធ៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ