ខេត្តបន្ទាយមានជ័យ ៖ រដ្ឋបាលក្រុងប៉ោយប៉ែត កាលពីថ្ងៃទី១៣ ខែឧសភា ឆ្នាំ២០២៦កន្លងទៅ បានចេញសេចក្ដីជូនដំណឹងស្ដីពីការចាត់វិធានការនានាចំពោះម្ចាស់អាជីវកម្មជាច្រើនដែលមិនទាន់មានច្បាប់ ហើយមានដាក់ផ្លាកសញ្ញាអក្សរបរទេសធំជាងអក្សរខ្មែរ និងទូទាត់ជាប្រាក់បាតមិនយកប្រាក់រៀល ។…
ខេត្តបន្ទាយមានជ័យ ៖ រដ្ឋបាលក្រុងប៉ោយប៉ែត កាលពីថ្ងៃទី១៣ ខែឧសភា ឆ្នាំ២០២៦កន្លងទៅ បានចេញសេចក្ដីជូនដំណឹងស្ដីពីការចាត់វិធានការនានាចំពោះម្ចាស់អាជីវកម្មជាច្រើនដែលមិនទាន់មានច្បាប់ ហើយមានដាក់ផ្លាកសញ្ញាអក្សរបរទេសធំជាងអក្សរខ្មែរ និងទូទាត់ជាប្រាក់បាតមិនយកប្រាក់រៀល ។
សេចក្តីជូនដំណឹងស្តីពីការរៀបចំសណ្តាប់ធ្នាប់ និងការអនុវត្តច្បាប់នៅតាមទីតាំងអាជីវកម្មគ្រប់ប្រភេទនៅក្រុងប៉ោយប៉ែត បានជម្រាបជូនដល់ម្ចាស់អាជីវកម្ម សណ្ឋាគារ ផ្ទះសំណាក់ បន្ទប់ជួល ផ្ទះមានបន្ទប់ជួល ភោជនីយដ្ឋាន ម៉ាស្សា ខារ៉ាអូខេ ស្នូកឃ័រ ការលើកផ្លាកយីហោ ក្នុងវិស័យសុខាភិបាល វិស័យអប់រំ និងលក់ដូរគ្រប់ប្រភេទ ។
កន្លងមកនេះ រដ្ឋបាលក្រុងសង្កេតឃើញថាអាជីវកម្មជាច្រើនបានដំណើរការដោយគ្មានច្បាប់អនុញ្ញាត ការដាក់តាំងលក់លើដងផ្លូវសាធារណៈ ការដាក់ផ្លាកយីហោ ផ្ទាំងផ្សព្វ ផ្សាយពា ណិជ្ជកម្មខុសអក្ខរាវិរុទ្ធ អក្សរបរទេសធំជាងអក្សរខ្មែរដែលជាអក្សរជាតិ ឬលើអក្សរខ្មែរការដាក់តម្លៃឬទូទាត់ជាប្រាក់បាតមិនយកប្រាក់រៀលជាដើម ដែលទាំងអស់នេះធ្វើឱ្យខូចខាតប៉ះពាល់ដល់សណ្តាប់ធ្នាប់សាធារណៈ សោភ័ណភាពទីក្រុង និងប៉ះពាល់ដល់តម្លៃជាតិធ្ងន់ធ្ងរ ។
រដ្ឋបាលក្រុងប៉ោយប៉ែតបានណែនាំដល់ម្ចាស់អាជីវកម្មខាងលើដូចខាងក្រោម ៖
១-គ្រប់អាជីវកម្មដែលពុំទាន់មានច្បាប់អនុញ្ញាត ត្រូវមកធ្វើទំនាក់ទំនងស្នើសុំច្បាប់អនុញ្ញាតឱ្យបានត្រឹមត្រូវ ។
២-ការដាក់ទីតាំងទំនិញ ផ្លាកយីហោ ផ្ទាំងផ្សព្វផ្សាយពាណិជ្ជកម្មផ្សេងៗ ត្រូវនៅលើដីកម្ម
សិទ្ធិរបស់ខ្លួន ហាមដាច់ខាតលក់ឬដាក់លើដីចំណីផ្លូវសាធារណៈ ។
៣-គ្រប់ផ្លាកយីហោផ្ទាំងផ្សព្វផ្សាយពាណិជ្ជកម្ម និមិត្តសញ្ញាផ្សេងៗ ត្រូវប្រើជាភាសាខ្មែរតាមពាក្យពេចន៍អក្ខរាវិរុទ្ធនៃវចនានុក្រមសម្តេចព្រះមហាសុមេធាធិបតីជោតញ្ញាណោ ជួន ណាត បោះពុម្ពនាឆ្នាំ១៩៦៧-១៩៦៨ជាមូលដ្ឋាន ប្រសិនបើមានភាសាបរទេសត្រូវនៅក្រោមអក្សរខ្មែរ ហើយមានទំហំតូចជាងអក្សរខ្មែរពាក់កណ្តាល(៥០%)ជាដាច់ខាត ។
៤-រាល់ការដាក់តម្លៃក្នុងបញ្ជីមុខទំនិញ និងទូទាត់ប្រាក់ត្រូវគិតជាប្រាក់រៀលជាមូលដ្ឋាន ។
៥-ត្រូវវេចខ្ចប់ទុកដាក់ និងភ្ជាប់សេវាសំរាមជាមួយក្រុមហ៊ុនឱ្យបានត្រឹមត្រូវ ។
អាជ្ញាធរក្រុងប៉ោយប៉ែត បានតម្រូវឱ្យម្ចាស់អាជីវកម្មទាំងអស់ ត្រូវអនុវត្តតាមខ្លឹមសារខាងលើឱ្យបានឆាប់បំផុត ។ ក្នុងករណីមិនទាន់អនុវត្តតាមសេចក្តីជូនដំណឹងនេះ រដ្ឋបាលក្រុងនឹងចាត់តាំងក្រុមការងារចម្រុះចុះត្រួតពិនិត្យ និងរុះរើផ្លាកអាជីវកម្មភ្លាមៗ ដោយមិនទទួលខុសត្រូវចំពោះការខូចខាតឡើយ ៕
ចែករំលែកព័តមាននេះ