ដូចឱ្យប្រផ្នូល! ប្តីនិយាយប្រាប់ប៉ុន្មានម៉ាត់ រួចសុំប្រពន្ធជក់បារី១ដើម ស្រាប់តែប្រទះឃើញស្លា.ប់នៅវាលស្រែ
- ព្រះវិហារ
ខេត្តព្រះវិហារ ៖ បុរសម្នាក់បានជួបគ្រោះអកុសលដោយការជក់បារីរហូតដល់បាត់បង់ជីវិត ខណៈសុំប្រពន្ធជក់បារី១ដើមសម្រាប់ដង្ហើមចុងក្រោយ នៅវាលស្រែភ្នំកន្ធាយ ភូមិស្រយង់ជើង ឃុំស្រយង់ ស្រុកគូលែន ។ បុរសរូបនេះឈ្មោះ ម៉ូត ប៉យ អាយុ៥៦ឆ្នាំ ជាកសិករ រស់នៅភូមិស្នាផ្អែក ឃុំស្រយង់ ស្រុកគូលែន ។
ទាក់ទិននឹងការស្លាប់របស់បុរសខាងលើដោយសារជក់បារីនេះ ត្រូវបានភរិយាគាត់និយាយរៀបរាប់ឲ្យដឹងថា នៅរសៀលថ្ងៃទី១៣
ខែមិថុនា ឆ្នាំ២០២៦ ប្ដីគាត់បានប្រាប់ថា ឈឺក្បាល ឈឺដើមទ្រូង វិលវល់គិតអីមិនចេញ ។
ពេលនោះ គាត់បានប្រាប់ទៅវិញថា មកពីជក់បារីច្រើនពេក បណ្តាលឲ្យប៉ះពាល់ដល់សុខភាព តែប្ដីគាត់ក៏សុំជក់បារី១ដើម ហើយនិយាយថា ស្លាប់ក៏ស្លាប់ចុះ ធ្វើម្តេចបើអត់មិនបាន ។
ភរិយាជនរងគ្រោះរៀបរាប់ទៀតថា បន្ទាប់ពីប្តីជក់បារី១ដើម ពួកគាត់ក៏នាំគ្នាចុះទៅដកស្រូវពង្រោះ និងជួសបន្ថែមចន្លោះកន្លែងដែលគ្មានស្រូវដុះ ។ ក្រោយពីដកស្រូវបានមួយចំនួន ប្តីគាត់បានយកទៅស្ទូងមុន ចំណែកគាត់នៅដកបន្ថែម ដែលនៅចម្ងាយពីគ្នាប្រហែល៥០ម៉ែត្រ ។
លុះប្រហែល១ម៉ោងក្រោយមក អត់ឃើញប្តីគាត់មកយកស្រូវទៅស្ទូងបន្តទៀតទេ គាត់ក៏គិតភ្លាមថា ប្រហែលប្តីទៅមើលមងដាក់យកត្រីនៅមាត់ព្រែក ។
មួយសន្ទុះក្រោយមក គាត់បានងេីបពីជួសស្រូវ ហើយក្រឡេកមើលទៅវាលស្រែ ស្រាប់តែឃើញជើងប្តីសណ្តូកក្នុងទឹក ក្បាលនៅលើ
គោក ។ លុះគាត់ដើរទៅមើល ស្រាប់តែឃើញប្តីដេកផ្ងារមិននិយាយស្តី គាត់ខំរឺតច្របាច់ និងស្រែកហៅប្អូនស្រីដែលមានស្រែនៅក្បែរគ្នានោះ ឲ្យមកជួយ ប៉ុន្តែជាអកុសល ប្តីគាត់បានស្លាប់បាត់ទៅហើយ ។
ក្រោយកើតហេតុ នគរបាលគ្រប់ជំនាញ បានទៅពិនិត្យ និងធ្វើកោសល្យវិច័យសព ហើយសន្និដ្ឋានថា ជនរងគ្រោះស្លាប់ដោយសារការដាច់សរសៃឈាមក្នុងខួរក្បាល ។
សពត្រូវបាននគរបាលស្រុកគូលែន ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ