រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានឱ្យដឹងថា សម្តេចបានជួបលោកបណ្ឌិត ញិល រដ្ឋា ដែលជាបញ្ញវន្ត ខាងវិភាគស្ថានការណ៍ទូទៅនៅកម្ពុជា កាលពីថ្ងៃ២០ ខែកក្កដា ឆ្នាំ២០២៦ ដើម្បីពិភាក្សាតែទៅលើផ្នែកសេដ្ឋកិច្ច តែប៉ុណ្ណោះ មិនបានសម្ដៅទៅលើអ្វី ដែលលោកបណ្ឌិត បានបញ្ចេញមតិនៅក្នុងវេទិការបស់រាជបណ្ឌិត្យសភា កាលពីពេលថ្មីៗនេះ នោះទេ ។
ការទម្លាយនូវការជួបជាមួយលោកបណ្ឌិត ញិល រដ្ឋា របស់សម្តេចធិបតី នាយករដ្ឋមន្ត្រី បែបនេះ ក្នុងគ្រាដែលលោកបណ្ឌិត កំពុងផ្ទុះការចាប់អារម្មណ៍ ពីសំណាក់ពលរដ្ឋខ្មែរ នៅពេលដែលលោកបណ្ឌិត បានវិភាគលើបញ្ហាព្រំដែនកម្ពុជា-ថៃ ដែលរៀបចំឡើងដោយរាជបណ្ឌិត្យសភា កាលពីពេលថ្មីៗមកនេះ ។
ក្នុងឱកាសអញ្ជើញ ប្រគល់សញ្ញាបត្រជូនដល់និស្សិត សាកលវិទ្យាល័យ សៅស៍អ៊ីសថ៍អេយសៀ នៅខេត្តសៀមរាប នាព្រឹកថ្ងៃទី២១ ខែកក្កដា ឆ្នាំ២០២៦ សម្តេចធិបតី នាយករដ្ឋមន្ត្រីកម្ពុជា បានលើកឡើងជាច្រើនចំពោះបុគ្គលមួយចំនួនតាំងខ្លួនជាអ្នកវិភាគ ដែលអ្នកខ្លះកំពុងរស់នៅក្រៅប្រទេស និងបានរិះគន់រាជរដ្ឋាភិបាល ព្រមទាំងបានតាំងខ្លួនដឹងគ្រប់រឿង រួមទាំងករណីបញ្ហាព្រំដែន កម្ពុជា-ថៃ ផងដែរ ។
សម្តេចធិបតី នាយករដ្ឋមន្ត្រី បានលើកឡើងថា នៅពេលសម្តេច ជួបជាមួយលោកបណ្ឌិត ញ៉ិល រដ្ឋា សម្តេចក៏បានផ្តោតលើអត្ថបទមួយ ដែលសម្តេចបានបង្ហាញក្នុងហ្វេសប៊ុក កាលពីប៉ុន្មានថ្ងៃមុនអំពីបណ្ឌិត និងអ្នកចែវទូក ដែលអ្នកខ្លះបានទាញភ្ជាប់ខ្លឹមសារនេះជាមួយលោកបណ្ឌិត ញិល រដ្ឋា ។ ប៉ុន្តែចំពោះការទាញភ្ជាប់នេះ គឺសម្តេចមិនបានផ្តោតទៅលើរឿងបណ្ឌិត និងអ្នកចែវទូក ឬក៏វិភាគព្រំដែនដែរ ។
ចំពោះការបញ្ចេញមតិរិះគន់ផង និងលើកទឹកចិត្តដល់បណ្ឌិត ញិល រដ្ឋា នោះត្រូវបានសម្តេចមានប្រសាសន៍អះអាងថា ការជួបលោកបណ្ឌិតនោះ មិនមែនផោ្តតទៅលើអត្ថន័យរបស់លោកបណ្ឌិត ទាក់ទងទៅនឹងជម្លោះព្រំដែនកម្ពុជា-ថៃ ឬបណ្ឌិតចែវ ទូកនោះទេ ប៉ុន្តែអ្វីដែលសម្តេចចាប់អារម្មណ៍ គឺបណ្ឌិត ញិល រដ្ឋា បានវិភាគទៅវិស័យសហគ្រាសធុនតូច និងមធ្យម (SMEs) និង SDI ប៉ុណ្ណោះ ព្រោះសម្តេចចង់ដឹងពីបញ្ហាប្រឈមអ្វីខ្លះ ដើម្បីរកដំណោះស្រាយរវាងវិស័យរដ្ឋ និងឯកជន ដោយសារមានភាពប្រទាក់ក្រឡាជាមួយ SMEs ។
សម្តេចធិបតី នាយករដ្ឋមន្ត្រី ក៏បញ្ជាក់យ៉ាងដូច្នេះថា ៖ “អីចឹងជជែកគ្នារឿងហ្នឹងហើយ ក៏ទៅដល់ក៏សួររឿងហ្នឹង (វិភាគពាក់ព័ន្ធព្រំដែន) តាមពិតយើងជជែករឿងនោះ ហើយខ្ញុំសួរថា ថាឯងដឹងទេថាបងហៅមកមានរឿងអី គាត់ថា ខ្ញុំមកប្រហែលតែជារឿងហ្នុងហើយ ដល់ចឹង ខ្ញុំអត់បានត្រៀមសំណួរបងឯងរឿង SMEs និង SDI ។ ខ្ញុំក៏បានសួររឿងហ្នឹងថា (ព្រំដែន) គាត់មិនបានថា គាត់វិភាគខុស ឬត្រូវនោះទេ ជារឿងរបស់គាត់ ខ្ញុំបានសួរគាត់ថា ក្នុងនាមជាអ្នកសិក្សាដូចគ្នាប្អូនឯងផ្អែកទៅលើសូចនាករអ្វី” ។
ចំពោះវិភាគពាក់ព័ន្ធព្រំដែនសម្តេចធិបតីនាយករដ្ឋមន្ត្រី ក៏បានស្នើឱ្យបញ្ចប់ នូវការវែកញែកលើបណ្តាញសង្គមទៅ ព្រោះគាត់វិភាគផ្អែកទៅលើទិន្នន័យវិទ្យាសា ស្ត្ររបស់គាត់ ដែលបានស្រាវជ្រាវរកឃើញ និងសូចនាករដោយមិនបានទៅបំផុសបំផុលចលនាអ្វីនោះទេ។
សម្តេចធិបតី ក៏បានលើកឡើងថានៅក្នុងជំនួបលោកបណ្ឌិត មិនបានតបតជាមួយអ្នករិះគន់ចំពោះអ្វីដែលលោកបណ្ឌិតលើកឡើងនោះទេ ៕
ចែករំលែកព័តមាននេះ