ខេត្តកំពង់ចាម ៖ អនុវត្តតាមចរាចរណ៍ណែនាំរបស់ក្រសួងកសិកម្ម រុក្ខាប្រមាញ់ និងនេសាទ ស្តីពីច្បាប់ជលផល និងបទបញ្ជាដ៏ម៉ឺងម៉ាត់របស់លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈបញ្ជាការឯកភាពខេត្ត នៅថ្ងៃទី១៦ ខែមិថុនា ឆ្នាំ២០២៦ ខណ្ឌរដ្ឋបាលជលផលកំពង់ចាម សហការជាមួយអធិការដ្ឋានរដ្ឋបាលជលផលមេគង្គ អាជ្ញាធរស្រុក ព្រៃឈរ កងរាជអាវុធហត្ថស្រុកព្រៃឈរ និងសហគមន៍នេសាទសាមគ្គី ឃុំមៀន ដោយមានការសម្របសម្រួលពីព្រះរាជអាជ្ញា នៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្ក្រាបបទល្មើសជលផល នារដូវបិទនេសាទ ចំនួន ០២ករណី ដោយរុះរើ និងបំផ្លាញចោលនូវឧបករណ៍ខុសច្បាប់រួមមាន ៖
ករណីទី០១ ៖
-ឧបករណ៍លូស្បៃមុងចំនួន៥មាត់
-របាំងស្បៃមុងប្រវែង ១៨០ម៉ែត្រ
-បង្គោលចំនួន ៧៥ដើម
-ចាក់លែងកូនត្រីចម្រុះទម្ងន់ ០១គីឡូក្រាម
នៅចំណុចរលំពោធិ៍ ឃុំមៀន ស្រុកព្រៃឈរ ខេត្តកំពង់ចាម។
ករណីទី០២ ៖
-រុះរើសម្រាស់ទំហំ ២ម៉ែត្រ គុណ ៣ម៉ែត្រ ចំនួន៣កន្លែង នៅចំណុចបាំងដៃ ឃុំមៀន ស្រុកព្រៃឈរ ខេត្តកំពង់ចាម។
បន្ទាប់មក ខណ្ឌរដ្ឋបាលជលផលកំពង់ចាម បានចុះល្បាតតាមដងទន្លេមេគង្គភូមិសាស្ត្រពីក្រុងកំពង់ចាម រហូត ដល់ស្រុកកោះសូទិន និងស្រុកស្រីសន្ធរ ខេត្តកំពង់ចាម ដោយប្រើប្រាស់កាណូត និងមន្ត្រីចំនួន ០៥នាក់ ដោយពុំបានជួបបទល្មើស នេសាទឡើយ ។
ក្នុងនោះ ខណ្ឌរដ្ឋបាលជលផលកំពង់ចាម ក៏មានទិសដៅបន្ត ក្នុងការចុះត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តាលស្រុកនានាក្នុងខេត្តកំពង់ចាម និងផ្សព្វផ្សាយដល់ប្រជានេសាទឱ្យឈប់ដោយប្រើប្រាស់ឧបករណ៍ល្មើសច្បាប់៕
ចែករំលែកព័តមាននេះ