រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ឱ្យដឹងថា រាជរដ្ឋាភិបាល នឹងសាងសង់ស្តូបមួយ ដើម្បីរំលឹកដល់វីរកងទ័ព…
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ឱ្យដឹងថា រាជរដ្ឋាភិបាល នឹងសាងសង់ស្តូបមួយ ដើម្បីរំលឹកដល់វីរកងទ័ព ដែលបានពលីក្នុងបុព្វហេតុការពារ ដែនអធិបតេយ្យភាពពីសំណាក់ថៃ កន្លងមកនេះ ។
ថ្លែងក្នុងកម្មវិធីអបអរសាទរខួប លើកទី១៩ ទិវាអតីតយុទ្ធជន និងនិវត្តជនកម្ពុជា នៅថ្ងៃទី១៥ ខែឧសភា ឆ្នាំ២០២៦ សម្តេចធិបតី ហ៊ុន ម៉ាណែត បានឱ្យដូច្នេះថា ៖ «បន្ទាប់ពីឯកឧត្តម ទៀ សី ហា ឱ្យឯកឧត្តម ណឹម សុវត្ថិ សិក្សារៀបចំ ហើយខ្ញុំបានគាំទ្រគំនិតនេះ ដោយឲ្យគិតគូររៀបចំស្តូប ដើម្បីរំលឹកទៅដល់វីរកងទ័ព វីរយុជន វីរនគបាលជាតិ វីរអាវុហត្ថ ដែលបានពលីក្នុងបុព្វហេតុការពារធិបតេយ្យភាពជាតិរបស់យើង» ។
សម្តេចធិបតី ក៏បានលើកឡើងថា កន្លងមក យើងមានវិមានឈ្នះ-ឈ្នះ រួចហើយ ដើម្បីរំលឹកពីដល់វីរកងទ័ព វីរយុជន វីរនគបាលបាន ពោលគឺកងកម្លាំងប្រដាប់អាវុធ គ្រប់ភាគីទាំងអស់ ដែលបានចូលរួមឆ្លងកាត់ការលំបាកទាំងពីការវៃគ្នាចប់ឆ្នាំ១៩៩៨ ហើយក្រោយឆ្នាំ១៩៩៨ នេះ គឺ សង្គ្រាមការពារទឹក ដូច្នេះយើងនឹងរៀបចំស្តូបមួយ ប៉ុន្តែមិនទាន់ដឹងទីតាំងណាច្បាស់នោះទេ មកដល់ពេលនេះ ។
យ៉ាងណាក្តី សម្តេចធិបតី បានសង្កត់ធ្ងន់ថា ៖ «យើងធ្វើស្តូបនេះ ដើម្បីរំលឹកជាប្រចាំ សម្រាប់កូនចៅជំនាន់ក្រោយ បានដឹងពីការលះបង់ដ៏ធំធេង របស់បងប្អូនទាំងក្នុងបុព្វហេតុការពារអធិបតេយ្យជាតិរបស់យើងនេះ គឺត្រូវគិតគូរបន្តទៀត» ។
ជាមួយគ្នានោះដែរ សម្តេចធិបតី ក៏បានស្នើឲ្យគណៈរដ្ឋមន្ត្រី ធ្វើការគិតគូររៀបចំមេដាយសម្រាប់ផ្តល់ជូនដល់កងទ័ព នៅពេលចូលប្រយុទ្ធការពារទឹកដី ដោយផ្ទាល់ ។
សម្តេចបានបញ្ជាក់ថា ៖ «ពិតណាស់យើងមានមេដាយការពារជាតិ ប៉ុន្តែមេដាយសម្រាប់សមរភូមិមួយៗ ត្រូវទាមទារឲ្យមាន ដើម្បីឱ្យដឹង ហើយក៏មានមេដាយពិសេស សម្រាប់ពិការក្នុងសមរភូមិដែរ ដើម្បីជាការលើកទឹកចិត្ត» ៕
ចែករំលែកព័តមាននេះ