ខេត្តកំពង់ស្ពឺ៖ ភាពមិនប្រក្រតីនៅស្ថានីយជញ្ជីងថ្លឹងរថយន្តលើផ្លូវជាតិលេខ ៤ ស្ថិតក្នុងសង្កាត់កណ្ដោលដុំ ក្រុងច្បារមន ខេត្តកំពង់ស្ពឺ កំពុងក្លាយជាចំណុចក្ដៅ ខណៈមានការទម្លាយចេញនូវព័ត៌មានចោទប្រកាន់ថា លោកប្រធានស្ថានីយ និងមន្ត្រី…
ខេត្តកំពង់ស្ពឺ៖ ភាពមិនប្រក្រតីនៅស្ថានីយជញ្ជីងថ្លឹងរថយន្តលើផ្លូវជាតិលេខ ៤ ស្ថិតក្នុងសង្កាត់កណ្ដោលដុំ ក្រុងច្បារមន ខេត្តកំពង់ស្ពឺ កំពុងក្លាយជាចំណុចក្ដៅ ខណៈមានការទម្លាយចេញនូវព័ត៌មានចោទប្រកាន់ថា លោកប្រធានស្ថានីយ និងមន្ត្រី កំពុងប្រើប្រាស់តួនាទីដើម្បីប្រមូលប្រាក់ ដោយមិនញញើតច្បាប់ទម្លាប់ឡើយ ធុំក្លិនមិនស្រួលយូរហើយ…ហេ! ហេ! ។
យោងតាមប្រភពពីមន្ត្រីរាជការមួយចំនួន នៅក្នុងមន្ទីរសាធារណការ និងដឹកជញ្ជូនខេត្តកំពង់ស្ពឺ បានបង្ហើបឱ្យដឹងថា ប្រធានស្ថានីយជញ្ជីងថ្លឹងរថយន្តខាងលើ បានប្រើមន្ត្រី និង ហ៊ានធ្វើអ្វីៗតាមអំពើចិត្ត និងប្រមូលលុយកាក់ខុសបច្ចេកទេសបែបនេះ គឺសង្ស័យថាមានការបើកដៃ ឬឃុបឃិតគ្នាពីសំណាក់ថ្នាក់ដឹកនាំមន្ទីរសាធារណការ និងដឹកជញ្ជូនខេត្តផងដែរ។
ប្រភពដដែលបានបន្តថា រាល់រថយន្តដឹកទំនិញធុនធ្ងន់ដែលឆ្លងកាត់ទីនោះ ជៀសមិនផុតក្នុងការបង់លុយ ដែលជាទង្វើផ្ទុយពីគោលការណ៍ណែនាំរបស់រាជ រដ្ឋាភិបាល ក្នុងការសម្រួលដល់ការដឹកជញ្ជូន និងការទប់ស្កាត់អំពើពុករលួយ។
មន្ត្រីរាជការ និងសាធារណជន បានសំណូមពរយ៉ាងទទូចទៅកាន់ រដ្ឋមន្ត្រីក្រសួងសាធារណការ និងដឹក ជញ្ជូន មេត្តាជួយពិនិត្យ និងដាក់មន្ត្រីអធិការកិច្ច ចុះស៊ើបអង្កេតជាបន្ទាន់ជុំវិញករណី «ក្លិនមិនស្រួល» នៅស្ថានីយថ្លឹងរថយន្តក្នុងសង្កាត់កណ្ដោលដុំនេះផង។មហាជនសង្ឃឹមថា ថ្នាក់ដឹកនាំក្រសួងនឹងមិនបណ្ដែតបណ្ដោឱ្យបុគ្គលដែលប្រើប្រាស់អំណាចខុសគោលដៅ បំផ្លាញកេរ្តិ៍ឈ្មោះស្ថាប័ន និងប៉ះពាល់ដល់សេដ្ឋកិច្ចជាតិបែបនេះឡើយ។
ជុំវិញការចោទប្រកាន់ខាងលើនេះអ្នកសារព័ត៌មានមិនទាន់អាចសុំការបំភ្លឺពី ប្រធានស្ថានីយជញ្ជីង បាននោះទេ។
ពាក់ព័ន្ធនឹងការលើកឡើងខាងលើនេះអ្នកយកព័ត៌មានយើងបានទូរស័ព្ទទៅលោកជីញ គួង ប្រធានមន្ទីរសាធារណការនិងដឹកជញ្ជូនខេត្តកំពង់ស្ពឺ ដើម្បីសួរនាំ ខលចូលមានអ្នកចុចជាប់រវល់ និងមិនមានការឆ្លើយតបនោះទេ។ កាលពីពេលកន្លងទៅ លោក ជិញ គួង ប្រធានមន្ទីរសាធារណការនិងដឹកជញ្ជូនខេត្តកំពង់ស្ពឺធ្លាប់ឆ្លើយតបជាមួយក្រុមអ្នកសារព័ត៌មានថា លោកមិនមានពាក្យអ្វីបកស្រាយជាមួយអ្នកសារព័ត៌មាននោះទេ រៀងរាល់ថ្ងៃលោកធ្វើការងាររាយការណ៍តែទៅឯកឧត្តមរដ្ឋមន្ត្រីក្រសួងសាធារណការនិងដឹកជញ្ជូនគ្រប់គ្រាន់ហើយ។
កន្លងទៅលោក ជាម ច័ន្ទសោភ័ណ អភិបាលខេត្តកំពង់ស្ពឺធ្លាប់លើកឡើងហើយថាប្រសិនបើ មន្ត្រីរាជការ តាមបណ្តាស្រុក-ក្រុង ឬតាមមន្ទីរជំនាញអង្គភាពណាមិនយកចិត្តទុកដាក់ក្នុងការធ្វើការងារ សូមធ្វើលិខិតលាឈប់មិនខ្វះទេអ្នកធ្វើការជំនួសនោះ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ