សុខភាព៖ យោងតាមការចុះផ្សាយពីប្រភពបរទេស ក្នុងអំឡុងពេលដែលអាកាសធាតុប្រែប្រួលញាប់ រាងកាយអាចចុះខ្សោយ បង្កឱ្យមានអាការៈផ្ដាសាយ តឹងច្រមុះ និងឈឺកដែលរំខានដល់ការរស់នៅ។ ក្រៅពីការប្រើប្រាស់ថ្នាំពេទ្យ អ្នកអាចសាកល្បងប្រើប្រាស់រូបមន្តបែបធម្មជាតិសាមញ្ញៗ ដែលចំណាយតិច និងមានសុវត្ថិភាពខ្ពស់ក្នុងការបំបាត់អាការៈឈឺកយ៉ាងឆាប់រហ័ស។

រូបមន្តដំបូងដែលងាយបំផុតគឺ “ទឹកក្ដៅឧណ្ហៗលាយអំបិល” ដោយប្រើទឹកមួយពែងលាយអំបិល ១/៤ ស្លាបព្រាកាហ្វេ យកមកខ្ពុរមាត់ឱ្យដល់បំពង់ក រួចខ្ជាក់ចោល ដើម្បីជួយសម្លាប់បាក់តេរី និងកាត់បន្ថយការឈឺចាប់។ ប្រសិនបើមានអាការៈឈឺកខ្លាំង អ្នកគួរប្រើ “ទឹកឃ្មុំ លាយក្រូចឆ្មារ និងទឹកខ្ញី” ដែលទឹកឃ្មុំជួយសម្លាប់មេរោគ ចំណែកក្រូចឆ្មារនិងខ្ញីជួយឱ្យបំពង់កមានសំណើម បាត់រមាស់ និងស្រឡះកល្អ។

សម្រាប់អ្នកដែលចូលចិត្តភាពក្ដៅហឹរ “ម្សៅម្ទេសលាយទឹកក្ដៅ” អាចប្រើជាថ្នាំបញ្ចុះការរលាកបំពង់កបានយ៉ាងពូកែ ចំណែក “ផ្កាក្លាំពូកិនម៉ដ្ឋ” លាយទឹកក្ដៅ ក៏មានសារធាតុប្រឆាំងបាក់តេរី និងកាត់បន្ថយការរលាកបានយ៉ាងប្រសើរ។ រូបមន្តមួយទៀតគឺ “ម្សៅរមៀត លាយអំបិល និងទឹកក្ដៅ” ដែលរមៀតដើរតួជាសារធាតុប្រឆាំងអុកស៊ីតកម្មដ៏ពូកែ ជួយទប់ស្កាត់ការរីករាលដាលនៃមេរោគក្នុងបំពង់ក។

ចំពោះអ្នកដែលមានអាការៈក្អករួមផ្សំជាមួយ “ទឹកខ្មេះប៉ោម​លាយអំបិល និងទឹកក្ដៅ” នឹងជួយកម្ចាត់មេរោគក្នុងកបានយ៉ាងលឿន។ ក្រៅពីនេះ ការញ៉ាំ “ទឹកតែបៃតងក្ដៅៗ” ឬ “តែរ៉ាសបឺរី​” ក៏ជាជម្រើសដ៏ល្អ ព្រោះកម្ដៅទឹកជួយរំលាយស្លេស្ម ចំណែកសារធាតុក្នុងតែជួយកាត់បន្ថយការឆ្លងមេរោគ និងផ្ដល់នូវក្លិនក្រអូបជួយឱ្យស្មារតីស្រស់ថ្លា។

ជារួមមក ការប្រើប្រាស់ឱសថធម្មជាតិទាំង ៨ មុខនេះ គឺជាជម្រើសដ៏ឆ្លាតវៃក្នុងការថែរក្សាសុខភាពបំពង់កដោយមិនចាំបាច់ពឹងផ្អែកលើថ្នាំពេទ្យតែមួយមុខ។ ទោះជាយ៉ាងណា ប្រសិនបើអាការៈមិនធូរស្រាលក្នុងរយៈពេលយូរ អ្នកគួរតែទៅពិគ្រោះជាមួយគ្រូពេទ្យជំនាញដើម្បីពិនិត្យឱ្យបានច្បាស់លាស់៕