រាជធានីភ្នំពេញ ៖ រថយន្តលាយបេតុង១គ្រឿង ខណៈពេលកំពុងបើកបរសុខៗ ស្រាប់តែឆ្លងចរន្តបង្កជាអណ្ដាតភ្លើងឆាបឆេះសន្ធោសន្ធៅ និងបានបង្កឲ្យមានការភ្ញាក់ផ្អើលដល់ប្រជាពលរដ្ឋជួយពន្លត់ ។ ប៉ុន្តែពន្លត់អត់ឈ្នះឡើយ រហូតដល់សមត្ថកិច្ច ហៅរថយន្តពន្លត់អគ្គិភ័យទៅជួយបាញ់ទឹកពន្លត់អស់២រថយន្ត…
រាជធានីភ្នំពេញ ៖ រថយន្តលាយបេតុង១គ្រឿង ខណៈពេលកំពុងបើកបរសុខៗ ស្រាប់តែឆ្លងចរន្តបង្កជាអណ្ដាតភ្លើងឆាបឆេះសន្ធោសន្ធៅ និងបានបង្កឲ្យមានការភ្ញាក់ផ្អើលដល់ប្រជាពលរដ្ឋជួយពន្លត់ ។ ប៉ុន្តែពន្លត់អត់ឈ្នះឡើយ រហូតដល់សមត្ថកិច្ច ហៅរថយន្តពន្លត់អគ្គិភ័យទៅជួយបាញ់ទឹកពន្លត់អស់២រថយន្ត ទើបភ្លើងរលត់ទៅវិញទាំងស្រុង ប៉ុន្តែរថយន្តនោះបានរងការខូចខាតទាំងស្រុងបាត់ទៅហើយដែរ ។
ហេតុការណ៍នោះបានកើតឡើងកាលពីវេលាម៉ោង៦និង៤០នាទីយប់ថ្ងៃទី១ ខែមេសា ឆ្នាំ២០២៦ នៅលើមហាវិថីស៊ី ជីនពីង ស្ថិតនៅក្នុងភូមិតាំងរនាម សង្កាត់ប្រទះឡាង ខណ្ឌកំបូល រាជធានីភ្នំពេញ ។
រថយន្តខាងលើនោះ មិនត្រូវបានគេស្គាល់ម៉ាកនោះទេ គ្រាន់តែដឹងថា ជារថយន្តលាយបេតុង របស់ក្រុមហ៊ុនមួយ ស្ថិតនៅម្ដុំភូមិព្រះធាតុ សង្កាត់រលួស ខណ្ឌដង្កោ និងបើកបរដោយបុរសម្នាក់ឈ្មោះ ផាន សុខហេង អាយុ៣៦ឆ្នាំ ស្នាក់នៅក្នុងក្រុមហ៊ុនខាងលើ ។
សាក្សីនៅកន្លែងកើតហេតុ បាននិយាយថា នៅវេលាម៉ោងខាងលើរថយន្ត ១គ្រឿងនោះ បានដឹកបេតុងចេញពីក្រុមហ៊ុន យកទៅចាក់នៅការដ្ឋានសំណង់មួយកន្លែង ស្ថិតនៅម្ដុំផ្សារបែកចាន ឃុំបែកចាន ស្រុកអង្គស្នួល ខេត្តកណ្ដាល ។ ខណៈពេលកំពុងបើកបរធ្វើដំណើរ ក្នុងទិសដៅពីត្បូងទៅជើងសុខៗ ក៏ស្រាប់តែឆ្លងចរន្តបង្កជាអណ្ដាតភ្លើងឆាបឆេះនៅក្រោមកាប៊ីនរថយន្ត ពេលនោះបុរស ដែលជាអ្នកបើកបរមិនបានដឹងនោះទេ ហើយត្រូវបានអ្នកដំណើរតាមផ្លូវឃើញ ក៏ជិះម៉ូតូដេញតាមស្រែកប្រាប់ទើបដឹង ។
សាក្សីដដែល បានប្រាប់ឲ្យដឹងបន្តទៀតថា បន្ទាប់មកបុរសអ្នកបើកបររូបនោះ ក៏បានឈប់រថយន្ត រួចចុះរត់ទៅដងទឹកពាងផ្ទះអ្នកភូមិ ទៅជះពន្លត់ ចំណែកឯអ្នកភូមិក៏បានយកបំពង់ពន្លត់អគ្គិភ័យទៅជួយបាញ់ពន្លត់ដែរ ប៉ុន្តែពន្លត់អត់ឈ្នះឡើយ ភ្លើងឆេះកាន់តែខ្លាំងឡើងៗ ។ ពេលនោះ បានបង្កឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ចមូលដ្ឋានចេញអន្តរាគមន៍ ហៅរថយន្តពន្លត់អគ្គិភ័យទៅជួយបាញ់ទឹកពន្លត់អស់ទឹក ២រថយន្ត ទើបភ្លើងរលត់ទៅវិញទាំងស្រុង ប៉ុន្តែរថយន្តនោះ ក៏ឆេះរងការខូចខាតទាំងស្រុងផងដែរ ៕
ចែករំលែកព័តមាននេះ