ខេត្តបាត់ដំបង ៖ លំនៅឋានប្រជាពលរដ្ឋមួយខ្នង ពុំមាននៅសេសសល់អ្វីទេ ក្រៅពីគ្រោងឆ្អឹង និងផេះ ដោយសារអគ្គិភ័យប្រឹងត្របាក់លេបត្រឹមរយៈពេលមួយដង្ហើមចង្រិតប៉ុណ្ណោះ នៅវេលាម៉ោង២រសៀលថ្ងៃទី០១ មីនា ស្ថិតនៅចំណុចភូមិកាប់គោថ្មី…
ខេត្តបាត់ដំបង ៖ លំនៅឋានប្រជាពលរដ្ឋមួយខ្នង ពុំមាននៅសេសសល់អ្វីទេ ក្រៅពីគ្រោងឆ្អឹង និងផេះ ដោយសារអគ្គិភ័យប្រឹងត្របាក់លេបត្រឹមរយៈពេលមួយដង្ហើមចង្រិតប៉ុណ្ណោះ នៅវេលាម៉ោង២រសៀលថ្ងៃទី០១ មីនា ស្ថិតនៅចំណុចភូមិកាប់គោថ្មី សង្កាត់អូរចា ក្រុងបាត់ដំបង បើទោះជារថយន្តពន្លត់អគ្គិភ័យបានចេញប្រសេកប្រសាចជួយអន្តរាគមន៍យ៉ាងឆាប់រហ័សក្ដី ។
មន្ត្រីជំនាញបានរាយការណ៍ពីព្រឹត្តការណ៍នេះថា អគ្គិភ័យនោះបានប្រឹងត្របាក់លេបយកលំនៅឋាននោះត្រឹមមួយប៉ព្រិចភ្នែកប៉ុណ្ណោះអស់រលីងតែម្ដង ។ លំនៅឋាននេះ ធ្វើអំពីឈើជញ្ជាំងនិងដំបូលបាំងស័ង្កសី មានទំហំ ៥ម៉x៦ម៉ ដែលមានម្ចាស់ឈ្មោះ នាក់ ភន ភេទស្រី អាយុ៥៤ឆ្នាំ ។
បើតាមការស្រង់សម្ដីពីម្ចាស់ផ្ទះដែលបានប្រាប់សមត្ថកិច្ចនៅកន្លែងកើតហេតុថា អគ្គិភ័យដ៏មហន្តរាយនេះ បានផ្ដើមចេញពីការទុស្សេខ្សែចរន្តចរន្តអគ្គិសនី ។ ហើយបានឆាបឆេះរាលដាលពាសពេញក្នុងផ្ទះតែម្ដង ។
អ្នកភូមិក៏បាននិយាយដែរថា ការចាប់ផ្ដើមដំបូង គេឃើញមានផ្សែងបន្តិចបន្តួចប៉ុណ្ណោះ តែប៉ុន្មាននាទីក្រោយ ខណៈដែលអ្នកភូមិចាប់ផ្ដើមផ្អើលជួយអន្តរាគមន៍ពន្លត់ ស្រាប់តែអណ្ដាតភ្លើងហាក់ហក់ឡើងគួរឲ្យខ្លាច ប្រឹងលេបផ្ទះកាន់តែខ្លាំង ស្របពេលនោះរថយន្តពន្លត់អគ្គិភ័យរបស់សមត្ថកិច្ចក៏បានមកដល់ ប៉ុន្តែបានត្រឹមតែជួយបាញ់ទឹកទប់ស្កាត់មិនឆេះឆ្លងរាលដាល ។
ពីព្រោះមិនបានមួយដង្ហើមចង្រិតផង លំនៅឋាននោះត្រូវព្រះអគ្គិឆេះរាបដល់ដីល្មម សូម្បីទ្រព្យសម្បត្តិ ឬសម្ភារប្រើប្រាស់ផ្សេងៗក៏ម្ចាស់ផ្ទះ ឬអ្នកជិតខាងជួយរំដោះមិនបានដែរ ។ យ៉ាងណាក្ដី ភ្លាមៗនោះ គេមិនតាន់ដឹងពីទំហំនៃការខូចខាតនៅឡើយទេ ។
គេគ្រាន់តែដឹងថា លំនៅឋាននេះ ត្រូវភ្លើងឆេះអស់ទាំងស្រុងតែម្ដង ។ ពេលនេះ អាជ្ញាធរ និង មន្ត្រីជំនាញបាននិងកំពុងសួរនាំជនរងគ្រោះម្ចាស់ផ្ទះ ដើម្បីកំណត់ហេតុនៃការខូចខាតទ្រព្យសម្បត្តិ ៕
ចែករំលែកព័តមាននេះ