រាជធានីភ្នំពេញ៖ បុរសជនជាតិចិនម្នាក់សង្ស័យបែកថ្នាំ បានយកដុំថ្ម និងដុំឥដ្ឋគប់ទៅលើកញ្ចក់រថយន្ត១គ្រឿងដែលកំពុងបើកតាមផ្លូវ បណ្ដាលឲ្យបែកខ្ទេច បន្ទាប់មកបានរត់ឡើងទៅឈរលើដំបូលរថយន្តនោះថែមទៀត ។ ក្រោយពេលឃើញបែបនេះមហាជនក៏បាននាំគ្នាឡោមព័ទ្ធ និងយកទុយោទឹកទៅឆ្កឹះកៀសទម្លាក់ពីលើដំបូលរថយន្ត ទើបចាប់ខ្លួនបាន…
រាជធានីភ្នំពេញ៖ បុរសជនជាតិចិនម្នាក់សង្ស័យបែកថ្នាំ បានយកដុំថ្ម និងដុំឥដ្ឋគប់ទៅលើកញ្ចក់រថយន្ត១គ្រឿងដែលកំពុងបើកតាមផ្លូវ បណ្ដាលឲ្យបែកខ្ទេច បន្ទាប់មកបានរត់ឡើងទៅឈរលើដំបូលរថយន្តនោះថែមទៀត ។ ក្រោយពេលឃើញបែបនេះមហាជនក៏បាននាំគ្នាឡោមព័ទ្ធ និងយកទុយោទឹកទៅឆ្កឹះកៀសទម្លាក់ពីលើដំបូលរថយន្ត ទើបចាប់ខ្លួនបាន រួចប្រគល់ឲ្យនគរបាលបញ្ជូនទៅកាន់មន្ទីរពេទ្យ និងប្រគល់ឲ្យស្ថានទូតចិនព្រោះបុរសនោះក៏រងរបួសដែរ ។
ហេតុការណ៍នោះបានកើតឡើងកាលពីវេលាម៉ោងជា២រសៀលថ្ងៃទី១ ខែមេសា ឆ្នាំ២០២៦ នៅតាមផ្លូវលេខ១ ហៅផ្លូវតាកន ស្ថិតនៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បុរសនោះមិនត្រូវបានស្គាល់អត្តសញ្ញាញនោះទេ គ្រាន់តែដឹងថាជាជនជាតិចិន មានអាយុប្រមាណជាង៣០ឆ្នាំ ដែលសង្ស័យថាប្រើប្រាស់ថ្នាំញៀន រហូតដល់កម្រិតបែកថ្នាំលែងដឹងអី ឬអាចមានសតិស្មារតីមិនសូវល្អ ទើបធ្វើរឿងភ្ញសក់ផ្អើលបែបនេះ ។
ប្រជាពលរដ្ឋដែលស្ថិតនៅក្នុងហេតុការណ៍នោះបាននិយាយថា នៅមុនពេលកើតហេតុពួកគាត់បានឃើញបុរសជនជាតិចិនរូបនោះកាន់ដុំថ្មនិងដុំឥដ្ឋឈរនៅតាមផ្លូវលេខ១ ហៅផ្លូវតាកនខាងលើ ។ លុះក្រោយមកមានរថយន្ត១គ្រឿងម៉ាកToyota Yaris Cross ពណ៍ស ពាក់ស្លាកលេខភ្នំពេញ2CB-0345 បកបរដោយបុរសជនជាតិខ្មែរម្នាក់ ធ្វើដំណើរក្នុងទិសដៅពីលិចទៅកើតទៅដល់ ហើយក៏ត្រូវបុរសជនជាតិចិននោះគប់បណ្ដាលឲ្យបែកកញ្ចក់មុខ ។
ប្រភពដដែលបានប្រាប់ឲ្យដឹងបន្តទៀតថា ខណៈនោះបង្កឲ្យមានការភ្ញាក់ផ្អើលខ្លាំងនៅតាមដងផ្លូវខាងលើ ហើយក្រោយមករថយន្តខាងលើក៏ឈប់ ក៏ស្រាប់តែបុរសជនជាតិចិនរូបនោះក៏រត់ឡើងទៅលើដំបូលរថយន្តនោះទៀត ។ ក្រោយពេលឃើញបែបនេះ មហាជនច្រើននាក់បាននាំគ្នាឡោមព័ទ្ធមួយសន្ទុះ និងប្រើទុយោជ័ររុកកៀសឲ្យចុះពីលើដំបូលរថយន្ត ទើបចាប់ជនជាតិចិននោះបានរួចនាំគ្នាវាយទាត់ធាក់ម្នាក់១ដៃ១ជើង បណ្ដាលឲ្យរងរបួស ។
ប្រភពមួយនេះបានបញ្ជាក់ប្រាប់ឲ្យដឹងបន្ថែមទៀតថា ក្រោយមកបាន មហាជនក៏បានរាយការណ៍ប្រាប់នគរបាលប៉ុស្តិ៍ចោមចៅទី៣ឲ្យចុះទៅនាំយកបុរសពេលចាប់ខ្លួនបុរសចិននោះទៅប៉ុស្តិ៍ ។ ប៉ុន្តែដោយសារតែឃើញបុរសនោះរងរបួសដែរ នគរបាលក៏បានហៅរថយន្តមន្ទីរពេទ្យបង្អែកពោធិ៍ចិនតុង ដឹកយកទៅសង្គ្រោះសិន ហើយនិងប្រគល់ជូនស្ថានទូតចិននៅពេលក្រោយ ៕
ចែករំលែកព័តមាននេះ