អភិបាលស្រុករលាប្អៀរ នាំថវិការបស់ឯកឧត្តម លោកជំទាវ ទៅជួយឧបត្ថម្ភការសាងសង់ផ្ទះជូនជនភៀសសឹក១គ្រួសារក្នុងភូមិបាញ់ឆ្គោល
- កំពង់ឆ្នាំង
ខេត្តកំពង់ឆ្នាំង ៖ លោក សេង វិចិត្រ អភិបាលស្រុករលាប្អៀរ អមដំណើរដោយ លោក តាំង ប៊ុនទត…
ខេត្តកំពង់ឆ្នាំង ៖ លោក សេង វិចិត្រ អភិបាលស្រុករលាប្អៀរ អមដំណើរដោយ លោក តាំង ប៊ុនទត និងក្រុមការងារ នៅព្រឹកថ្ងៃទី ១ខែមេសាឆ្នាំ ២០២៦ បាននាំយកថវិកា របស់ឯកឧត្តមលោកជំទាវ ទៅឧបត្ថម្ភ ដល់ការរៀបចំសាងសង់ផ្ទះមួយខ្នង ជូនជនភាសសឹក មួយគ្រួសារដែលកំពុងរស់នៅ ភូមិបាញ់ឆ្គោល ឃុំជ្រៃបាក់ស្រុករលាប្អៀរ ព្រោះតែគ្រួសារគាត់មកស្នាក់នៅក្នុងមូលដ្ឋានគ្មានជម្រកស្នាក់នៅសមរម្យ ។
លោក សំ សំណាង មេភូមិបាញ់ឆ្គោល បានរៀបរាប់ថា គ្រួសារនេះមានប្ដីឈ្មោះ ង៉ែត ភក្តី អាយុ ៣៨ឆ្នាំ មានប្រពន្ធឈ្មោះ ឃិន យ័ន្ត អាយុ៣៦ ឆ្នាំ មានកូន ៦នាក់ រួមទាំងក្នុងផ្ទៃម្នាក់ បានភាសសឹក មកពី ប៉ោយប៉ែត ខេត្តបន្ទាយមានជ័យ មកសុំជ្រកកោនជាមួយប្អូនក្នុងភូមិបាញ់ឆ្គោល ប៉ុន្តែដោយគ្រួសារប្អូនមានជីវភាពលំបាកហើយពុំមានផ្ទះសម្បែងឲ្យជ្រក លោកក៏សុំសំយ៉ាបផ្ទះរបស់ប្រជាពលរដ្ឋ ឱ្យគ្រួសារខាងលើនោះជ្រកមួយរយៈ ។ ដោយមើលឃើញភាពលំបាក ខ្វះខាតទាំងថវិកានិងចម្រករបស់គ្រួសារ ជនភាសសឹកគ្រួសារនោះ ក្នុងនាមលោកជាអាជ្ញាធរមូលដ្ឋាន បានអំពាវនាវដល់សប្បុរសជន ឯកឧត្តម លោកជំទាវ រហូតមានការឧបត្ថម្ភ ជាបន្តបន្ទាប់និងបានរៀបចំ សាងសង់ផ្ទះមួយខ្នងធ្វើអំពីដែកប្រក់និងបាំងជញ្ជាំងស័ង្កសីមានទំហំ ៥ ម៉ែត្រ ជូនគ្រួសារខាងលើនេះលើដីរួមរបស់ភូមិមួយកន្លែង ដែលពេលនេះកំពុងតែសាងសង់បានគ្រោងឆ្អឹងដែក ផ្ទះ នៅខ្វះដំបូលជញ្ជាំង ផ្ទះបាយ បន្ទប់ទឹក និងចាក់សាបខាងក្រោម ។
លោក សេង វិចិត្រ អភិបាលស្រុករលាប្អៀរ បានបញ្ជាក់ថាថវិកាដែលបានយកមកឧបត្ថម្ភក្នុងការសាងសង់ផ្ទះជូនជនភាសសឹកខាងលើបានមកពីការឧបត្ថម្ភរបស់ឯកឧត្តមបណ្ឌិតសភាចារ្យ អ៊ុក រាប៊ុន ទេសរដ្ឋមន្ត្រី ថវិកា ៥០ម៉ឺនរៀល ឯកឧត្តម អ៊ុក ពញា រដ្ឋលេខាធិការ ថវិកា៣០ម៉ឺនរៀល ឯកឧត្តម គឹម វាសនា អនុរដ្ឋលេខាធិការ ថវិកា ២០ម៉ឺនរៀល ឯកឧត្តម លាង សេង អនុរដ្ឋលេខាធិការ ថវិកា ២០ ម៉ឺនរៀល លោក សេង វិចិត្រ អភិបាលស្រុករលាប្អៀរ ថវិកា ២០ ម៉ឺនរៀល អង្គការទស្សនៈពិភពលោកស័ង្កសី ២០សន្លឹក។
លោក តាំង ប៊ុនទត មេឃុំជ្រៃបាក់ រួមនិងក្រុមគ្រួសារជនភាសសឹក បានថ្លែងអំណរគុណយ៉ាងជឿជ្រៅឯកឧត្តម លោកជំទាវ លោកលោកស្រី និងសប្បុរសជនទាំងអស់ដែលបានជួយឧបត្ថម្ភក្នុងការសាងសង់ផ្ទះជូនជនភាសសឹកខាងលើនេះ និងសូមប្រសិទ្ធិពរជ័យសិរីមង្គលដល់ដល់ឯកឧត្តមលោកជំទាវនិងសប្បុរសជនទាំងអស់ជួបប្រទះនិងពុទ្ធពរ ៤ ប្រការកុំបីឃ្លាងឃ្លាតឡើយ ៕
ចែករំលែកព័តមាននេះ