ធ្លាប់តែឃើញញញឹមស្រស់ផ្អើលអស់អ្នកលេងបណ្តាញសង្គម តែពេលនេះស្នាមញញឹមនោះ ក្លាយជាការចងចាំជារៀងរហូត ។ លាហើយផ្កាព្រៃមណ្ឌលគិរី… លាទាំងមិនទាន់បានមើលមុខកូនឱ្យច្បាស់ បន្សល់ទុកត្រឹមសម្រែកយំសោកកណ្តាលព្រៃភ្នំ។
នេះគឺជាទុក្ខសោកដ៏ធំធេង និងជាដំណឹងដ៏រន្ធត់មួយដែលបានអង្រួនចិត្តអ្នកលេងបណ្តាញសង្គមហ្វេសប៊ុក និងអ្នកដែលធ្លាប់ស្រឡាញ់រាប់អានយុវតី យ៉ុង ស្រីនីត ។ ផ្កាព្រៃដ៏ស្រស់ស្អាត ដែលធ្លាប់តែរីកស្គុះស្គាយនៅលើទឹកដីខេត្តមណ្ឌលគិរីរូបនេះ បានសម្រេចចិត្តបិទភ្នែកលាចាកលោកនេះទាំងវ័យក្មេង បន្សល់ទុកត្រឹមរូបភាពអនុស្សាវរីយ៍ និងសម្រែកយំទាមទាររកម្ដាយរបស់កូនតូចដែលទើបនឹងសម្រាល ។
មហាជនប្រាកដជានៅចាំមិនភ្លេចឡើយ កាលពីប៉ុន្មានឆ្នាំមុន ឈ្មោះរបស់ យ៉ុង ស្រីនីត បានផ្ទុះឡើងពេញបណ្តាញសង្គម ក្រោយពីមានការចែកចាយរូបភាពសម្រស់ដ៏ស្រស់ស្អាតបែបធម្មជាតិ និងភាពស្លូតត្រង់របស់នាង ។ ទោះបីជារស់នៅក្នុងគ្រួសារដែលមានជីវភាពខ្វះខាតខ្លាំងយ៉ាងណាក៏ដោយ ក៏ស្នាមញញឹមរបស់នាងបានឆក់យកបេះដូងសប្បុរសជនជាច្រើន រហូតមានក្រុមហ៊ុន និងអ្នកមានចិត្តធម៌ចុះទៅជួយឧបត្ថម្ភ និងហៅនាងទៅថតស្ពតពាណិជ្ជកម្មជាហូរហែ ដែលកាលនោះគ្រប់គ្នាជឿជាក់ថា ជីវិតនាងនឹងមានពន្លឺថ្មី។
ជោគវាសនា ពិតជាមានភាពអយុត្តិធម៌សម្រាប់យុវតីរូបនេះខ្លាំងណាស់ ។ តាមប្រភពព័ត៌មានបានឱ្យដឹងថា ស្រីនីតបានទទួលមរណភាពក្នុងវ័យទើបតែ១៧ឆ្នាំប៉ុណ្ណោះ ដោយសារជំងឺសួត និងជំងឺបេះដូងដែលបានយាយីយ៉ាងទម្ងន់ ។ អ្វីដែលកាន់តែខ្លោចចិត្តលើសពីពាក្យពណ៌នា គឺនាងទើបតែសម្រាលកូនបានរយៈពេលជិត២ខែប៉ុណ្ណោះ។ សេចក្តីស្លាប់បានមកឆក់យកជីវិតនាង ទាំងដែលកូនតូចមិនទាន់ទាំងស្គាល់ក្លិនម្ដាយច្បាស់លាស់ និងមិនទាន់បានទទួលភាពកក់ក្ដៅគ្រប់គ្រាន់ពីអ្នកមានគុណនៅឡើយ ។
មរណភាពរបស់ យ៉ុង ស្រីនីត មិនត្រឹមតែបន្សល់ទុកនូវវិបត្តិផ្លូវចិត្តដល់សាច់ញាតិប៉ុណ្ណោះទេ ប៉ុន្តែថែមទាំងបន្សល់ទុកនូវបន្ទុកដ៏ធ្ងន់ធ្ងរសម្រាប់គ្រួសារ និងកូនតូចដែលកំពុងខ្វះទឹកដោះ ។ ក្នុងស្ថានភាពដ៏ទាល់ច្រក និងខ្វះខាតខ្លាំង គ្រួសារសពពិតជាត្រូវការជំនួយជាចាំបាច់បំផុត មិនថា ជាថវិកាសម្រាប់រៀបចំបុណ្យសពតាមប្រពៃណី ឬជាសម្ភារៈប្រើប្រាស់សម្រាប់ទារកដូចជា ទឹកដោះគោ និងខោទឹកនោម។
អាស្រ័យហេតុនេះ សូមបងប្អូនសប្បុរសជនខ្មែរទាំងក្នុង និងក្រៅប្រទេស មេត្តាឈោងដៃជួយដល់គ្រួសារយុវតី យ៉ុង ស្រីនីត តាមកម្លាំងសទ្ធា ដើម្បីឱ្យវិញ្ញាណក្ខន្ធរបស់នាងបានទៅកាន់សុគតិភពដោយអស់ក្តីបារម្ភពីកូនតូច។
សូមចូលរួមរំលែកទុក្ខយ៉ាងក្រៀមក្រំជាទីបំផុតជាមួយក្រុមគ្រួសារសព ៕
ចែករំលែកព័តមាននេះ