ទីក្រុងតេអេរ៉ង់៖ មេដឹកនាំកំពូលថ្មីរបស់អ៊ីរ៉ង់ លោកម៉ុចតាបា ខាមេនី ប្រកាសនៅថ្ងៃនេះថារដ្ឋាភិបាលរបស់លោកនឹងបន្តគាំទ្រចលនាប្រដាប់អាវុធនានានៅតំបន់មជ្ឈិមបូព៌ាដែលប្រឆាំងនឹងអ៊ីស្រាអែល។ មិនខុសពីពេលមុនៗនោះទេ សេចក្ដីប្រកាសរបស់មេដឹកនាំកំពូលរូបនេះធ្វើឡើងជាទម្រង់អត្ថបទជាអក្សរ ដែលអានដោយពិធីករ និងចាក់ផ្សាយតាមកញ្ចក់ទូរទស្សន៍។
មានន័យថាចាប់តាំងពីថ្ងៃដែលអាមេរិក និងអ៊ីស្រាអែលបើកយុទ្ធនាការវាយប្រហារទៅលើប្រទេសអ៊ីរ៉ង់ និងគេហដ្ឋានរបស់ឪពុកលោក (ដែលជាមេដឹកនាំកំពូលមុន) កាលពីថ្ងៃទី២៨ ខែកុម្ភៈ រហូតមកដល់ពេលនេះ គេពុំដែលឃើញលោកបង្ហាញមុខជាសាធារណៈម្ដងណាឡើយ។ ប្រភពខ្លះថានៅក្នុងថ្ងៃវាយប្រហារលើគេហដ្ឋាននោះ លោកក៏ស្ថិតនៅទីនោះដែរ។ ភរិយា និងកូនរបស់លោកបានស្លាប់នៅក្នុងការវាយប្រហារនោះ។
នៅក្នុងសេចក្ដីថ្លែងការណ៍ពីប្រទេសអ៊ីរ៉ង់ទៅកាន់ក្រុមហេសបូឡានៅប្រទេសលីបង់ លោកម៉ុចតាបាសូមប្រកាសដោយម៉ឺងម៉ាត់ថាគោលនយោបាយរបស់អ៊ីរ៉ង់នាពេលបច្ចុប្បន្ននេះក៏មិនខុសពីពេលនោះនោះទេគឺរក្សាទុកដូចដើមទាំងអស់។ នោះគឺការបន្តគាំទ្រចលនាតស៊ូនានាប្រឆាំងនឹងអ៊ីស្រាអែល និងអាមេរិក។ ប្រទេសទាំង២ជឿជាក់ថាលោកម៉ុចតាបា ខាមេនីរហូតមកដល់ពេលនេះនៅតែមិនទាន់ជាសះស្បើយពីមុខរបួសដ៏ធ្ងន់ធ្ងរនៅឡើយទេ ហើយគាត់បន្តរស់នៅជារបៀបលាក់ខ្លួន។
នៅក្នុងលិខិតនោះ លោកម៉ុចតាបាក៏បានថ្លែងអំណរគុណចំពោះប្រធានក្រុមហេសបូឡាដែលបានចូលរួមរំលែកមរណទុក្ខចំពោះការស្លាប់របស់ឪពុកលោក (លោកអាយ៉ាតូឡា អាលី ខាមេនី)។ លោកនៅតែមានទំនុកចិត្តថាក្រោមការដឹកនាំរបស់ប្រធានចលនារូបនេះ ក្រុមហេសបូឡាអាចតតាំងនឹងផែនការរបស់អ៊ីស្រាអែល ហើយនឹងជួយធ្វើឱ្យប្រទេសលីបង់មានវិបុលភាពឡើងវិញ៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ