ខេត្តកំពង់ចាម ៖ ប្រជាពលរដ្ឋមកពីចំនួន៧ឃុំ ដែលមានជីវភាពក្រីក្របាននាំគ្នាមកទទួលថ្នាំព្យាបាលជំងឺជាច្រើនប្រភេទក្នុងនោះរួមមាន÷ចាប់សរសៃ ជំងឺឆ្អឹង ជំងឺទូទៅ ជំងឺភ្នែកនិងកាយសម្បទា ពីក្រុមគ្រូពេទ្យមនុស្សធម៌ប៉ាយសួយឡាយកម្ពុជា ដោយឥតគិតថ្លៃធ្វើឡើងនៅក្នុងបរិវេណវិទ្យាល័យសម្ដេចជួន ណាត…
ខេត្តកំពង់ចាម ៖ ប្រជាពលរដ្ឋមកពីចំនួន៧ឃុំ ដែលមានជីវភាពក្រីក្របាននាំគ្នាមកទទួលថ្នាំព្យាបាលជំងឺជាច្រើនប្រភេទក្នុងនោះរួមមាន÷ចាប់សរសៃ ជំងឺឆ្អឹង ជំងឺទូទៅ ជំងឺភ្នែកនិងកាយសម្បទា ពីក្រុមគ្រូពេទ្យមនុស្សធម៌ប៉ាយសួយឡាយកម្ពុជា ដោយឥតគិតថ្លៃធ្វើឡើងនៅក្នុងបរិវេណវិទ្យាល័យសម្ដេចជួន ណាត ក្នុងឃុំក្រឡា ស្រុកកំពង់សៀម នាព្រឹកថ្ងៃទី៨សីហាឆ្នាំ២០២៥។ ជាមួយនោះ ឯកឧត្តម ខ្លូត ផន ប្រធានក្រុមប្រឹក្សាខេត្ត ឯកឧត្តមអ៊ុន ចាន់ដា អភិបាលខេត្ត ព្រមទាំងអភិបាលរងខេត្តជាច្រើនរូប បានអញ្ជើញចុះពិនិត្យនិងការលើកទឹកចិត្តដល់ក្រុមគ្រូពេទ្យដែលមានសន្ដានចិត្តមេត្តាធម៌ ។
ដូនចាស់ម្នាក់ឈ្មោះឡុង អ៊ីម អាយុ៧៤ ឆ្នាំជាស្ត្រីមេម៉ាយ រស់នៅភូមិត្រពាំងជ្រៃឃុំក្រឡា មានប្រសាសន៍ឲ្យដឹងថា:ប៉ុន្មានថ្ងៃនេះត្រូវបានលោកមេភូមិដើរជម្រាបដល់ពលរដ្ឋដែលមានជីវភាពខ្វះខាតឱ្យមកទទួលសេវាព្យាបាលជំងឺនានាដោយធ្វើឡើងនៅវិទ្យាល័យសម្ដេចជួន ណាត។ ហើយគាត់មានជំងឺក្រពះសម្រាន្តមិនសូវបានពេលមកជួបក្រុមគ្រូពេទ្យចិនគេបានជួបពិគ្រោះសួរនាំនិងបានឲ្យថ្នាំជាច្រើនមុខព្រមទាំងឧបត្ថម្ភអង្ករទម្ងន់១០គីឡូក្រាម។
ដូនចាស់រូបនេះបានបន្តឲ្យដឹងទៀតថាបន្ទាប់ពីគេឲ្យថ្នាំដៃម្ខាងកាន់ថ្នាំពេទ្យដៃម្ខាងទៀតទប់អង្ករដែលទូលនៅលើក្បាលកុំឲ្យជ្រុះ ដើរតម្រង់ចេញមកជិតដល់មាត់ច្រកនៃវិទ្យាល័យនិងបានអង្គុយបាត់ហត់បន្តិច រង់ចាំកូនមកទទួល ។ គាត់បានលើកឡើងថារាល់ថ្ងៃរស់នៅជាមួយផ្ទះតូចល្មមជាមួយនឹងកូនស្រីម្នាក់អាយុជាង៥០ឆ្នាំ ព្រមទាំងចៅម្នាក់ ដែលមានជីវភាពខ្វះខាត ពេលមកទទួលថ្នាំសង្កូវនេះគាត់រំពឹងថានឹងជួយព្យាបាលជំងឺក្នុងខ្លួនហើយអាចនឹងធ្វើឲ្យគាត់សម្រាន្តលក់ស្រួលជាងមុន។
ចំណែកលោកហាន កុសលអភិបាលរងខេត្ត មានប្រសាសន៍ដោយលើកឡើងថា សកម្មភាពរបស់ក្រុមគ្រូពេទ្យចិនគឺដឹកនាំដោយលោកYi Zhong ប្រធានក្រុមគ្រូពេទ្យមនុស្សធម៌ប៉ាយសួយឡាយកម្ពុជា ដោយបានចុះព្យាបាលជំងឺជូនដល់បងប្អូនប្រជាពលរដ្ឋដែលមានជីវភាពខ្វះខាតទៅតាមគោលដៅចំនួន៥កន្លែងក្នុងនោះមាន÷
១.វិទ្យាល័យព្រះសីហនុ ក្រុងកំពង់ចាមធ្វើឡើងនៅថ្ងៃទី៧សីហា ឆ្នាំ២០២៥
២.វិទ្យាល័យសម្ដេចជួន ណាត ស្រុកកំពង់សៀម ថ្ងៃទី៨សីហា
៣.វិទ្យាល័យតែមាង ស្រុកកំពង់សៀម
៤.វិទ្យាល័យអង្គរបាន ស្រុកកងមាស
៥.វិទ្យាល័យស្គន់ ស្រុកជើងព្រៃ។ដោយក្នុងមួយកន្លែងៗត្រូវព្យាបាលជូនដល់បងប្អូនប្រជាពលរដ្ឋមានជំងឺជាច្រើនប្រភេទក្នុងរង្វង់១៥០០នាក់។
លោកអភិបាលរងខេត្តរូបនេះមានប្រសាសន៍បន្តឲ្យដឹងទៀតថាជាក់ស្ដែងនៅព្រឹកថ្ងៃទី៨សីហា ឯកឧត្តមអ៊ុន ចាន់ដា អភិបាលខេត្ត ឯកឧត្តមខ្លូត ផន ប្រធានក្រុមប្រឹក្សាខេត្ត ព្រមទាំងមន្ត្រីក្រោមឱវាទជាច្រើននាក់បានអញ្ជើញចុះពិនិត្យហ្នឹងលើកទឹកចិត្តដល់ក្រុមគ្រូពេទ្យមនុស្សធម៌នេះដោយកាយវិការក្នុងភាពសប្បាយរីករាយ ដែលបានជួយលើកកម្ពស់សុខមាលភាពរបស់ប្រជាពលរដ្ឋរួមចំណែកជាមួយនឹងរាជរដ្ឋាភិបាលកម្ពុជា។
សូមបញ្ជាក់ថា ក្រុមគ្រូពេទ្យស្ម័គ្រចិត្តមនុស្សធម៌របស់ចិនគឺមានអ្នកខ្លះធ្លាប់បានបំពេញការងារនៅប្រទេសកម្ពុជាក្នុងរយៈពេល២០ទៅ ៣០ឆ្នាំនិងខ្លះទៀតអញ្ជើញមកប្រទេសចិន អ្វីដែលចាប់អារម្មណ៍នោះ គឺតាមរយៈការចាក់ម្ជុលវិទ្យាសាស្ត្រលើអ្នកជំងឺបានធ្វើឲ្យជំងឺធូរស្រាលច្រើនហើយជាមួយនោះ ក៏មានថ្នាក់ដឹកនាំខ្លះក៏ត្រូវបានក្រុមគ្រូពេទ្យស្ម័គ្រចិត្តរបស់ចិននេះបានជួយព្យាបាលជំងឺរហូតជាសះស្បើយថែមទៀតផង។
ចែករំលែកព័តមាននេះ