​ចំណេះដឹង៖ យោងតាមការចុះផ្សាយពីប្រភពបរទេស ​ភាពជឿជាក់លើខ្លួនឯង មិនមែនកើតឡើងដោយសារសម្លៀកបំពាក់ថ្លៃ ឬរូបរាងល្អប៉ុណ្ណោះទេ ប៉ុន្តែកើតចេញពីការត្រៀមខ្លួន ការគិតវិជ្ជមាន និងអាកប្បកិរិយាដែលបង្ហាញពីទំនុកចិត្ត។ អ្នកជំនាញបានណែនាំគន្លឹះ ៦ យ៉ាង ដែលអាចជួយពង្រឹងភាពជឿជាក់ និងធ្វើឱ្យបុគ្គលិកលក្ខណៈកាន់តែទាក់ទាញ។

ជំហានដំបូង គឺត្រូវត្រៀមខ្លួនឱ្យបានល្អ។ ការសិក្សាព័ត៌មាន និងយល់ច្បាស់ពីអ្វីដែលត្រូវនិយាយ នឹងជួយកាត់បន្ថយការភ័យខ្លាច និងធ្វើឱ្យអ្នកមានទំនុកចិត្តកាន់តែខ្លាំងនៅពេលប្រាស្រ័យទាក់ទងជាមួយអ្នកដទៃ។

បន្ទាប់មក គួរយកចិត្តទុកដាក់លើភាសាកាយវិការ ដូចជាឈរត្រង់ខ្លួន អង្គុយប្រកបដោយភាពថ្លៃថ្នូរ មិនឱបដៃ និងរក្សាការសម្លឹងភ្នែកជាមួយអ្នកដែលកំពុងនិយាយ។ អាកប្បកិរិយាទាំងនេះអាចធ្វើឱ្យអ្នកមើលទៅមានភាពជឿជាក់ និងគួរឱ្យទុកចិត្ត។

អ្នកជំនាញក៏ណែនាំឱ្យនិយាយក្នុងល្បឿនសមរម្យ បញ្ចេញសំឡេងឱ្យច្បាស់ និងមានចង្វាក់ ព្រោះការនិយាយលឿនពេកអាចបង្ហាញពីភាពភ័យ។ ទន្ទឹមនឹងនេះ ការជ្រើសរើសសម្លៀកបំពាក់ស្អាត សមនឹងខ្លួន និងសមស្របទៅនឹងកាលៈទេសៈ ក៏អាចជួយបង្កើនទំនុកចិត្តបានផងដែរ។

លើសពីនេះ ការគិតវិជ្ជមាន និងលើកទឹកចិត្តខ្លួនឯងមុនចាប់ផ្តើមកិច្ចការសំខាន់ៗ អាចជួយឱ្យខួរក្បាលត្រៀមខ្លួនទទួលសម្ពាធបានល្អ និងរក្សាភាពស្ងប់ស្ងាត់នៅពេលប្រឈមមុខនឹងស្ថានភាពលំបាក។

អ្នកជំនាញសង្កត់ធ្ងន់ថា ភាពជឿជាក់លើខ្លួនឯងមិនមែនកើតឡើងភ្លាមៗនោះទេ ប៉ុន្តែជាជំនាញដែលអាចអភិវឌ្ឍបានតាមរយៈការហ្វឹកហាត់ និងបទពិសោធ។ នៅពេលអ្នកជឿជាក់លើសមត្ថភាពរបស់ខ្លួន និងហ៊ានបង្ហាញសក្តានុពលដោយធម្មជាតិ អ្នកនឹងក្លាយជាមនុស្សដែលមានភាពទាក់ទាញ និងអាចបង្កើតចំណាប់អារម្មណ៍ល្អចំពោះអ្នកជុំវិញ៕