ទីក្រុងប៉ារីស៖ ភ្លើងឆេះព្រៃជាច្រើនកន្លែងកំពុងរាលដាលជិតដល់ទីក្រុងប័រដូរបស់ប្រទេសបារាំងហើយ។ ទីនេះជាទីក្រុងប្រវត្តិសាស្ត្រផង ហើយក៏ជាសម្បុកដំណាំទំពាំងបាយជូរសម្រាប់ផលិតស្រាផងដែរ។ នៅពេលនេះ បារាំង និងអេស្ប៉ាញបន្តប្រយុទ្ធប្រឆាំងនឹងភ្លើងឆេះព្រៃដែលបង្ខំឱ្យប្រជាជនរាប់សែននាក់រត់ភៀសខ្លួនចេញពីផ្ទះសម្បែងរបស់ខ្លួនទៅរកទីកន្លែងសុវត្ថិភាព។ នៅបារាំង មនុស្សប្រហែល២សែននាក់បានជម្លៀសខ្លួន ចំណែកនៅអេស្ប៉ាញមនុស្សជាង៧,៥ម៉ឺននាក់ជម្លៀសខ្លួន។ មនុស្ស៣ម៉ឺននាក់បានទទួលបានបញ្ជាពីអាជ្ញាធររួចហើយដើម្បីត្រៀមជម្លៀសខ្លួននៅក្នុងករណីចាំបាច់។
នៅបារាំង ភ្លើងឆេះព្រៃបានដុតបំផ្លាញតំបន់ជ្រោយ Cap Ferret នៃឆ្នេរមហាសមុទ្រអាត្លង់ទិចដែលជាតំបន់ទេសចរណ៍ដ៏ពេញនិយម។ ភ្លើងបន្តឆាបឆេះតំបន់ខ្សែក្រវាត់ក្រុងប័រដូ ខណៈដែលភ្នាក់ងារអគ្គិភ័យកំពុងខិតខំទប់ស្កាត់មិនឱ្យភ្លើងនេះឆេះរាលដាលទៅដល់តំបន់កណ្ដាលក្រុង។ អភិបាលក្រុងប័រដូថ្លែងថាភ្លើងឆេះព្រៃស្ថិតនៅចម្ងាយ១៥គីឡូម៉ែត្រពីចំណុចកណ្ដាលនៃទីក្រុងនេះ។ រដ្ឋមន្ត្រីក្រសួងមហាផ្ទៃថ្លែងថាភ្លើងបន្តឆាបឆេះមិនអាចគ្រប់គ្រងបានទេ ហើយវាកំពុងតម្រង់ទិសដៅទៅរកទីក្រុងប័រដូ។ សភាពការណ៍ជាទូទៅមិនល្អទាល់តែសោះ។ យើងកំពុងស្ថិតនៅក្នុងស្ថានភាពដ៏អាក្រក់។
អាជ្ញាធរមិនមានផែនការជម្លៀសប្រជាជនចេញពីទីក្រុងប័រដូរដែលមានមនុស្សរស់នៅ៨,៥សែននាក់នោះទេ។ អាជ្ញាធរនឹងបន្តវាយតម្លៃសភាពការណ៍ដោយអារម្មណ៍នឹងន និងដោយភាពប្រាកដនិយម។ នៅពេលភ្លើងបន្តឆាបឆេះយ៉ាងដូច្នេះ នគរបាលត្រូវដើរគោះទ្វារពីផ្ទះមួយទៅផ្ទះមួយនៅទីក្រុងមួយចំនួនដើម្បីជម្លៀសមនុស្សចេញ។ អាជ្ញាធរបានផ្សព្វផ្សាយរូបភាពវីឌីអូបង្ហាញរូបចុះគោះទ្វារទាំងយប់អធ្រាត្រ និងប្រាប់ឱ្យប្រជាជនប្រញាប់ចាកចេញ។ នៅអេស្ប៉ាញ នាយករដ្ឋមន្ត្រីឆ្វេងនិយម ប៉េដ្រូ សាន់ឆេស ចុះទស្សនកិច្ចនៅតំបន់ដែលរងគ្រោះខ្លាំងដោយសារភ្លើងឆេះព្រៃនៅអាវីយ៉ាដែលជាខេត្តមួយនៅក្នុងចំណោមខេត្តរងគ្រោះដោយសារភ្លើងឆេះព្រៃទាំង៣រួមទាំងម៉ាឌ្រីត និងតូឡេដូផងដែរ។
ភ្លើងបានដុតបំផ្លាញព្រៃឈើនៅលើផ្ទៃដីជាង៥ម៉ឺនហិចតារនៅអាវីយ៉ា ហើយជាភ្លើងឆេះព្រៃដ៏ធំបំផុតនៅក្នុងប្រវត្តិសាស្ត្រអេស្ប៉ាញសម័យទំនើប។ ភ្លើងឆេះព្រៃមួយកន្លែងទៀតនៅខេត្ត Castellon បានដុតបំផ្លាញព្រៃនៅលើផ្ទៃដីជាង៤៣០០ហិចតារ។ អាជ្ញាធរថ្លែងថាភ្លើងនេះពិបាកពន្លត់ណាស់ដោយសារអាកាសធាតុអាក្រក់ដែលនឹងបន្តកើតមានពេញមួយថ្ងៃ។ ភ្លើងបានរីករាលដាលទៅដល់សួនឧទ្យានធម្មជាតិ Sierra de Espadan ដែលសម្បូរដើមស្រល់ និងដើមសែន (chêne)។ នេះជាគ្រោះធម្មជាតិថ្មីបំផុតដែលបង្កឡើងដោយគ្រោះរាំងស្ងួតរយៈពេលវែង និងការឡើងកម្ដៅជាបន្តបន្ទាប់ដោយសារការប្រែប្រួលអាកាសធាតុ។ ទាំងនៅប័រដូររបស់ប្រទេសបារាំង និងអាវីយ៉ារបស់អេស្ប៉ាញ សីតុណ្ហភាពក្ដៅនៅខែកក្កដានេះជាមធ្យម៣២អង្សា។ មានន័យថាឡើង៦អង្សាលើសរយៈពេលដូចគ្នាកាលពីចន្លោះឆ្នាំ១៩៦១ដល់១៩៩០៕ ប្រភព៖ Reuters
ចែករំលែកព័តមាននេះ