ទីក្រុងតេអេរ៉ង់៖ ប្រទេសអ៊ីរ៉ង់នឹងផ្អាកសកម្មភាពវាយប្រហារមូលដ្ឋាននានារបស់អាមេរិកនៅតំបន់មជ្ឈិមបូព៌ាប្រសិនបើអាមេរិកអនុវត្តដូចគ្នា។ ខាងលើនេះជាការថ្លែងរបស់មន្ត្រីជាន់ខ្ពស់អ៊ីរ៉ង់បន្ទាប់ពីយោធាអាមេរិកសម្រេចចិត្តផ្អាកទម្លាក់គ្រាប់បែកទៅលើប្រទេសអ៊ីរ៉ង់ដោយសារអស់ទីតាំងដែលត្រូវវាយប្រហារ និងម៉្យាងទៀត មីស៊ីលរបស់អាមេរិកក៏ប្រើប្រាស់អស់យ៉ាងច្រើនសន្ធឹកសន្ធាប់ពីក្នុងឃ្លាំងផងដែរ។ បន្ទាប់ពីវាយប្រហារអ៊ីរ៉ង់រយៈពេល១៣រាត្រីជាប់គ្នា មន្ទីរបញ្ចកោណសម្រេចចិត្តផ្អាកសកម្មភាពវាយប្រហារត្រឹមថ្ងៃសុក្រសប្ដាហ៍មុន។ ពេញមួយថ្ងៃអាទិត្យ និងថ្ងៃចន្ទនេះ គេមិនបានស្ដាប់ឮសំឡេងផ្ទុះគ្រាប់បែកនៅលើទឹកដីអ៊ីរ៉ង់ទេ។
អ៊ីរ៉ង់ដែលវាយប្រហារបកវិញរាល់ពេលដែលអាមេរិកវាយប្រហារមកលើខ្លួននោះក៏មិនបានវាយប្រហារតបតវិញដែរអស់រយៈពេល២ថ្ងៃមកហើយ។ មន្ត្រីជាន់ខ្ពស់អ៊ីរ៉ង់ខាងលើប្រាប់ថារដ្ឋាភិបាលខ្លួននៅតែប្រកាន់ជំហរដដែលគឺថាបើខ្លួនរងការវាយប្រហារ ខ្លួននឹងវាយបកទៅវិញជានិច្ច។ ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកម៉ាយវ៉ាល់ ប្រាប់ទូរទស្សន៍ហ្វក់ និងសារព័ត៌មានអាមេរិកដទៃទៀតថាលោកត្រាំសម្រេចចិត្តផ្អាកវាយប្រហារអ៊ីរ៉ង់ដើម្បីយកពេលនេះទៅជជែកគ្នាតាមមធ្យោបាយការទូតវិញ។ លោកវ៉ាល់ថ្លែងបន្តទៀតថាលោកត្រាំចង់ដកឃ្លាបន្តិចដើម្បីចរចាគ្នា។ លោកថ្លែងតែប៉ុណ្ណេះដោយមិនបានផ្ដល់សេចក្ដីលម្អិតទេ។
កាលពីប៉ុន្មានថ្ងៃមុននេះ មន្ត្រីយោធាអាមេរិកបានជូនយោបល់ទៅលោកត្រាំថាអាមេរិកសម្រុកវាយប្រហារអ៊ីរ៉ង់រយៈពេល២សប្ដាហ៍កន្លងទៅនេះធ្វើឱ្យអាមេរិកប្រើប្រាស់អាវុធយុទ្ធភ័ណ្ឌអស់ជាច្រើនពីក្នុងស្តុក។ តាមពិត អាមេរិកនៅតែដាក់ជម្រើសវាយប្រហារអ៊ីរ៉ង់នៅលើតុដដែល។ ប៉ុន្តែនាយអគ្គសេនាធិការចម្រុះកងទ័ពអាមេរិក លោកដាន់ខេន បានជម្រាបជូនលោកត្រាំថាអាមេរិកប្រសិនបើវាយប្រហារអ៊ីរ៉ង់តទៅទៀតអាចនឹងអស់អាវុធពីក្នុងឃ្លាំង រួមទាំងមីស៊ីលការពារដែនអាកាសដែលដាក់ពង្រាយនៅទូទាំងតំបន់មជ្ឈិមបូព៌ាផងដែរ។ លោកវ៉ាល់ថ្លែងប្រាប់ទូរទស្សន៍អឹនប៊ីស៊ីថាយោធាអាមេរិកមានអ្វីៗគ្រប់យ៉ាងដែលខ្លួនត្រូវការ។
ប៉ុន្តែនៅពេលលោកភីតហេកសឹតឡើងមកកាន់តំណែងជារដ្ឋមន្ត្រីការពារជាតិ លោកស្ថិតនៅក្នុងស្ថានភាពប្រើប្រាស់គ្រាប់រំសេវសឹងតែអស់ពីក្នុងឃ្លាំង។ មន្ត្រីជាន់ខ្ពស់អ៊ីរ៉ង់ដែលនិយាយថាបើអាមេរិកឈប់វាយប្រហារ អ៊ីរ៉ង់ក៏ឈប់ដែរនោះ ប្រាប់បន្តទៀតថាអ៊ីរ៉ង់មិនសង្ឃឹមច្រើនពេកទេថាការដែលលោកត្រាំសម្រេចចិត្តផ្អាកវាយប្រហារអ៊ីរ៉ង់ជាជំហររបស់អាមេរិកនៅក្នុងការចរចាគ្នា។ មន្ត្រីរូបនេះយល់ថាមានចំណុចដែលគួរឱ្យមន្ទិលសង្ស័យច្រើនជាងសុទិដ្ឋិនិយមនៅក្នុងបញ្ហាផ្អាកវាយប្រហារនេះ។ នេះអាចជាតាក់ទិចរបស់គេច្រើនជាងការផ្អាកវាយប្រហារដោយសុទ្ធចិត្ត។ អ៊ីរ៉ង់ធ្លាប់ហែលឆ្លងបទពិសោធជូរចត់ឆ្អែតឆ្អន់ហើយ។ នៅទីបញ្ចប់ វាគ្រាន់តែជាការបោកបញ្ឆោតតែប៉ុណ្ណោះ៕ ប្រភព៖ Reuters
ចែករំលែកព័តមាននេះ