ខេត្តបាត់ដំបង ៖ លំនៅឋានដ៏ធំមួយខ្នង ត្រូវបានអគ្គិភ័យដែលគេសង្ស័យផ្ដើមចេញពីការឆ្លងចរន្តអគ្គិសនីលេបត្របាក់អស់គ្មានសល់ កាលពីវេលាម៉ោង៤និង២០នាទីរសៀលថ្ងៃទី០៨ សីហា នៅចំណុចភូមិកៀនកែស២ ឃុំគោកឃ្មុំ ស្រុកថ្មគោល តែពុំមានគ្រោះថ្នាក់មនុស្សទេ…
ខេត្តបាត់ដំបង ៖ លំនៅឋានដ៏ធំមួយខ្នង ត្រូវបានអគ្គិភ័យដែលគេសង្ស័យផ្ដើមចេញពីការឆ្លងចរន្តអគ្គិសនីលេបត្របាក់អស់គ្មានសល់ កាលពីវេលាម៉ោង៤និង២០នាទីរសៀលថ្ងៃទី០៨ សីហា នៅចំណុចភូមិកៀនកែស២ ឃុំគោកឃ្មុំ ស្រុកថ្មគោល តែពុំមានគ្រោះថ្នាក់មនុស្សទេ ។
យោងរបាយការណ៍អធិការស្រុកថ្មគោលបានឲ្យដឹងថា លំនៅឋានដែលត្រូវភ្លើងឆេះអស់នោះ ធ្វើអំពីថ្មក្រោមឈើលើ និងប្រក់ស័ង្កសី ដែលមានម្ចាស់ឈ្មោះ ច្រេង បុិត ភេទប្រុស អាយុ៧៣ឆ្នាំ មានមុខរបរលក់ពងទា ។
របាយការណ៍បានបញ្ជាក់ថា លំនៅឋានជនរងគ្រោះ ត្រូវបានអគ្គិភ័យឆេះអស់ស្ទើរទាំងស្រុង រួមទាំងទ្រព្យសម្បត្តិជាច្រើនផង ដែលជនរងគ្រោះ មិនអាចរំដោះរួចផុតពីអណ្ដាតភ្លើងសដ៏សន្ធោសន្ធៅ ។
អធិការស្រុកថ្មគោល លោក សេង លុច បាននិយាយថា បើតាមចម្លើយបំភ្លឺរបស់ជនរងគ្រោះ អគ្គិភ័យនេះ អាចបណ្ដាលមកពីការឆ្លងចរន្តអគ្គិសនី ដែលចាប់ផ្ដើមពីផ្នែកខាងលើមុន ។ លោកបានបន្តថា អគ្គិភ័យហាក់ឆេះលឿនបំផុត ដោយសារតែផ្នែកខាងលើមានសុទ្ធតែឈើ សូម្បីតែរថយន្តពន្លត់អគ្គិភ័យសមត្ថកិច្ចដែលបានទៅដល់បានត្រឹមជួយបាញ់ទប់ស្កាត់ កុំឲ្យឆ្លងរាលដាល។
ជុំវិញអគ្គិភ័យនេះ នៅក្នុងរបាយការណ៍សមត្ថកិច្ចបានបង្ហាញតុល្យការនៃការខូចខាតជាបឋម៖ ក្រៅពីខូចខាតផ្ទះមួយខ្នង ជនរងគ្រោះបានបាត់បង់ប្រាក់ថៃចំនួន១២ម៉ឺនបាត ប្រាក់ដុល្លារចំនួន៧,៦០៥ដុល្លារ និងសម្ភារប្រើប្រាសនក្នុងផ្ទះជាច្រើនទៀត។
សូមបញ្ជាក់ផងដែរថា នេះជាមហន្តរាយដោយអគ្គិភ័យលើកទី២ សម្រាប់ថ្ងៃទី០៨ សីហា ដែលបានកើតឡើងនៅក្នុងខេត្តបាត់ដំបង។ លើកទី១-អគ្គិភ័យបានឆេះឃ្លាំងស្ដុកសម្ភារកសិកម្មដ៏ធំមួយកន្លែង កាលពីវេលាម៉ោង១និង៣០នាទីរសៀលថ្ងៃទី ០៨ សីហា នៅភូមិខ្នាចរមាស ឃុំខ្នាចរមាស ស្រុកបវេល ធ្វើឲ្យជនរងគ្រោះខាតបង់ប្រាក់ប្រមាណ១៥០០០ដុល្លារ ។
ហើយលើកទី២-បានកើតឡើងនៅម៉ោងជាង៤រសៀលថ្ងៃដដែល នៅភូមិកៀនកែស២ ឃុំគោកឃ្មុំ ស្រុកថ្មគោល ដែលមានព្រំប្រទល់ជាប់គ្នា បណ្ដាលឲ្យឆេះផ្ទះអស់មួយខ្នង បង្កឲ្យជនរងគ្រោះខាតបង់ផ្ទះមួយខ្នង និងប្រាក់ប្រហែលជាង០១ម៉ឺនដុល្លារដែរ តែយ៉ាងណា អគ្គិភ័យទាំង០២លើកនេះមិនបង្កគ្រោះថ្នាក់ដល់មនុស្សទេ ៕
ចែករំលែកព័តមាននេះ