ទីក្រុងវ៉ាស៊ីនតោន៖ ស្ថានការណ៍នៅវេណេហ្ស៊ូអេឡានៅតែមានភាពតានតឹង។ បន្ទាប់ពីរុស្ស៊ីនិយាយក្រើនរំលឹកឱ្យអាមេរិកប្រើប្រាស់ការអត់ធ្មត់ និងជៀសវាងមិនប្រព្រឹត្តកំហុសដ៏ធ្ងន់ធ្ងរ អាមេរិកចាប់ផ្ដើមបញ្ចេញប្រតិកម្មតបជាបណ្ដើរៗ។ រដ្ឋមន្ត្រីការបរទេសអាមេរិក លោករូប៊ីអូ (Rubio) ថ្លែងប្រាប់អ្នកសារព័ត៌មានថារដ្ឋាភិបាលរបស់លោកមិនបារម្ភខ្លាចមានភាពតានតឹងជាមួយប្រទេសរុស្ស៊ីទេ។
ទន្ទឹមនឹងការនិយាយបែបនេះ អាមេរិកបន្តបញ្ជូនកងទ័ព និងយុទ្ធោបករណ៍ទៅដាក់ពង្រាយនៅសមុទ្រការីប៊ីនរបៀបដូចរុស្ស៊ីកសាងកម្លាំងនៅព្រំដែនអ៊ុយក្រែនមុនពេលផ្ទុះសង្គ្រាមឆ្នាំ២០២២ដូច្នោះដែរ។ កាលនោះ គេចាំបានថារុស្ស៊ីអះអាងថាគ្មានគម្រោងផ្ទុះសង្គ្រាមទេ។ ប៉ុន្តែជាក់ស្ដែងរុស្ស៊ីវាយអ៊ុយក្រែនឱ្យទាល់តែបាន។ ឥឡូវនេះ លោកត្រាំប្រកាសថាលោកគ្មានគម្រោងផ្លាស់ប្ដូររបបដឹកនាំនៅវេណេហ្ស៊ូអេឡាទេ។ លោកចង់តាមកម្ចាត់ក្រុមជួញដូរគ្រឿងញៀនតែប៉ូណ្ណោះ។
អាមេរិកបានបញ្ជូនកងទ័ពរាប់ពាន់នាក់ នាវាដឹកយន្តហោះ នាវាចម្បាំង និងយន្តហោះទៅសមុទ្រការីប៊ីន។ លោករូប៊ីអូថ្លែងថាយើងមិនបារម្ភខ្លាចមានភាពតានតឹងជាមួយរុស្ស៊ីទេ។ យើងធ្លាប់គិតតាំងពីដំបូងទីមកម៉្លេះថាពួកគេ (រុស្ស៊ី) មុខតែប្រើវោហារសាស្ត្រគាំទ្ររបបដឹកនាំរបស់ម៉ាឌូរ៉ូជាមិនខាន។ ការថ្លែងដូច្នេះបន្ទាប់ពីក្រសួងការបរទេសរុស្ស៊ីថ្លែងពីម្សិលមិញដោយសង្ឃឹមថារដ្ឋាភិបាលរបស់លោកត្រាំនឹងមិនប្រព្រឹត្តកំហុសស្លាប់-រស់នៅប្រទេសវេណេហ្ស៊ូអេឡាទេ។
រុស្ស៊ីថ្លែងបន្តទៀតថាខ្លួនបារម្ភចំពោះការសម្រេចចិត្តរបស់អាមេរិកដើម្បីបិទខ្ទប់មិនឱ្យនាវាដឹកប្រេងអាចចេញចូលសមុទ្រវេណេហ្ស៊ូអេឡា។ ដូច្នេះធ្វើឱ្យប៉ះពាល់ការដឹកជញ្ជូនទំនិញជាអន្តរជាតិ។ វេណេហ្ស៊ូអេឡា និងរុស្ស៊ីជាមិត្តដែកថែបពិតមែនហើយ។ ក៏ប៉ុន្តែបើផ្អែកតាមទីតាំងភូមិសាស្ត្រ រុស្ស៊ីមិនអាចជួយអ្វីវេណេហ្ស៊ូអេឡាបានច្រើនទេ។ យ៉ាងខ្លាំងបានត្រឹមចេញសេចក្ដីថ្លែងការណ៍ថ្កោលទោស ឬប្រឆាំងជំទាស់នៅអង្គការសហប្រជាជាតិតែប៉ុណ្ណោះបើសិនអាមេរិកវាយប្រហារប្រទេសនេះ។
សំណុំឯកសាររបស់អាមេរិកថ្មីៗនេះបង្ហាញថាលោកត្រាំនឹងចាប់ផ្ដើមធ្វើជាបងធំនៅអឌ្ឍគោលខាងលិចឡើងវិញ។ អាមេរិកអាចនឹងប្រើប្រាស់ «លទ្ធិម៉ុនរ៉ូ» កាលពីអំឡុងសតវត្សទី១៩។ លទ្ធិនេះដាក់ឈ្មោះតាមប្រធានាធិបតីអាមេរិកជេមម៉ុនរ៉ូ (Jame Monroe) ដែលថា «ទ្វីបអាមេរិកសម្រាប់តែអាមេរិក»។ មានន័យថាអាមេរិកមិនអនុញ្ញាតឱ្យប្រទេសដទៃលូកដៃចូលទីតាំងដែលខ្លួនចាត់ទុកថាជាតំបន់របស់ខ្លួននោះឡើយ។ ឥឡូវនេះ គេកំពុងរង់ចាំអ៊ុតមើលសភាពការណ៍នៅវេណេហ្ស៊ូអេឡាជាបន្តទៀតដើម្បីចង់ដឹងថាតើអាមេរិកនឹងវាយប្រហារវេណេហ្ស៊ូអេឡាដែរឬទេ? ហើយបើសិនជាវាយតើវាយកម្រិតណា? នេះបើតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ