ទីក្រុងម៉ូស្គូ៖ លោកពូទីនសន្យាថាលោកឈប់ផ្ទុះសង្គ្រាមតទៅទៀតហើយបើសិនក្រុមបស្ចិមប្រទេសបង្ហាញការគោរពចំពោះរុស្ស៊ី។ ម៉្យាងទៀត លោកក៏សូមច្រានចោលជាថ្មីម្ដងទៀតថារុស្ស៊ីគ្មានផែនការវាយប្រហារទ្វីបអឺរ៉ុបទេ។ នៅក្នុងការផ្សាយតាមកញ្ចក់ទូរទស្សន៍នាពេលរាត្រី លោកពូទីនត្រូវបានទូរទស្សន៍ប៊ីប៊ីស៊ីសាកសួរថាតើលោកមានគម្រោងបើកប្រតិបត្តិការសឹកពិសេសជាបន្តទៀតទេ? លោកពូទីនឆ្លើយតបថានឹងមិនមានប្រតិបត្តិការយោធាតទៅទៀតទេឱ្យតែអឺរ៉ុបធ្វើអ្វីចេះគោរពរុស្ស៊ីខ្លះផង, ឱ្យតែអឺរ៉ុបគោរពផលប្រយោជន៍របស់យើងដូចយើងគោរពផលប្រយោជន៍របស់អឺរ៉ុបដែរ។
កាលពីដើមខែធ្នូ លោកពូទីនថ្លែងថារុស្ស៊ីគ្មានគម្រោងធ្វើសង្គ្រាមជាមួយអឺរ៉ុបទេ។ ប៉ុន្តែលោកថារុស្ស៊ីក៏ត្រៀមកំដរជានិច្ចបើពួកគេចង់ធ្វើសង្គ្រាមជាមួយរុស្ស៊ី។ លោកពូទីនអះអាងថារុស្ស៊ីនឹងមិនឈ្លានពានប្រទេសណាទៀតទេ កុំឱ្យតែក្រុមបស្ចិមប្រទេសនិយាយបាតដៃជាខ្នងដៃជាមួយរុស្ស៊ីដូចករណីពួកគេភូតកុហករុស្ស៊ីថាមិនពង្រីកអង្គការណាតូនៅអឺរ៉ុបខាងកើត។ លោកពូទីនឧស្សាហ៍និយាយរំលឹកជារឿយៗនូវការសន្យារបស់បស្ចិមប្រទេសជាមួយលោកហ្គោបាឆោហ្វកាលពីឆ្នាំ១៩៩០។ ប៉ុន្តែលោកហ្គោបាឆោហ្វថាមិនដែលបាននិយាយរឿងនេះទេ។
របាយការណ៍ពីភ្នាក់ងារសម្ងាត់អាមេរិកព្រមានថាគោលបំណងពិតរបស់លោកពូទីនគឺវាយយកទឹកដីអ៊ុយក្រែនទាំងមូល និងវាយយកតំបន់អឺរ៉ុបដែលធ្លាប់ចំណុះឱ្យសហភាពសូវៀតមកគ្រប់គ្រងឡើងវិញ។ របាយការណ៍នេះផ្ទុយពីការរំពឹងទុករបស់លោកត្រាំ និងអ៊ុយក្រែនដែលសង្ឃឹមថាលោកពូទីនចង់បញ្ចប់សង្គ្រាម។ របាយការណ៍សម្ងាត់នោះក៏ផ្ទុយពីអ្វីដែលលោកពូទីនបដិសេធថាលោកគ្មានផែនការវាយអឺរ៉ុប។
របាយការណ៍របស់អាមេរិកនៅតែត្រឹមត្រូវនឹងសភាពការណ៍ជាក់ស្ដែងចាប់តាំងពីរុស្ស៊ីវាយអ៊ុយក្រែនកាលពីឆ្នាំ២០២២។ របាយការណ៍ទាំងនេះស៊ីសង្វាក់គ្នានឹងការយល់ឃើញរបស់ថ្នាក់ដឹកនាំអឺរ៉ុប និងទីភ្នាក់ងារសម្ងាត់អឺរ៉ុបដែលថាលោកពូទីនចង់បានទឹកដីច្រើនថែមទៀត។ លោកម៉ាយឃ្វីកលី (Mike Quikgley) ជាសមាជិកគណៈកម្មការសភាទទួលបន្ទុកផ្នែកស៊ើបការណ៍សម្ងាត់។ លោកថ្លែងថាពួកអឺរ៉ុបយល់ច្បាស់អំពីបញ្ហានេះ, ប៉ូឡូញយល់ច្បាស់, តំបន់បាល់ទិចគិតថាខ្លួនជាគោលដៅមុនគេរបស់លោកពូទីន។ នេះបើតាមការផ្សាយរបស់ប៊ីប៊ីស៊ី, រ៉យទ័រ និងប្រភពដទៃទៀត៕
ចែករំលែកព័តមាននេះ