ខេត្តសៀមរាប ៖ ករណីបិទវត្តពោធិ៍លង្កា (ពោធ៍លើ) និងបញ្ចប់តួនាទីចៅអធិការ គ្រូសូត្រឆ្វេង និងគ្រូសូត្រស្តាំ បន្ទាប់ពីកើតមានជម្លោះមិនចេះចប់នោះ ពេលនេះ ក៏ត្រូវបានតែងតាំងព្រះភិក្ខុ…
ខេត្តសៀមរាប ៖ ករណីបិទវត្តពោធិ៍លង្កា (ពោធ៍លើ) និងបញ្ចប់តួនាទីចៅអធិការ គ្រូសូត្រឆ្វេង និងគ្រូសូត្រស្តាំ បន្ទាប់ពីកើតមានជម្លោះមិនចេះចប់នោះ ពេលនេះ ក៏ត្រូវបានតែងតាំងព្រះភិក្ខុ ពិន
ចន្ទ្រា ឆាយាធម្មបណ្ឌិរភា ជាចៅអធិការ, ព្រះភិក្ខុ ប៉យ ប៉ នាមឆាយា ខន្តិរក្ខកោ ជាគ្រូសូត្រស្តាំ និងព្រះភិក្ខុ គេន សូនី នាមឆាយា សង្សមុនី ជាគ្រូសូត្រឆ្វេង ព្រមទាំងព្រះវិន័យធម៌១រូប និងលេខា១រូប ត្រូវបានប្រកាសនីយប័ត្រ និងស្រោចស្រពសុគន្ធវារី ស្ថិតនៅ វត្តពោធិលង្កា (វត្តពោធិលើ) ក្នុងភូមិស្លក្រាម សង្កាត់ស្លក្រាម ក្រុងខេត្តសៀមរាប ។ សូមរំលឹកថា៖ សម្រេចបិទវត្តវត្តពោធិ៍លង្កា(ហៅពោធិ៍លើ) ក្រោយបង្កើតបក្សពួកនិងបង្កជម្លោះ
ការប្រកាសប្រកាសនីយប័ត្រតែងតាំង និងស្រោចស្រពសុគន្ធវារីដល់ព្រះគ្រូចៅអធិការ និងគ្រូសូត្រស្តាំ , ឆ្វេង រួមទាំងព្រះវិន័យធម៌ និងលេខា នៅវត្តពោធិ៍លង្កា (វត្តពោធិ៍លើ) ក្រោមព្រះអធិបតីរបស់សម្តេចព្រះព្រហ្មរតនមុនី ពិន សែម សមាជិកថេរសភានិងឧត្តមទីប្រឹក្សាគណៈ សង្ឃនាយកនៃព្រះរាជាណាចក្រកម្ពុជា ដោយមានការនិមន្តចូលរួមពីសំណាក់ព្រះមេគណខេត្ត មន្ត្រីសាលាគណខេត្ត អនុគណក្រុងសៀមរាប និងព្រះគ្រូចៅអធិការគ្រប់វត្តក្នុងក្រុង និងសមណៈសិស្សគរុសិស្ស , លោកគ្រូ អ្នកគ្រូ , អាជ្ញាធរមូលដ្ឋាន, គណៈកម្មការអាចារ្យ វត្ត និងប្រជាពុទ្ធបរិស័ទចំណុះ ជើងវត្តប្រមាណជា២០០អង្គ/នាក់ចូលរួមនៅថ្ងៃទី១៨ ខែធ្នូ ឆ្នាំ២០២៣ នេះ ក្នុងបរិវេណវត្តពោធិលង្កា (វត្តពោធិ៍លើ) ។
មានសង្ឃដីកានោះដែរ សម្តេចព្រះព្រហ្មរតនមុនី ពិន សែម ក៏បានផ្តល់នូវពុទ្ធឱវាទប្រគេនជូនដល់ព្រះភិក្ខុសង្ឃ ពុទ្ធបរិស័ទទាំងឡាយ យកទៅគោរពបដិបត្តិទៅតាមគន្លងនៃវិន័យព្រះសម្មាសាម្ពុទ្ធ ដែលជាព្រះបរម្យគ្រូនៃយើងបានចងក្រងជាគម្ពីបិដកឲ្យគោរពទៅតាមព្រះធម៌វិន័យរបស់ព្រះពុទ្ធសាសនា ។ សម្តេចព្រះព្រហ្មរតនមុនីមានសង្ឃដីកាលើកឡើងថា គិតមកទល់ពេលនេះ គឺមានរយៈពេលមួយខែនិងប្រាំថ្ងៃហើយ ដែលវត្តពោធិលង្កា (វត្តពោធិលើ) ត្រូវបានប្រកាសរំសាយគណៈគ្រប់គ្រងចាស់ ពោលគឺបញ្ចប់តួនាទីពីព្រះចៅអធិការ គ្រូសូត្រស្តាំ គ្រូសូត្រឆ្វេង និងវិន័យធរវត្ត ដោយមានវត្តពោធិ៍លង្កាមានកើតនូវអធិកររ៉ាំរ៉ៃជាយូរឆ្នាំមកហើយ ទើបសាលាអនុគណៈក្រុងជាអ្នកទទួលភារកិច្ចផ្ទាល់ជាមួយសាលាគណខេត្ត និងស្ថាប័នពាក់ព័ន្ធ មានរដ្ឋបាលក្រុងសៀមរាបជាដើម ក្នុងការអនុវត្ត ។
សម្តេចបានគូសបញ្ជាក់ទៀតថា ដើម្បីបំបាត់នូវអធិករណ៍ក្នុងវត្តមួយនេះ គណៈនាយកសង្ឃបានចេញសង្ឃសម្រេចបញ្ចប់តួនាទីចៅអធិការ, គ្រូសូត្រស្តាំ ,គ្រូសូត្រឆ្វេង និងវិន័យធរវត្ត ហើយត្រូវបានរៀបចំគណៈគ្រប់គ្រងថ្មី ដើម្បីដឹកនាំរៀបចំវត្តនេះឆ្ពោះទៅរកវឌ្ឍនភាព និងភាពសុខដុមរមនាក្នុងពេលដ៏ខ្លី ។ ក្នុងនោះដែរ សម្តេចព្រះព្រហ្មរតនមុនី ពិន សែម បានផ្តល់នូវព្រះដំបូន្មានមួយចំនួនតាមផ្លូវព្រះធម៌ និង ផ្លូវលោក ពុទ្ធចក្រ និងអាណាចក្រសំខាន់នូវព្រះធម៌ សាមគ្គីធម៌ និងកសាងអភិវឌ្ឍន៍វិស័យព្រះពុទ្ធសាស នា ដោយសាសនាជ្រកក្រោមម្លប់តែមួយនៃរដ្ឋធម្មនុញ្ញ ព្រះរាជាណាចក្រកម្ពុជាដែលជាសាសនារបស់រដ្ឋ ។
សម្តេចព្រះព្រហ្មរតនមុនី ក៏បានលើកនូវព្រះវិន័យរបស់ព្រះសម្មាសម្ពុទ្ធ ក្នុងការដឹកនាំព្រះសង្ឃនៅក្នុងទីវត្ត ដែលជាភារកិច្ចរបស់ព្រះគ្រូចៅអធិការវត្ត ត្រូវគោរពប្រតិបត្តិ នូវនាយកធម៌ទាំង០៦យ៉ាង ដែលជាប្រទីបក្នុងការគ្រប់គ្រងវត្តអារាម ប្រកបដោយប្រសិទ្ធភាព និងគ្មានអធិករណ៍អ្វីកើតឡើងនោះឡើយ ដោយប្រកាន់នូវធម៌ខន្តី ។
សម្តេចព្រះព្រហ្មរតនមុនី ពិន សែម បញ្ជាក់ថា វត្តអារាមជាទីជំរកអប់រំរិយាធម៌ដល់ពុទ្ធបរិស័ទយុវជន ដែលជាទំពាំងស្នងឬស្សី និងជាឱកាសល្អក្នុងការរួបរួមគ្នា ដើម្បីថែរក្សាការពារសេចក្តីសុខសាន្ត សង្គមជាតិ ដោយប្រកាន់យកព្រះពុទ្ធឱវាទជាប្រទីបបំភ្លឺផ្លូវ ក្នុងការអប់រំសីលធម៌ ចរិយាធម៌ សេចក្តីថ្នៃថ្នូរ សមនឹងទស្សនៈដែលថា ព្រះពុទ្ធសាសនាជាកម្លាំងដឹកនាំចរិយាធម៌សង្គម ក្នុងការលុបបំបាត់អំពើហិង្សាសង្គម ។
សម្តេចព្រះព្រហ្មរតនមុនីក៏បានផ្តាំផ្ញើដល់អាជ្ញាធរគ្រប់ជាន់ថ្នាក់ ទាំងព្រះភិក្ខុសង្ឃសំខាន់ចៅអធិការ និង មន្ត្រីសង្ឃ ដែលទើបប្រកាសតែងតាំងនាពេលនេះ ដោយព្រះអង្គជាអ្នករម្ងាប់អធិករណ៍ និង សហការគ្រប់គ្រងគរុភណ្ឌសង្ឃ មានដីធ្លីវត្តអារាម និងអប់រំពុទ្ធសាសនិកជន ឲ្យរៀនសូធ្យបដិបត្តិធម៌ និង វិន័យមានបិដកជាគោលនិង រួមសាមគ្គីព្រះសង្ឃ ពុទ្ធបរិស័ទ តាមបណ្តាវត្តនានា ត្រូវធ្វើការអភិវឌ្ឍន៍ទីវត្ត និង បណ្តុះបណ្តាលធនធានមនុស្សទាំងផ្លូវពុទ្ធចក្រ និងអាណាចក្រ ពិសេសការពង្រីកនូវវិស័យពុទ្ធកៈសិក្សា និង អភិវឌ្ឍន៍ និង អភិរក្សនូវវប្បធម៌ ប្រពៃណីទំនៀមទំលាប់របស់ជាតិផងដែរ ។
គួរបញ្ជាក់ថា ករណីបិទវត្តពោធិ៍លង្កា (ពោធ៍លើ) និងបញ្ចប់តួនាទីចៅអធិការគ្រូ សូត្រឆ្វេងគ្រូសូត្រស្តាំបន្ទាប់ពីកើតជម្លោះមិនចេះចប់ ហើយឱ្យភិក្ខុ សាមណេរ លោកតា លោកយាយ ឧបាសក ឧបាសិកា ប្អូនៗ សិស្ស និស្សិត និងអ្នកដែលកំពុងស្នាក់នៅក្នុងវត្តពោធិ៍លង្កាទាំងអស់ឱ្យទៅគង់ និងស្នាក់នៅជាបណ្ដោះអាសន្នចំនួន១០វត្ត ក្នុងនោះ មួយវត្ត មានភិក្ខុ និងសាមណេរចំនួន១០អង្គ ។ ហើយវត្តពោធិ៍លង្កា (ពោធិ៍លើ) នេះ មានភិក្ខុ និងសាមណេរជាង១០០អង្គ និងតាអាចារ្យយាយីនិង ឧបាសក ឧបាសិកា ។
ចែករំលែកព័តមាននេះ