សម្ដេចតេជោ ហ៊ុន សែន អញ្ជើញទទួលព្រះមហាក្សត្រប្រ៊ុយណេ
រាជធានីភ្នំពេញ ៖ នៅរាត្រី ថ្ងៃចន្ទ ទី២៩ ខែមេសា ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែនប្រធានព្រឹទ្ធសភា…
រាជធានីភ្នំពេញ ៖ នៅរាត្រី ថ្ងៃចន្ទ ទី២៩ ខែមេសា ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែនប្រធានព្រឹទ្ធសភា នៃព្រះរាជាណាចក្រកម្ពុជា រួមដំណើរដោយ ឯកឧត្តម ហ៊ុន ម៉ានិត និងឯកឧត្តម ហ៊ុន ម៉ានី បានអញ្ជើញទទួលព្រះរាជដំណើររបស់ ព្រះចៅស៊ុលតង់ ហាជី ហាសិនណល់ ប៊ូលហ្កះ ព្រះមហាក្សត្រ នៃប្រទេសប្រ៊ុយណេ ដារូសាឡឹម ដែលអមដំណើរដោយព្រះរាជបុត្រា ម៉ាទីន យាងមកកាន់ព្រះរាជាណាចក្រកម្ពុជា ។
ការយាងរបស់ព្រះអង្គមកកាន់ព្រះរាជាណាចក្រកម្ពុជានាពេលនេះ គឺមិនមានពិធីផ្លូវការអ្វីនោះទេ គឺជាការនឹករលឹកគ្នាទៅវិញទៅមក និងដើម្បីសោយព្រះក្រយា នាព្រឹកថ្ងៃទី៣០ ខែមេសា ស្អែកនេះ ជាមួយសម្តេចតេជោ ហ៊ុន សែន និងមានវត្តមានកូនប្រុសទាំងបីរបស់សម្ដេចតេជោ នឹងចូលរួមផងដែរ ។
សម្តេចតេជោ នឹងអញ្ជើញទទួលព្រះរាជដំណើរព្រះមហាក្សត្រប្រុយណេ និងព្រះរាជបុត្រនៅព្រលានយន្តហោះដោយផ្ទាល់ និងរួមដំណើរទៅកាន់សណ្ឋាគារ ។
សម្តេចតេជោ បានបញ្ជាក់ថា ការអញ្ជើញទទួលព្រះរាជដំណើរដោយផ្ទាល់បែបនេះ មិនមានអ្វីចម្លែកនោះទេ ព្រោះកាលពីឆ្នាំ២០១១ ពេលសម្តេចអញ្ជើញទៅប្រុយណេ ព្រះអង្គបានយាងបើករថយន្តដោយអង្គឯងមកទទួលសម្តេចនៅព្រលានយន្តហោះ ហើយជូនទៅសណ្ឋាគារផងដែរ ។
សម្តេចតេជោ ហ៊ុន សែន ព្រះមហាក្សត្រប្រុយណេ និងលោក ថាក់ស៊ីន គឺជាអតីតមេដឹកនាំនៅក្នុងអាស៊ាន ដែលស្និទ្ធស្នាលនឹងគ្នាជាទីបំផុត។ ព្រះមហាក្សត្រប្រុយណេ ព្រះអង្គរាប់អានសម្តេចតេជោ ដូចប្អនពៅ (បងប្អូន៣នាក់ គឺព្រះអង្គជាបងទី១ លោក ថាក់ ស៉ីន ជាប្អូនទី២ សម្តេចតេជោ ជាប្អូនពៅ) ៕
ចែករំលែកព័តមាននេះ