កម្ដៅកើនដល់ ៤០អង្សាសេ អាជ្ញាធរខណ្ឌ៧មករា យករថយន្តបា.ញ់ទឹកស្រោចក្នុងបរិវេណសាលាបឋមសិក្សា
រាជធានីភ្នំពេញ ៖ នាវេលាម៉ោង១៣និង០០រសៀលថ្ងៃទី២៩ ខែមេសា ឆ្នាំ២០២៤ លោក ថេង សុថុល អភិបាល នៃគណៈអភិបាលខណ្ឌ៧មករា…
រាជធានីភ្នំពេញ ៖ នាវេលាម៉ោង១៣និង០០រសៀលថ្ងៃទី២៩ ខែមេសា ឆ្នាំ២០២៤ លោក ថេង សុថុល អភិបាល នៃគណៈអភិបាលខណ្ឌ៧មករា បានដឹកនាំមន្ត្រីដោយផ្ទាល់ ចុះបាញ់ទឹក ដើម្បីកាត់បន្ថយកម្ដៅ ដែលកើនឡើងដល់ ៤០អង្សាសេ ជូនដល់លោកគ្រូអ្នកគ្រូ ព្រមទាំងសិស្សានុសិស្ស សាលាបឋមសិក្សាបាក់ទូក និងសាលាបឋមសិក្សាវត្តព្រះពុទ្ធ ក្នុងខណ្ឌ៧មករា ។
បើតាមលោកអភិបាលរងខណ្ឌ៧មករា បានឱ្យដឹងថា អាជ្ញាធរបានចេញរថយន្តបាញ់ទឹកបាញ់ស្រោច នៅក្នុងបរិវេណសាលាបឋមសិក្សាទាំង ២ខាងលើនេះ ដោយសារ មានសិស្សសាលាតូចៗកំពុងតែសិក្សា ក្នុងពេលអាកាសធាតុកំពុងក្ដៅខ្លាំង ធ្វើឱ្យក្មេងៗពិបាកទ្រាំ ។ ហើយការបាញ់ទឹកស្រោចក្នុងសាលាបឋមសិក្សានេះ គឺអាជ្ញាធរ មើលជាក់ស្ដែង ដោយរយៈពេល ២ថ្ងៃ បាញ់ស្រោចម្ដង ឬបីថ្ងៃបាញ់ស្រោចម្ដង ។
លោក សុខ គឹមសួគ៌ នាយកសាលាបឋមសិក្សារបាក់ទូក បានលើកឡើងថា ក្នុងនាមនាយកសាលា បានណែនាំដល់កុមារាកុមារី ដែលជាសិស្សកំពុងតែសិក្សានៅសាលាបឋមសិក្សាឲ្យយកចិត្តទុកដាក់ថែសុខភាពជាពិសេសញាំទឹកឲ្យបានច្រើន ក្នុងរដូវកាលនេះ និងបានប្រាប់ទៅអាណាព្យាបាល ឲ្យយកចិត្តទុកដាក់ មើលថែសុខភាពដល់កូនៗ ជៀសវាងមានជំងឺឈឺស្កាត់ ។
លោកនាយកសាលា ក៏បានអរគុណដល់ លោក ថេង សុថុល អភិបាលខណ្ឌ៧មករា ដែលបានបញ្ចេញរថយន្តបាញ់ទឹក ស្រោចដល់សាលាបឋមសិក្សា ខណៈអាកាសធាតុ កំពុងក្ដៅខ្លាំង ៕
ចែករំលែកព័តមាននេះ