ខេត្តកំពត ៖ អធិការនគរបាលស្រុកទឹកឈូបាន​ឱ្យដឹងថា ​កាលពី​ម៉ោង៧និង១៥នាទីព្រឹកថ្ងៃទី២៩ ខែមេសា ឆ្នាំ២០២៤​ ប្រុសស្រី២នាក់បានស្លាប់បាត់បង់ជីវិត​ក្នុង​ករណីគ្រោះថ្នាក់ចរាចរណ៍មួយកើតឡើងរវាងរថយន្ត​បុកជាមួយ​ម៉ូតូ នៅលើកំណាត់ផ្លូវជាតិលេខ៣កំពត-ភ្នំពេញ ចន្លោះបង្គោលគីឡូម៉ែត្រលេខ១៣២, ១៣៣ នៅ​ចំណុចមុខអាហារដ្ឋានមាន់អាំងកំពត ស្ថិតនៅភូមិដំណាក់ហ្លួង ឃុំព្រៃថ្នង ស្រុកទឹកឈូ ខេត្តកំពត ក្នុងទិសដៅផ្ទុយគ្នា។

ជនរងគ្រោះទាំង២នាក់ដែលស្លាប់បាត់បង់ជីវិត ក្នុងនោះម្នាក់​ឈ្មោះ ទី មុន្នី ភេទប្រុស អាយុ២២ឆ្នាំ រស់នៅភូមិព្រិច សង្កាត់ រការក្រៅ ក្រុងដូនកែវ ខេត្តតាកែវ ជា​អ្នកបើកបរម៉ូតូ និងម្នាក់ទៀតជាអ្នករួមដំណើរ​ឈ្មោះ សល ស្រីនៀត ភេទ​ស្រី អាយុ២២ឆ្នាំ រស់នៅសង្កាត់រការក្រៅ ក្រុងដូនកែវ ខេត្តតាកែវ ។ ជនរងគ្រោះទាំង​​២នាក់ជិះម៉ូតូ​មួយគ្រឿង​ម៉ាកBEAT ពណ៌ស​លាយ​ក្រហម ពាក់ស្លាកលេខតាកែវ ១Y-៧០៧៣ ។​

ភាគីខាងរថយន្តម៉ាកHYUNDAI សណ្ដោងរ៉ឺម៉ក(ក្រឡុកស៊ីម៉ង់ត៌) ក្បាលពណ៌ស ពាក់ស្លាកលេខព្រៃវែង ៣A-១៥៦៦ រ៉ឺម៉កពណ៌ស ពាក់ស្លាកលេខ ភ្នំពេញ ៤A-០៤២៩ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់ ។​

តាមប្រភពព័ត៌មានបាន​ឱ្យ​ដឹងថា មុនពេលកើតហេតុ ជនរងគ្រោះទាំង២នាក់​ខាងលើជិះ​ម៉ូតូមួយគ្រឿង​ ​ធ្វើដំណើរ​​មកពីទិសខាងកើតទៅលិច លុះ​ដល់ចំណុចកើតហេតុបានបើកវ៉ាជែង បណ្ដាលឱ្យ​បុកប៉ះជាមួយរថយន្តដែលមានទិសដៅផ្ទុយគ្នា បណ្តាល​ឱ្យ​​ជនរងគ្រោះ​ទាំងពីរស្លាប់នៅនឹងកន្លែងកើតហេតុ ។ បន្ទាប់ពីកើតហេតុ អ្នកបើកបររថយន្តគេចខ្លួនបាត់ បន្សល់ទុករថយន្តនៅកន្លែងកើតហេតុមុនសមត្ថកិច្ចទៅដល់ ។

ក្រោយពេលកើតហេតុ កម្លាំងជំនាញចរាចរណ៍ផ្លូវគោកនៃអធិការដ្ឋាននគរបាលស្រុកទឹកឈូបានចុះពិនិត្យជាក់ស្ដែងនិងឆែកកាមេរ៉ាសុវត្ថិភាពនៅកន្លែងកើតហេតុ ឃើញថាអ្នកបើកម៉ូតូបាន​វ៉ាជែងរថយន្តដែលបើកពីមុខ ទៅបុកប៉ះនិងរថយន្ត១គ្រឿងទៀតដែលមានទិសដៅផ្ទុយគ្នាបណ្ដាលឱ្យស្លាប់ភ្លាមៗនៅនឹងកន្លែងកើតហេតុទាំង២នាក់តែម្ដង។

សមត្ថកិច្ចបានបញ្ជាក់ថា ករណីគ្រោះថ្នាក់នេះបណ្ដាលឱ្យមានមនុស្សស្លាប់២នាក់​និងខូចខាតសម្ភារ:​រួមមាន ម៉ូតូខូចខាតកម្រិតស្រាល០១គ្រឿង ​និង​រថយន្តខូចខាតកម្រិតស្រាល១គ្រឿង ។

​បច្ចុប្បន្ន សពជនរងគ្រោះទាំង២នាក់ ត្រូវបាន​សមត្ថកិច្ចប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ រីឯវត្ថុតាងត្រូវបានយកមករក្សាទុកនៅប៉ុស្តិ៍នគរបាលរដ្ឋបាលព្រៃថ្នងជាបណ្ដោះ​អាសន្ន ៕