ទីក្រុងញូដេលី៖ ប្រទេសអ៊ីរ៉ង់អនុញ្ញាតឱ្យនាវាដឹកឧស្ម័ន២គ្រឿងដែលដោតទង់ជាតិរបស់ឥណ្ឌាអាចបើកកាត់ច្រកសមុទ្រហ័រម៉ូស (Hormuz) ដោយសុវត្ថិភាព។ នេះបើយោងតាមប្រភពបួននាក់ដែលបានដឹងកិច្ចការផ្ទៃក្នុង។ បើដូច្នេះមែន វាជាករណីដ៏កម្រដែលអ៊ីរ៉ង់កំពុងតែបិទខ្ទប់ច្រកសមុទ្រនេះសុខៗ ប៉ុន្តែក៏មានករណីលើកលែងមួយៗផងដែរ។ រដ្ឋាភិបាលទីក្រុងតេអេរ៉ង់ទទួលស្គាល់ថាពិតមានកប៉ាល់ឥណ្ឌាបើកកាត់ច្រកសមុទ្រនោះមែន។
កប៉ាល់ដឹកហ្គាសរបស់ឥណ្ឌាឈ្មោះស៊ីវ៉ាលីក (Shivalik) បានបើកកាត់ច្រកសមុទ្រហ័រម៉ូសដោយមានកងទ័ពជើងទឹកឥណ្ឌាបើកអមដំណើរទៅជាមួយផង។ ចំណែកកប៉ាល់ទីពីរឈ្មោះណាន់ដា ទេវី (Nanda Devi) ត្រូវគេរំពឹងថានឹងបើកកាត់ទីនោះនាពេលបន្តិចទៀត។ ចាប់តាំងពីអាមេរិក និងអ៊ីស្រាអែលបើកយុទ្ធនាការប្រហារអ៊ីរ៉ង់កាលពីថ្ងៃទី២៨ ខែកុម្ភៈ អ៊ីរ៉ង់បានបិទខ្ទប់ច្រកសមុទ្រនេះមិនឱ្យកប៉ាល់ចេញចូលបានឡើយ។
អ៊ីរ៉ង់ប្រកាសថាខ្លួននឹងមិនអនុញ្ញាតឱ្យកប៉ាល់របស់អាមេរិក និងសម្ព័ន្ធមិត្តរបស់អាមេរិកចេញចូលតាមច្រកនេះទេ។ ក្រោយមក ប្រទេសឥណ្ឌាបានបោះដៃទៅអ៊ីរ៉ង់ដើម្បីស្នើសុំការអនុញ្ញាត។ នាយករដ្ឋមន្ត្រីឥណ្ឌា លោកម៉ូឌី ថ្លែងកាលពីថ្ងៃព្រហស្បតិ៍ថាលោកបានសន្ទនាគ្នាជាមួយប្រធានាធិបតីអ៊ីរ៉ង់ លោកម៉ាស៊ុត ប៉េហ្សេស្គាន ដើម្បីពិភាក្សាគ្នាអំពីការអនុញ្ញាតឱ្យឥណ្ឌាដឹកទំនិញ និងថាមពលចេញពីតំបន់ឈូងសមុទ្រ។
ឥណ្ឌាក៏បានធ្វើសេចក្ដីល្អចំពោះអ៊ីរ៉ង់ផងដែរ និងបានជួយសម្រួលការស្នាក់នៅរបស់នាវិកជនជាតិអ៊ីរ៉ង់១៨៣នាក់ដែលចតកប៉ាល់នៅកំពង់ផែឥណ្ឌាចាប់តាំងពីសង្គ្រាមអ៊ីរ៉ង់ផ្ទុះឡើងដំបូង។ នោះជាកប៉ាល់ដែលចូលរួមធ្វើសមយុទ្ធយោធានៅប្រទេសឥណ្ឌា។ នៅក្នុងចំណោមនោះ កប៉ាល់អ៊ីរ៉ង់មួយគ្រឿងត្រូវយោធាអាមេរិកបាញ់ឆេះនៅលើដែនសមុទ្រប្រទេសសិរីលង្កា។ ប្រទេសឥណ្ឌាកំពុងជួបនឹងវិបត្តិខ្វះខាតហ្គាសធ្ងន់ធ្ងរជាងពេលណាៗទាំងអស់។ រដ្ឋាភិបាលសុខចិត្តកាត់បន្ថយការផ្គត់ផ្គង់ទៅឱ្យរោងចក្រនានាដើម្បីបម្រុងទុកឱ្យប្រជាជនប្រើប្រាស់ក្នុងការចម្អិនអាហារ៕ ប្រភព៖ ឆនណល ញូស៍ អេស៊ា (Channel News Asia) និងប្រភពដទៃទៀត
ចែករំលែកព័តមាននេះ