ខេត្តប៉ៃលិន ៖ គេសង្កេតឃើញប្រជាពលរដ្ឋក្រីក្រមួយគ្រួសារ រស់នៅក្នុងភូមិអូរខ្ទីង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន កំពុងប្រឈមនឹងការខ្វះខាតជីវភាពខ្លាំង ដោយរកព្រឹកខ្វះល្ងាច ប្តីជាកម្មករ ដើរស៊ីឈ្នួលកាច់ពោត និងដកដំឡូងមីនៅតាមចំការ ដើម្បីយកថវិកាទិញម្ហូបអាហារសម្រាប់ផ្គត់ផ្គង់ជីវភាពប្រចាំថ្ងៃ ខណៈដែលប្រពន្ធមានជំងឺប្រចាំកាយ (បញ្ហាប្រមាត់ ក្រពះ ពោះវៀន) មិនអាចជួយធ្វើការអ្វីបាន ដោយមើលថែកូន៤នាក់ នៅផ្ទះ ក្នុងបន្ទុក ។
បើតាមការរៀបរាប់ពីបុរសម្នាក់ឈ្មោះ សុខ ឆេន អាយុ៣០ឆ្នាំ បានឱ្យភ្នាក់ងារកោះសន្តិភាពដឹងថា ប្រពន្ធរបស់លោកមាន ឈ្មោះ ចាន់ គន្ធា មានកូន៤នាក់ កូនទី១. ឈន ស្រីធូ ភេទស្រី អាយុ១២ឆ្នាំ រៀនថ្នាក់ទី៦ ទី២. ឈ្មោះ ឈន វណ្ណឈីន ភេទប្រុស អាយុ៦ឆ្នាំ រៀនថ្នាក់ទី១ ទី៣. ឈ្មោះ ឈន រស្មី ភេទស្រី អាយុ៤ឆ្នាំ ទី៤. ឈន ណារី ភេទស្រី អាយុ១ឆ្នាំ៥ខែ ។
ប្រភពបន្តទៀតថា ជារៀងរាល់ថ្ងៃ បុរសជាប្តី តែងតែចេញពីផ្ទះទៅស៊ីឈ្នួលធ្វើការឱ្យគេ តាំងពីព្រឹករហូតដល់ពេលល្ងាច ដោយទទួលបានថវិកា ចាប់ពី២៥,០០០ ទៅ៣០,០០០រៀល។ ហើយរាល់ថ្ងៃ ពិតជាជួបនឹងការលំបាកវេទនាខ្លាំង ស្ទើរតែរកមិនទាន់មាត់នោះឡើយ ដោយលោកមិនអាចរកថវិកាផ្គត់ផ្គង់ជីវភាពក្រុមគ្រួសារហូបចុកឱ្យគ្រប់គ្រាន់ដូចគេនោះទេ ជួនកាលបានហូបបាយពេលព្រឹក និងហូបបបរពេលល្ងាច។ លើសពីនេះ ប្រពន្ធរបស់លោក តែងតែមានជំងឺរីងរៃប្រចាំកាយ ចូលពេទ្យជាញឹកញាប់ និងខ្វះថវិកាឱ្យពេទ្យថែមទៀត ។
លោកបញ្ជាក់ថា លើសពីនេះ ដោយសារតែបច្ចុប្បន្ន ការចេញទៅស៊ីឈ្នួលឱ្យគេជួបបញ្ហាប្រឈមជាច្រើន ដូចជាអាកាសធាតុក្តៅខ្លាំង ទ្រាំទ្រស្ទើរមិនបាន ដោយជួនកាលពេលត្រឡប់ទៅផ្ទះវិញ កើតខ្យល់ ជាញឹកញាប់។ តែដើម្បីជីវភាពក្រុមគ្រួសារ លោកខិតខំធ្វើការទាំងឈឺទាំងជា រហូតដល់ជួនកាលវិលមុខខ្លាំង មិនអាចចេញទៅឆ្ងាយបាន ក៏ដេកសម្រាកនៅផ្ទះ ១ថ្ងៃ ដោយសុំអង្ករអ្នកជិតខាងដើម្បីយកមកដាំបបរហូបជួបជុំគ្រួសារ ។
ទោះបីជាយ៉ាងណា សព្វថ្ងៃលោក មានដីត្រឹមតែ១បាតផ្ទះ និងមានផ្ទះសម្បែងផ្ទាល់ខ្លួន ត្រូវបានឪពុកចែកជូន បើសិនជាជួលផ្ទះគេស្នាក់នៅវិញ គឺកាន់តែលំបាកខ្លាំងថែមទៀតផងដែរ។ ហើយដោយសារស្ថិតនៅក្នុងជីវភាពខ្វះខាត មើលទៅកូនៗ របស់លោក នឹងមិនអាចឱ្យរៀនរហូតដល់ចប់ថ្នាក់ខ្ពស់បានទេ គឺនឹងឱ្យឈប់រៀនក្រោយពីចប់ថ្នាក់បឋមសិក្សានៅក្បែរផ្ទះ ដើម្បីជួយចេញទៅធ្វើការរកថវិកាផ្គត់ផ្គង់ក្រុមគ្រួសារ ៕
ចែករំលែកព័តមាននេះ