រាជធានីភ្នំពេញ ៖ ជនសង្ស័យជាកម្មកររោងចក្រម្នាក់ បានខ្ចីម៉ូតូបុរសជាអ្នកដឹកជញ្ជូនអីវាន់ម្នាក់ទៀត ដែលជាអ្នកស្គាល់គ្នាជិះ ដោយប្រាប់ម្ចាស់ម៉ូតូថា ទៅរកទិញអាហារហូបតែមួយភ្លែតទេ លុះបានដល់ដៃក៏ជិះយកទៅបាត់ជាង១ខែ ។ ក្រោយមក…
រាជធានីភ្នំពេញ ៖ ជនសង្ស័យជាកម្មកររោងចក្រម្នាក់ បានខ្ចីម៉ូតូបុរសជាអ្នកដឹកជញ្ជូនអីវាន់ម្នាក់ទៀត ដែលជាអ្នកស្គាល់គ្នាជិះ ដោយប្រាប់ម្ចាស់ម៉ូតូថា ទៅរកទិញអាហារហូបតែមួយភ្លែតទេ លុះបានដល់ដៃក៏ជិះយកទៅបាត់ជាង១ខែ ។ ក្រោយមក មានអ្នកស្គាល់បានប្រទះឃើញជនសង្ស័យខាងលើ កំពុងស្នាក់នៅបន្ទប់ជួលមួយកន្លែង ក៏បានទៅប្រាប់ម្ចាស់ម៉ូតូ និងជូនទៅធ្វើការឃាត់ខ្លួនជននោះបានទាំងយប់ រួចប្រគល់ឲ្យនគរបាល នាំយកទៅសាកសួរ និងកសាងសំណុំរឿងចាត់ការតាមច្បាប់តែម្ដង ។
ហេតុការណ៍រំលោភលើទំនុកចិត្តខាងលើនោះ បានកើតឡើងតាំងពីវេលាម៉ោង០១ និង២០នាទីយប់រំលងអធ្រាត្រឈានចូលថ្ងៃទី១៥ ខែកុម្ភៈ ឆ្នាំ២០២៦ មកម្ល៉េះ ស្ថិតនៅតាមផ្លូវបេតុង ក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ បើគិតរហូតមកដល់ថ្ងៃឃាត់ខ្លួនជនសង្ស័យរូបនោះ បានមានរយៈពេលជាង១ខែហើយ ។
បុរសជាជនសង្ស័យខាងលើ ឈ្មោះ សួន ដារ៉ា អាយុ២០ឆ្នាំ មុខរបរកម្មកររោងចក្រ ស្នាក់នៅបន្ទប់ជួលជាន់ទី៣ ស្ថិតនៅក្នុងភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ
(ឃាត់ខ្លួនថ្ងៃទី២៧ ខែមីនា ឆ្នាំ២០២៦ វេលាម៉ោង២៣ និង៣០នាទីយប់) ។ ដោយឡែក បុរសដែលជាម្ចាស់ម៉ូតូឈ្មោះ យ៉ា សុខហេង អាយុ២៩ឆ្នាំ ជនជាតិខ្មែរ មុខរបរដឹកជញ្ជូន ស្នាក់នៅផ្ទះជួលក្នុងភូមិព្រៃកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ។
នគរបាលបានប្រាប់ឲ្យដឹងថា កាលពីវេលាម៉ោង០១និង២០នាទីយប់រំលងអធ្រាត្រឈានចូលថ្ងៃទី១៥ ខែកុម្ភៈ ឆ្នាំ២០២៦ ជនរងគ្រោះបានជិះម៉ូតូ១គ្រឿង ម៉ាកហុងដាស្តូពីសេ១១០ ពណ៌ខ្មៅ ផលិតឆ្នាំ២០២៥ ពាក់ស្លាកលេខ ភ្នំពេញ1LS-8625 លេខ តួ+ លេខម៉ាស៊ីន8178721 ទៅលេងបន្ទប់ជួលបងប្អូនជីដូនមួយនៅក្រោយផ្សារព្រៃទា ។ ក្រោយពេលអង្គុយលេងបានមួយសន្ទុះ ក៏បានជិះម៉ូតូខាងលើចេញទៅមើលគេលេងបាល់ទះ នៅក្បែរផ្សារព្រៃទាបន្តិច ទើបជិះម៉ូតូចេញទៅផ្ទះវិញ ហើយបានជួបជនសង្ស័យជាអ្នកស្គាល់គ្នានៅតាមផ្លូវ ពេលនោះ ជនសង្ស័យបានពឹងឲ្យជួយឌុបជូនទៅផ្ទះ នៅម្តុំបុរីសែនមនោរម្យ ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
នគរបាលបានប្រាប់ឲ្យដឹងបន្តទៀតថា លុះពេលទៅដល់ ជនសង្ស័យបានធ្វើជាដើរចុះដើរឡើង រួចក៏បានឲ្យជនរងគ្រោះជួយឌុបជូនត្រលប់ទៅផ្សារព្រៃទាវិញ ហើយពេលទៅដល់ផ្លូវបេតុងក្រោយផ្សារព្រៃទា ស្ថិតក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ជនសង្ស័យរូបនោះបានសុំខ្ចីម៉ូតូរបស់ជនរងគ្រោះជិះ ដោយប្រាប់ថា ទៅរកទិញអាហារហូបមួយភ្លែត ។
ខណៈនោះ ជនរងគ្រោះក៏បានព្រមឲ្យខ្ចីជិះ បន្ទាប់មកជននោះ ក៏ជិះយកទៅបាត់រហូតតែម្ដង តែជនរងគ្រោះមិនបានដាក់ពាក្យប្ដឹងភ្លាមៗនោះទេ គឺបានទុកពេល៣ថ្ងៃដើម្បីឲ្យជនសង្ស័យយកម៉ូតូមកឲ្យវិញ ប៉ុន្តែជននោះមិនព្រមយកឲ្យវិញឡើយ ទើបជនរងគ្រោះទៅដាក់ពាក្យបណ្ដឹងនៅប៉ុស្តិនគរបាលរដ្ឋបាលចោមចៅទី៣ ឲ្យជួយអន្តរាគមន៍ ។
នគរបាលបានបញ្ជាក់ប្រាប់ឲ្យដឹងបន្តទៀតថា រហូតដល់ថ្ងៃទី២៧ ខែមីនា ឆ្នាំ២០២៦ វេលាម៉ោង២១និង០០នាទីយប់ មានអ្នកស្គាល់គ្នាប្រាប់ថា បានប្រទះឃើញជនសង្ស័យកំពុងស្នាក់នៅផ្ទះជួលជាន់ទី៣ ភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ ហើយជនរងគ្រោះក៏បានទៅធ្វើការឃាត់ខ្លួនជនសង្ស័យរួចប្រគល់ឲ្យនគរបានប៉ុស្តិ៍ចោមចៅទី៣ចាត់ការតាមច្បាប់តែម្ដង ។
ក្រោយពេលនគរបាលសាកសួរ ជនសង្ស័យរូបនោះបានសារភាពថា ខ្លួនពិតជាបានធ្វើសកម្មភាពបោកយកម៉ូតូរបស់ជនរងគ្រោះខាងលើនោះមែន ប៉ុន្តែក្រោយមក មានក៏មិត្តភក្ដិម្នាក់ទៀតបានខ្ចីម៉ូតូនោះជិះរួចក៏ស៊ីដាច់បន្តទៀតបាត់ហើយ ៕
ចែករំលែកព័តមាននេះ