ខេត្តបាត់ដំបង ៖ ជារឿងអកុសល អ្នកបើកគ្រឿងចក្រ (អេស្កាវ៉ាទ័រ)ម្នាក់ ពេលអោនកាច់ទំពាំង ត្រូវគ្រឿងចក្ររបស់ខ្លួនរេប្រម៉ោយទៅកៀបជាប់ បណ្ដាលឲ្យស្លាប់ភ្លាមៗ កាលពីវេលាម៉ោង១១ថ្ងៃត្រង់ថ្ងៃទី២៧ មិនា…
ខេត្តបាត់ដំបង ៖ ជារឿងអកុសល អ្នកបើកគ្រឿងចក្រ (អេស្កាវ៉ាទ័រ)ម្នាក់ ពេលអោនកាច់ទំពាំង ត្រូវគ្រឿងចក្ររបស់ខ្លួនរេប្រម៉ោយទៅកៀបជាប់ បណ្ដាលឲ្យស្លាប់ភ្លាមៗ កាលពីវេលាម៉ោង១១ថ្ងៃត្រង់ថ្ងៃទី២៧ មិនា នេះ ស្ថិតត្រង់ចំណុចភូមិទូលពោធិ៍ ឃុំសំឡូត ស្រុកសំឡូត ខណៈដែលជនរងគ្រោះទៅស៊ីឈ្នូលកាយគុម្ពឬស្សីឲ្យគេ ។
មន្ត្រីមូលដ្ឋានបានរាយការណ៍ថា ជនរងគ្រោះឈ្មោះ រ៉េត រូន ភេទប្រុស អាយុ៤០ឆ្នាំ ជាអ្នកបើកគ្រឿងចក្រ រស់នៅស្រុកបវេល ។ គាត់បានស៊ីឈ្នូលកាយគុម្ពប្ញស្សីឲ្យគេនៅចំណុចកើតហេតុ ។ ពេលដែលកំពុងកាយគុម្ពឬស្សី គាត់បានប្រទះឃើញទំពាំង ហើយក៏ឈប់គ្រឿងចក្រអោនកាច់ទំពាំង តែចៃដន្យជើងម្ខាងប៉ះចំចង្កូតគ្រឿងចក្រ ធ្វើឲ្យប្រម៉ោយរេគៀបគាត់ជាប់នឹងគ្រឿងចក្របណ្ដាលឲ្យគាត់ស្លាប់តែម្ដង។ សាក្សីក៏បាននិយាយបែបនេះដែរ។
ក្មួយជនរងគ្រោះដែលទៅជាមួយបាននិយាយថា ពូរបស់ខ្លួនបានកាយគុម្ពឬស្សីក្នុងចម្ការ ហើយពេលកាយគាត់ឃើញទំពាំង ក៏ឈប់គ្រឿងចក្រ គាត់អោនលូកដៃកាច់ ពេលនោះចៃដន្យជើងរបស់គាត់ ក៏ប៉ះចំចង្គឹះលេខបញ្ជាដៃគ្រឿងចក្រ ធ្វើឲ្យគ្រឿងចក្រវិលមកគៀបគាត់ជាប់ស្លាប់ភ្លាមៗតែម្ដង ។ នេះជារឿងចៃដន្យទេ។
ក្រោយពីទទួលបានព័ត៌មាននេះ សមត្ថកិច្ចក៏បានចុះទៅកន្លែងកើតហេតុ ដើម្បីពិនិត្យ។ សមត្ថកិច្ចបាននិយាយថា ជនរងគ្រោះត្រូវដៃគ្រឿងចក្រវិលទៅគៀបជាប់និងតួ ទើបមិនអាចរើរួច រហូតដល់ស្លាប់ ដោយមិនអាចជួយសង្គ្រោះបានឡើយ ។ នេះជាការធ្វេសប្រហែសពេលបំពេញការងារ ក្រោយពិនិត្យ សមត្ថកិច្ចបានធ្វើកំណត់ហេតុប្រគល់សពជនរងគ្រោះឲ្យទៅក្រុមគ្រួសារធ្វើបុណ្យតាមប្រពៃណ៏ហើយ ៕
ចែករំលែកព័តមាននេះ