ខេត្តបន្ទាយមានជ័យ ៖ ស្នូរផ្ទុះអាវុធជាង១០គ្រាប់ នៅពេលជនជាតិបរទេសសម្រុកចេញពីអគារបង្ក្រាបអនឡាញស្កេម កាលពីវេលាម៉ោង៣ និង៣០នាទីរសៀលថ្ងៃទី២២ ខែមេសា ឆ្នាំ២០២៦ ស្ថិតនៅក្បែរសាច់អាំងកំពង់ចាម ក្នុងភូមិក្បាលស្ពានមួយ…
ខេត្តបន្ទាយមានជ័យ ៖ ស្នូរផ្ទុះអាវុធជាង១០គ្រាប់ នៅពេលជនជាតិបរទេសសម្រុកចេញពីអគារបង្ក្រាបអនឡាញស្កេម កាលពីវេលាម៉ោង៣ និង៣០នាទីរសៀលថ្ងៃទី២២ ខែមេសា ឆ្នាំ២០២៦ ស្ថិតនៅក្បែរសាច់អាំងកំពង់ចាម ក្នុងភូមិក្បាលស្ពានមួយ សង្កាត់អូរជ្រៅ ក្រុងប៉ោយប៉ែត ។
ប្រតិបត្តិការបង្ក្រាប គឺមានការដឹកនាំដោយលោក ហែម សុវត្ថិ អគ្គស្នងការរងនគរបាលជាតិ, លោក ប្រាក់ ប៉ូលី អភិបាលរងខេត្តបន្ទាយមានជ័យ និងលោកឧត្តមសេនីយ៍ត្រី សឿម សារិទ្ធ ស្នងការនគរបាលខេត្តបន្ទាយមានជ័យ និងព្រះរាជអាជ្ញារងអមសាលាដំបូងខេត្តបន្ទាយមានជ័យ បានសម្របសម្រួលកម្លាំងចម្រុះមានកម្លាំងអគ្គស្នងការនគរបាលជាតិ សហការជាមួយកម្លាំងស្នងការដ្ឋាននគរបាលខេត្តបន្ទាយមានជ័យផងដែរ ។
ប្រតិបត្តិការបង្ក្រាបអគារអនឡាញស្កេមចំនួន២កន្លែង ក៏បានឡោមព័ទ្ធជនជាតិបរទេសជិត៤០០នាក់ ក្នុងនោះអគារអនឡាញស្កេមចំនួន១៦ជាន់ផ្ទាល់ដី មានជនបរទេសដែលជាប់នៅជាន់លើ បានទំលាក់ចានបង្គន់ធ្លាក់ពីអគារចំរថយន្ត ហើយជនជាតិបរទេសបានបុករបងទ្វារចេញហើយកម្លាំងបានបាញ់ឡើងលើជាង១០គ្រាប់គំរាម និងរារាំងឃើញរត់ចេញបានខ្លះ ។
កម្លាំងចម្រុះបង្ក្រាបអនឡាញស្កេមបានឃាត់ខ្លួនជនបរទេសជិត៤០០នាក់ កំពុងអនុវត្តតាមនីតិវិធី ហើយត្រៀមរថយន្ត១២កៅអីជាង១០គ្រឿង ដើម្បីដឹកជនបរទេសបណ្តេញចេញពីប្រទេសកម្ពុជា ។
ដោយឡែក ជនបរទេសដែលពាក់ព័ទ្ធបទល្មើស ត្រូវបានបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីរៀបចំនីតិវិធីបញ្ជូនទៅសាលាដំបូងខេត្តបន្ទាយមានជ័យ ៕
ចែករំលែកព័តមាននេះ