រាជធានីភ្នំពេញ ៖ ក្រសួងធនធានទឹក និងឧតុនិយម បានបញ្ជាក់ថា រដូវវស្សាអាចនឹងចាប់ផ្តើមនៅក្នុងសប្តាហ៍ទី១ នៃខែឧសភា ឆ្នាំ២០២៦ ដែលលឿនជាងឆ្នាំ២០២៥ ។…
រាជធានីភ្នំពេញ ៖ ក្រសួងធនធានទឹក និងឧតុនិយម បានបញ្ជាក់ថា រដូវវស្សាអាចនឹងចាប់ផ្តើមនៅក្នុងសប្តាហ៍ទី១ នៃខែឧសភា ឆ្នាំ២០២៦ ដែលលឿនជាងឆ្នាំ២០២៥ ។
យោងតាមសេចក្តីជូនដំណឹងស្តីពីការព្យាករអាកាសធាតុ លើកទី១ សម្រាប់រដូវវស្សា ចាប់ពីខែឧសភា ដល់ខែតុលា ឆ្នាំ២០២៦ របស់ក្រសួងធនធានទឹក និងឧតុនិយម នៅថ្ងៃទី២២ មេសា ឆ្នាំ២០២៦ បានលើកឡើងអំពីស្ថានភាពអាកាសធាតុនៅក្នុងរដូវវស្សាឆ្នាំ២០២៦ ថា បាតុភូតសកល យោងទៅលើការព្យាករស្តីពីស្ថានភាពវិវត្តន៍នៃសីតុណ្ហភាពនៅលើផ្ទៃមហាសមុទ្រប៉ាស៊ីហ្វិកខាងលិច មហាសមុទ្រឥណ្ឌា និងតំបន់អេក្វាទ័របង្ហាញឱ្យឃើញថា បាតុភូតអែនសូអព្យាក្រឹត (ENSO-Neutral) នៅបន្តកើតឡើងក្នុងកម្រិត ៨០% រហូតដល់ខែមិថុនា និងថយមកនៅត្រឹម៤០% នៅក្នុងខែកក្កដា ឆ្នាំ២០២៦ ។ ដោយឡែក ចាប់ពីខែសីហា រហូតដល់ខែធ្នូ បាតុភូតអែលនីញ៉ូ (El Niño) នឹងកើនដល់កម្រិត៩០% ។
ក្រសួងថាបាតុភូត អាយ អូ ឌី (IOD) ដែលស្ថិតនៅមហាសមុទ្រឥណ្ឌា ស្ថិតនៅអព្យាក្រឹត (IOD-Neutral) រហូតដល់ខែតុលា ឆ្នាំ២០២៦ ។ ស្ថានភាពបែបនេះ នឹងធ្វើឱ្យរដូវវស្សា ឆ្នាំ២០២៦ រដូវវស្សាអាចនឹងចាប់ផ្តើមនៅក្នុងសប្តាហ៍ទី១ នៃខែឧសភា ឆ្នាំ២០២៦ ដែលលឿនជាងឆ្នាំ ២០២៥ ។ សីតុណ្ហភាពមធ្យមអប្បបរមា ២៥°C និងមធ្យមអតិបរមា ៣៦°C ដែលទាបជាងសីតុណ្ហភាពមធ្យម ភាគច្រើនឆ្នាំ និងមានលក្ខណៈដូចឆ្នាំ២០២៥ ។
ក្រសួងថា ដើមរដូវវស្សាសីតុណ្ហភាពមធ្យមអប្បបរមា និងមធ្យមអតិបរមា ទាបជាងមធ្យមភាគច្រើនឆ្នាំ ។ បរិមាណទឹកភ្លៀងនៅខែឧសភា ដល់ខែមិថុនា មានកម្ពស់ខ្ពស់ជាងមធ្យមភាគច្រើនឆ្នាំ និងបរិមាណទឹកភ្លៀងមានពីមធ្យមទៅច្រើន ។ បាតុភូតផ្គរ រន្ទះ និងខ្យល់កន្ត្រាក់អាចកើតឡើងច្រើន ។ នៅពាក់កណ្តាលរដូវវស្សា មានសីតុណ្ហភាពមធ្យមអប្បបរមា និងមធ្យមអតិបរមា ទាបជាងមធ្យមភាគច្រើនឆ្នាំ ។ បរិមាណទឹកភ្លៀងវិញ នៅខែកក្កដា ដល់ខែសីហា មានកម្ពស់ខ្ពស់ជាងមធ្យមភាគច្រើនឆ្នាំ និងបរិមាណទឹកភ្លៀងមានពីមធ្យមទៅច្រើន ។ ជាមួយគ្នានេះដែរ កូនរដូវប្រាំងអាចនឹងកើតមាននៅក្នុងសប្តាហ៍ទី២ និងចប់ទៅវិញនៅពាក់កណ្តាលសប្តាហ៍ទី៣ នៃខែសីហា ដដែល ។
ក្រសួងថា ចុងរដូវវស្សា សីតុណ្ហភាពមធ្យមអប្បបរមា និងមធ្យមអតិបរមា ទាបជាងមធ្យមភាគច្រើនឆ្នាំ ។ បរិមាណទឹកភ្លៀងនៅខែកញ្ញា ដល់ខែតុលា មានកម្ពស់ខ្ពស់ជាង ឫប្រហាក់ប្រហែលនឹងមធ្យម ភាគច្រើនឆ្នាំ និងបរិមាណទឹកភ្លៀងមានពីច្រើនទៅមធ្យម។
ក្រសួងសេចក្តីសន្និដ្ឋាន យោងតាមការព្យាករណ៍អាកាសធាតុសម្រាប់រដូវវស្សា ឆ្នាំ២០២៦ សីតុណ្ហភាពមធ្យមអប្បបរមា ២៥°C និងមធ្យមអតិបរមា ៣៦°C ដែលទាបជាងសីតុណ្ហភាពមធ្យមភាគច្រើនឆ្នាំ និងមានលក្ខណៈប្រហាក់ប្រហែលនឹង ឆ្នាំ២០២៥ ។ បរិមាណទឹកភ្លៀងខ្ពស់ជាងមធ្យមភាគច្រើនឆ្នាំ ជាមួយនឹងរបាយទឹកភ្លៀងធ្លាក់រាយប៉ាយបានល្អដូច ឆ្នាំ២០២៥ ។ បាតុភូតផ្គរ រន្ទះ និងខ្យល់កន្ត្រាក់អាចកើតឡើងច្រើន ។ រីឯកូនរដូវប្រាំងអាចនឹងកើតមាននៅ ក្នុងសប្តាហ៍ទី២ នៃខែសីហា និងចប់ទៅវិញនៅពាក់កណ្តាលសប្តាទី៣ នៃខែសីហាដដែល ។
ក្រសួងធនធានទឹក និងឧតុនិយម សូមជូនដំណឹងដល់ស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋសូមយកចិត្តទុកដាក់ និងប្រុងប្រយ័ត្នខ្ពស់ចំពោះអាកាសធាតុ ដែលមានបាតុភូតផ្គរ រន្ទះ និងខ្យល់កន្ត្រាក់ ដែលអាចកើតមានច្រើន នៅក្នុងឆ្នាំ២០២៦ ៕
ចែករំលែកព័តមាននេះ