ខេត្តបាត់ដំបង ៖ ជនសង្ស័យដែលគាស់ផ្ទះទ្វារផ្ទះចូលលួចខ្សែភ្លើង និងខ្វេះស៊ីគ្រឿងក្នុងម៉ាស៊ីនត្រជាក់អស់ប្រហែល១០គ្រឿងនៅក្នុងផ្ទះទុកចោលមួយកន្លែងនៅចំកណ្ដាលក្រុងបាត់ដំបង ពេលនេះ ត្រូវកម្លាំងនគរបាលក្រុងបាត់ដំបង ធ្វើការស្រាវជ្រាវឃាត់ខ្លួនបានហើយ កាលពីល្ងាចថ្ងៃទី២២ មេសា ពេលជននេះ…
ខេត្តបាត់ដំបង ៖ ជនសង្ស័យដែលគាស់ផ្ទះទ្វារផ្ទះចូលលួចខ្សែភ្លើង និងខ្វេះស៊ីគ្រឿងក្នុងម៉ាស៊ីនត្រជាក់អស់ប្រហែល១០គ្រឿងនៅក្នុងផ្ទះទុកចោលមួយកន្លែងនៅចំកណ្ដាលក្រុងបាត់ដំបង ពេលនេះ ត្រូវកម្លាំងនគរបាលក្រុងបាត់ដំបង ធ្វើការស្រាវជ្រាវឃាត់ខ្លួនបានហើយ កាលពីល្ងាចថ្ងៃទី២២ មេសា ពេលជននេះ កំពុងសំងំនៅក្នុងផ្ទះ ដែលស្ថិតនៅភូមិទូលតាឯក ក្រុងបាត់ដំបង ។ ជនសង្ស័យដៃស្អិតម្នាក់នេះ មានឈ្មោះ រិន ភា ភេទប្រុស អាយុ២៩ឆ្នាំ ។ សូមរំលឹកថា ៖ លោកចោរថ្លើមធំ គាស់ផ្ទះ០២លើកផ្ទួនៗចូលលួចកាត់ខ្សែភ្លើង និងស៊ីគ្រឿងក្នុងម៉ាស៊ីត្រជាក់អស់១០គ្រឿង ខណៈម្ចាស់មិននៅ
តាមរយៈរបាយការណ៍អធិការក្រុងបាត់ដំបង លោក ពេជ្រ សារ៉ែន បានឲ្យដឹងថា បើតាមចម្លើយសារភាពបឋមនៅចំពោះមុខសមត្ថកិច្ច ជនសង្ស័យម្នាក់នេះ បានអះអអាងថា ខ្លួនបានធ្វើសកម្មភាពគាស់ផ្ទះចូលលួចទ្រព្យសម្បត្តិគេតែម្នាក់ឯងទេ ។លោកអធិការបានបញ្ជាក់ថា ជននេះ បានលួចកាត់យកខ្សែភ្លើង កាត់យកទុយោស្ពាន់ម៉ាស៊ីនត្រជាក់ និងគាស់កម្ទេចធុងម៉ាស៊ីនត្រជាក់ខ្វេះយកគ្រឿងក្នុងដែលមានតម្លៃយកទៅលក់អេតចាយ ប៉ុន្តែពេលនេះមន្ត្រីជំនាញ បាននិងកំពុងស្រាវជ្រាវរកមុខអ្នកទិញបន្តទៀត ។
យោងលើព្រឹត្តហេតុជាក់ស្ដែង ដែលជនរងគ្រោះឈ្មោះ ទិត វណ្ណៈ បានអះអាងថា គឺជនសង្ស័យម្នាក់នេះ បានធ្វើសកម្មភាពគាស់ទម្លុះទម្លាយផ្ទះម្ដាយមីងរបស់គាត់ចំនួន០២លើកផ្ទូនៗចូលលួចយកទ្រព្យសម្បត្តិ ។ គាត់និយាយថា លើកទី១ គាត់មិនបានដឹងពេលវេលា ដែលចោរចូលលុកលុយក្នុងផ្ទះទេ តែបានដឹង នៅព្រឹកថ្ងៃទី ២១ មេសា ។ នៅលើកទី២ គឺជននេះ អាចធ្វើសកម្មភាពនៅយប់ថ្ងៃទី២១ ឬឆ្លងចូលថ្ងៃទី២២ មេសា លុះព្រឹកឡើងទើបគាត់ដឹង នៅពេលគាត់ទៅមើលផ្ទះដូចធម្មតា ។
តាមការស្រង់ចម្លើយជនសង្ស័យ ឈ្មោះ រិន ភា បានសារភាពនៅចំពោះមុខសមត្ថកិច្ចថា ខ្លួនពិតជាបានគាស់ទម្លុះទម្លាយផ្ទះថ្មដ៏ធំនោះ ចូលលួចសម្ភារមែន ។ លើកទី១ នៅថ្ងៃទី ១៨ មេសា កាត់របង និងគាស់ទ្វារចូលតាមទ្វារក្រោយ ហើយលើកទី២ នៅយប់ថ្ងៃទី ២១ មេសា ខ្លួនបានតោងឡើងតាមដើមឈើនៅខាងមុខផ្ទះ ។
លុះឡើងដល់ជាន់លើក៏គាស់ទម្លុះទម្លាយទ្វារកញ្ចក់ចូលលួចកាត់យកខ្សែភ្លើង និងទុយោស្ពាន់ម៉ាស៊ីនត្រជាក់ តែមិនដឹងចំនួនទេ ។ ក្មួយប្រុសម្ចាស់ផ្ទះ ឈ្មោះ ទិត វណ្ណៈ ដែលទទួលរ៉ាប់រងមើលថែផ្ទះម្ដាយមីងខាងលើនេះ បាននិយាយកាលពីម្សិលមិញថា ចោរបានគាស់ទម្លុះទម្លាយផ្ទះម្ដាយមីងចូលលួចសម្ភារចំនួន០២លើកផ្ទូន ។ សម្ភារដែលចោរបានលួចមាន៖ «ខ្សែភ្លើង និងទុយោស្បាន់ម៉ាស៊ីនត្រជាក់» ។
លោក ទិត វណ្ណៈ បានបញ្ជាក់ថា បើពិនិត្យជាក់ស្ដែង ជនដៃដល់បានគាស់កម្ទេចធុងម៉ាស៊ីនត្រជាក់កាត់យកទុយោស្ពាន់អស់ប្រមាណ១០គ្រឿង ធ្វើឲ្យខូចខាតទាំងស្រុងតែម្ដង ៕
ចែករំលែកព័តមាននេះ