ខេត្តបាត់ដំបង ៖ ស្ថិតចំកណ្ដាលបេះដូងក្រុងបាត់ដំបង លោកចោរថ្លើមធំពាសមេឃ បានចូលគាស់ផ្ទះថ្មដ៏ធំមួយកន្លែងចំនួន០២លើកផ្ទូនៗលួចកាត់ខ្សែភ្លើង និងដោះខ្វេះកកាយស៊ីគ្រឿងក្នុងម៉ាស៊ីនត្រជាក់អស់ប្រហែល១០គ្រឿង រួចគេចខ្លួនដោយសុវត្ថិភាព បន្សល់ទុកតែស្លាកស្នាម និងសម្បកម៉ាស៊ីនត្រជាក់យ៉ាងរប៉ាត់រប៉ាយពេញក្នុងផ្ទះ ។…
ខេត្តបាត់ដំបង ៖ ស្ថិតចំកណ្ដាលបេះដូងក្រុងបាត់ដំបង លោកចោរថ្លើមធំពាសមេឃ បានចូលគាស់ផ្ទះថ្មដ៏ធំមួយកន្លែងចំនួន០២លើកផ្ទូនៗលួចកាត់ខ្សែភ្លើង និងដោះខ្វេះកកាយស៊ីគ្រឿងក្នុងម៉ាស៊ីនត្រជាក់អស់ប្រហែល១០គ្រឿង រួចគេចខ្លួនដោយសុវត្ថិភាព បន្សល់ទុកតែស្លាកស្នាម និងសម្បកម៉ាស៊ីនត្រជាក់យ៉ាងរប៉ាត់រប៉ាយពេញក្នុងផ្ទះ ។
រឿងរ៉ាវនេះ ម្ចាស់ផ្ទះបានដឹងក្រោយត្រូវពួកចោរធ្វើសកម្ម បំផ្លាញខ្ទេចខ្ទីរអស់មួយលើកជាពីរលើករួចទៅហើយ ហើយក៏បានរាយការណ៍ប្រាប់សមត្ថកិច្ចតែម្ដង ។ ក្មួយម្ចាស់ផ្ទះ គឺលោក ទិត វណ្ណៈ ដែលជាអ្នកមើលការខុសត្រូវ បានប្រាប់កោះសន្តិភាពតាមទូរស័ព្ទនៅរសៀលថ្ងៃទី២២ មេសា នេះថា លើកទី១ ខ្លួនបានដឹងនៅព្រឹកថ្ងៃទី២១ មេសា ពេលខ្លួនទៅមើល និងបម្រុងបោសសំអាតផ្ទះឲ្យម្ដាយមីង ប៉ុន្តែខ្លួនមិនបានដឹងពីពេលវេលាដែលចោរធ្វើសកម្មភាពគាស់ផ្ទះទេ ។
ទិត វណ្ណៈ បានប្រាប់ថា ក្រោយឃើញមានស្នាមកាត់របងខាងក្រោយ និងគាស់ទ្វារក្រោយ ខ្លួនក៏ចូលពិនិត្យឃើញមានស្នាមកាត់ខ្សែភ្លើង និងខូចខាតម៉ាស៊ីនត្រជាក់ ដែលចោរកាត់យកទុយោស្ពាន់ និងគ្រឿងមានតម្លៃនៅក្នុងម៉ាស៊ីនត្រជាក់អស់ប្រហែល០៣គ្រឿង ។ លោកថា ក្រោយពិនិត្យដឹងបាត់បង់ទ្រព្យសម្បត្តិ ខ្លួនក៏បានប្ដឹងទៅសមត្ថកិច្ច ហើយបានហៅជាងមកជួយជួសជុលទ្វារ និងរបងផ្ទះឡើងវិញ ។ ប៉ុន្តែក្រោយពីជួសជុលរួច ស្រាប់តែពេលយប់ឡើង ត្រូវលោកចោរមកធ្វើសកម្មភាពលួចម្ដងទៀតជាលើកទី២ ខូចខាត និងបាត់បង់អស់ធ្ងន់ជាមុន ។
នៅលើកទី២នេះ លោក ទីត វណ្ណៈ ដែលជាក្មួយម្ចាស់ផ្ទះបានរៀបរាប់ដូច្នេះថា «ខ្ញុំមិនបានដឹងពីវេលាជាក់លាក់ ដែលចោរបានចូលលួចទេ តែខ្ញុំបានដឹងនៅព្រឹកថ្ងៃទី ២២ មេសា ពេលខ្ញុំមកមើលផ្ទះ» ។ លោកវណ្ណៈបានបញ្ជាក់ដែរថា គាត់ជាអ្នកមើលខុសត្រូវថែទាំផ្ទះឲ្យម្ដាយមីងមែន តែគាត់មិនបានស្នាក់នៅផ្ទះនេះទេ តែគាត់តែងទៅមើលផ្ទះម្ដាយមីង និងបោសសំអាតជាប្រចាំ ។
លោក ទិត វណ្ណៈ បាននិយាយបន្ថែមថា លើកទី១បាត់បង់គ្រឿងក្នុងម៉ាស៊ីនត្រជាក់អស់ប្រមាណ០៣គ្រឿង ។ ក្រោយពីគាត់ជួសជុលរបង និងទ្វាររួចរាល់បានត្រឹមមួយថ្ងៃ ស្រាប់តែយប់ឡើង ចោរដដែលនោះបានធ្វើសកម្មភាពចូលលួចទៀត ។ លើកទីមួយចោរទាក់របង និងគាស់ទ្វារផ្ទះចូលពីខាងក្រោយ តែលើកទី២នេះ ចោរបានឡើងតាមដើមឈើ ដែលដាំខាងមុខផ្ទះ ឡើងទៅគាស់កកាយជាន់ខាងលើរើកកាយលួចអស់គ្មានសល់ ។ លុះព្រឹកឡើង (២២.០៤.២៦) ពេលគាត់ទៅដល់បើកទ្វារចូល ឃើញរបស់របរនៅរាយប៉ាយពេញផ្ទះស្នាមកាត់ស្នាមគាស់ថ្មីៗ ។ ជាពិសេស សម្បកខ្សែភ្លើង និងសម្បកធុងម៉ាស៊ីនត្រជាក់ ។
ក្មួយប្រុសម្ចាស់ផ្ទួះរូបនេះបានប្រាប់ថា ខ្សែភ្លើងត្រូវគេកាត់ស្ទើរគ្រប់កន្លែង ទាំងក្នុង និង នៅក្រៅបន្ទប់ ម៉ាស៊ីនត្រជាក់ចំនួន០៧គ្រឿងបន្ថែមទៀត ត្រូវចោរគាស់ទម្លាក់ពីជញ្ជាំង កាត់យកទុយោស្ពាន់ រួចគាស់កម្ទេចចោល ខ្វេះយកតែគ្រឿងក្នុងដែលមានតម្លៃ ។ គាត់បានតាមរកពីចំណុចចាប់ផ្ដើម ដែលចោរអាចចូលធ្វើសកម្មភាពបាន ហើយបានដឹងថា ចោរបានឡើងតាមដើមឈើខាងមុខផ្ទះ ព្រោះទ្វារបង្អួចគ្រប់កន្លែង ពុំមានស្នាកស្នាមទេ ។
លោក ទិត វណ្ណះ បានបញ្ជាក់ថា បើតាមការបូកសរុបសម្ភារបាត់បង់ គឺខូចខាតម៉ាស៊ីនត្រជាក់ប្រាមាណ១០គ្រឿង និងខ្សែភ្លើងមួយចំនួនទៀត ។ លោកបានទៅដាក់ពាក្យបណ្ដឹងនៅអធិការក្រុងបាត់ដំបងរួចរាល់ហើយ តែហាក់ពុំទាន់មានតម្រុយពីមុខសញ្ញាជនសង្ស័យនៅឡើយទេ ។
ជុំវិញអំពើចោរកម្ម ដែលកើតឡើងចំកណ្ដាលបេះដូងក្រុងបាត់ដំបងខាងលើនេះ មន្ត្រីជំនាញនៃអធិការក្រុងបាត់ដំបងបានប្រាប់ថា គេបានទទួលបណ្ដឹងជនរងគ្រោះ ហើយក៏បានចុះទៅពិនិត្យផ្ទះកើតហេតុនោះផងដែរ ។ ពេលនេះ មន្ត្រីជំនាញបាននិងកំពុងធ្វើការស្រាវជ្រាវ និងចុះពិនិត្យលើកាមេរ៉ាសុវត្ថិភាពដែលម្ចាស់ផ្ទះនៅក្បែរៗនោះបានបំពាក់ខាងមុខផ្ទះ ៕
ចែករំលែកព័តមាននេះ