ទីក្រុងណាយរ៉ូប៊ី៖ មានហេតុការណ៍បាក់ទំនប់ទឹកដ៏ធំមួយនៅប្រទេសកេនយ៉ា បណ្ដាលឱ្យស្លាប់មនុស្សយ៉ាងតិច៤០នាក់គិតតែសាកសពជនរងគ្រោះដែលគេរកឃើញ។ ក្រៅពីនេះ មនុស្សជាច្រើនទៀតបាត់ខ្លួន។ ហេតុការណ៍នេះកើតឡើងបន្ទាប់ពីទឹកហូរឆ្លងកាត់ផ្ទះរបស់អ្នកស្រុកជាច្រើនខ្នង ហើយកាត់ផ្ដាច់ដងវិថីធំៗ។ នេះបើតាមការបញ្ជាក់របស់សមត្ថកិច្ច។
ទំនប់ទឹកនេះស្ថិតនៅលើទីតាំងងាយរងគ្រោះដោយសារជំនន់ទឹកភ្លៀងដែលហក់ឡើងខ្ពស់យ៉ាងឆាប់រហ័ស១រំពេច។ កាលពីព្រឹកមិញនៅសុខៗទំនប់ក៏ចាប់ផ្ដើមបាក់ និងពន្លែងទឹកជាច្រើនម៉ែត្រគីបហូរចាក់ទៅតំបន់ខ្សែទឹកខាងក្រោម។ ក្នុងនោះមានលាយឡំដោយដីភក់ល្បាប់, ដុំថ្ម និងដើមឈើដែលបាក់រលើងទាំងឫស។ គេឃើញឡាន-ម៉ូតូនៅរាយប៉ាយលើកំណាត់ផ្លូវហាយវេដ៏មមាញឹកបំផុតរបស់ប្រទេសកេនយ៉ា និងឃើញក្រុមគ្រូពេទ្យប្រញាប់ដឹកជញ្ជូនអ្នករបួសយកទៅមន្ទីរពេទ្យ។
នៅពេលនេះ ភ្លៀងបន្តធ្លាក់ឥតដាច់គ្រាប់នៅប្រទេសកេនយ៉ាជាហេតុធ្វើឱ្យមានគ្រោះទឹកជំនន់សម្លាប់មនុស្សមួយរយនាក់តាំងពីមុនហេតុការណ៍បាក់ទំនប់ទឹកនេះទៅទៀត។ ក្រៅពីនេះ សាលារៀនជាច្រើនកន្លែងត្រូវបិទទ្វារ។ ប្រទេសនេះមានភ្លៀងធ្លាក់ខ្លាំងតាំងពីពាក់កណ្ដាលខែមីនា។ ក្រសួងឧតុនិយមព្យាករថាភ្លៀងនឹងធ្លាក់កាន់តែខ្លាំងជាច្រើនថ្ងៃទៅមុខទៀត។
រដ្ឋមន្ត្រីក្រសួងមហាផ្ទៃបានបញ្ជាឱ្យពិនិត្យមើលទំនប់ទឹកឯកជន និងសាធារណៈទាំងអស់នៅក្នុងរង្វង់២៤ម៉ោងក្រោយការបាក់ទំនប់ដើម្បីជៀសវាងករណីនេះកើតឡើងសាជាថ្មី។ ក្រសួងចេញសេចក្ដីណែនាំឱ្យជម្លៀសមនុស្ស និងផ្លាស់ទៅនៅកន្លែងថ្មី។ អាជ្ញាធរទទួលបន្ទុកត្រួតពិនិត្យផ្លូវហាយវេក៏បានចេញសេចក្ដីណែនាំឱ្យអ្នកបើកបរម៉ូតូបង្កើនការប្រុងប្រយ័ត្នខ្ពស់ព្រោះអាចនឹងមានមនុស្សធ្វើដំណើរច្រើន ហើយអាចនឹងមានគំនរបាក់បែកនៅរាយប៉ាយតាមដងផ្លូវខាងលិចរដ្ឋធានី។
តំបន់អាហ្វ្រិកខាងកើតឥឡូវនេះបើត្រូវធ្លាក់ភ្លៀងគឺធ្លាក់ខ្លាំងដូចគេហែកមេឃ ហើយបង្កជាគ្រោះទឹកជំនន់កាន់តែខ្លាំងគួរឱ្យព្រួយបារម្ភ។ មនុស្ស១៥៥នាក់បានស្លាប់នៅប្រទេសតង់ហ្សានី។ ចំណែកនៅប្រទេសប៊ូរូនឌី (Burundi) មនុស្សជាង២សែននាក់កំពុងរស់នៅជួបការលំបាកដោយសារគ្រោះទឹកជំនន់។ កាលពីយប់ថ្ងៃអាទិត្យមានហេតុការណ៍លិចទូកដឹកអ្នកដំណើរនៅប្រទេសកេនយ៉ាខាងជើង។ គេអាចជួយសង្គ្រោះមនុស្ស២៣នាក់ ចំណែករាប់សិបនាក់ទៀតបាត់ខ្លួនរហូតដល់សព្វថ្ងៃ។
កាលពីថ្ងៃសៅរ៍ ជំនន់ទឹកភ្លៀងវាយប្រហារមួយប្រាវទៅលើព្រលានយន្តហោះដ៏ធំមួយរបស់កេនយ៉ា។ យន្តហោះដែលត្រូវចុះចតនៅទីនោះត្រូវតែបង្វែរគោលដៅទៅកន្លែងផ្សេង។ ជនជាតិកេនយ៉ាជាង២សែននាក់រងផលប៉ះពាល់ពីគ្រោះទឹកជំនន់។ ផ្ទះរបស់អ្នកស្រុកនៅតំបន់ទំនាបខ្លាំងត្រូវទឹកដល់ដំបូល។ ដូច្នេះ អ្នកស្រុកត្រូវស្នាក់នៅតាមសាលារៀន។ ប្រធានាធិបតីកេនយ៉ាបានណែនាំឱ្យអាជ្ញាធរផ្ដល់ទីកន្លែងសុវត្ថិភាពសម្រាប់ជនរងគ្រោះដែលទទួលរងការលិចលង់ស្នាក់នៅជាបណ្ដោះអាសន្ន៕
ចែករំលែកព័តមាននេះ