ADផ្ទាំងផ្សព្វផ្សាយពាណិជ្ជកម្ម

Picture

រថ​យន្ត​បើក​​ធ្លាក់​ចូល​ក្នុង​ជ្រលង​ភ្នំ​នៅ​ហ៊្វីលីពីន​ស្លា.ប់​មនុស្ស​១៧​នាក់

2 ខែ មុន

ទី​ក្រុង​ម៉ានីឡា៖ គិត​ទៅ​ជីវិត​មនុស្ស​ពិត​ជា​​មិន​ទៀង​មែន។ ប៉ុន្តែ​អ្វី​ដែល​ទៀង​គឺ​សេចក្ដី​ស្លាប់​ គឺ​​ទៀង​តែ​ស្លាប់​ គ្មាន​នរ​ណា​អាច​គេច​ផុត​ឡើយ​។​ ​ថ្មី​ៗ​នេះ​ មនុស្ស​រាប់​សិប​នាក់​ត្រូវបង់​សង្ខារ​នៅ​ក្នុង​ហេតុ​ការណ៍​ដែល​មើល​មិន​ឃើញ​មួយ​នៅ​ពេល​រថ​យន្ត​បឺស​មួយ​គ្រឿង​ដឹក​អ្នក​ដំណើរ​​​៥៣​នាក់​​បើក​ធ្លាក់​ជ្រលង​ភ្នំ​​នៅ​ប្រទេស​ហ៊្វីលីពីន​កាល​ពី​យប់​ពាក់​កណ្ដាល​អាធ្រាត្រ​។ នៅ​ក្នុងពេល​ដែល​សមត្ថ​កិច្ច​កំពុង​ស៊ើប​អង្កេត​យ៉ាង​ដុត​ដៃ​ដុត​ជើង​ដើម្បី​រក​មូល​ហេតុ​នៅ​ពី​ក្រោយ​ហេតុ​ការណ៍​នេះ​ គេ​អាច​ដឹង​តម្រុយ​ខ្លះ​ៗ​ថា​បញ្ហា​ហ្វ្រាំង​ឡាន​ដែល​ជាន់​មិន​​សូវ​ស៊ី​អាច​ជា​មូល​ហេតុ​ធំ​ជាង​គេ​។ ក្រៅ​ពី​នេះ​…

ទី​ក្រុង​ម៉ានីឡា៖ គិត​ទៅ​ជីវិត​មនុស្ស​ពិត​ជា​​មិន​ទៀង​មែន។ ប៉ុន្តែ​អ្វី​ដែល​ទៀង​គឺ​សេចក្ដី​ស្លាប់​ គឺ​​ទៀង​តែ​ស្លាប់​ គ្មាន​នរ​ណា​អាច​គេច​ផុត​ឡើយ​។​ ​ថ្មី​ៗ​នេះ​ មនុស្ស​រាប់​សិប​នាក់​ត្រូវបង់​សង្ខារ​នៅ​ក្នុង​ហេតុ​ការណ៍​ដែល​មើល​មិន​ឃើញ​មួយ​នៅ​ពេល​រថ​យន្ត​បឺស​មួយ​គ្រឿង​ដឹក​អ្នក​ដំណើរ​​​៥៣​នាក់​​បើក​ធ្លាក់​ជ្រលង​ភ្នំ​​នៅ​ប្រទេស​ហ៊្វីលីពីន​កាល​ពី​យប់​ពាក់​កណ្ដាល​អាធ្រាត្រ​។

នៅ​ក្នុងពេល​ដែល​សមត្ថ​កិច្ច​កំពុង​ស៊ើប​អង្កេត​យ៉ាង​ដុត​ដៃ​ដុត​ជើង​ដើម្បី​រក​មូល​ហេតុ​នៅ​ពី​ក្រោយ​ហេតុ​ការណ៍​នេះ​ គេ​អាច​ដឹង​តម្រុយ​ខ្លះ​ៗ​ថា​បញ្ហា​ហ្វ្រាំង​ឡាន​ដែល​ជាន់​មិន​​សូវ​ស៊ី​អាច​ជា​មូល​ហេតុ​ធំ​ជាង​គេ​។ ក្រៅ​ពី​នេះ​ បញ្ហា​ដទៃ​ទៀត​ក៏​អាច​មាន​ចំណែក​នៅ​ក្នុង​រឿង​នេះ​ផង​ដែរ​។ គេ​ដឹង​ថា​នៅ​ពេល​កើត​ហេតុ​នោះ​​មាន​ភ្លៀង​ធ្លាក់​​១​មេ​ធំ​ដែល​ធ្វើ​ឱ្យ​ផ្លូវ​មាន​សភាព​រអិល។​​

​តួលេខ​ចុង​ក្រោយ​បង្ហាញ​ថា​ចំនួន​អ្នក​ស្លាប់​នៅ​ក្នុង​ហេតុ​ការណ៍​នេះ​កើន​ឡើង​ដល់​១៧​នាក់​ហើយ​ ខណៈ​ដែល​អ្នក​របួស​៨​នាក់​ទៀត​កំពុង​ស្ថិត​នៅ​ក្នុង​បន្ទប់​សង្គ្រោះ​បន្ទាន់​ដោយ​សារ​របួស​យ៉ាង​ធ្ងន់​ធ្ងរ​ មិន​ទាន់​ដឹង​ថា​អាច​ជួយ​សង្គ្រោះ​បាន​ ឬ​អត់​។ បើ​មិន​ដូច្នេះ​ទេ ចំនួន​អ្នក​ស្លាប់​អាច​នឹង​ហក់​ឡើង​ខ្ពស់​ជាង​នេះ​។ សំណាង​ណាស់​ អ្នក​​ដំណើរ​បួន​នាក់​​ ទោះបី​ឡាន​បើក​ធ្លាក់​ជ្រោះ​ឡើង​ដាច់​ជា​កង់​ៗ​​ទៅ​ហើយ​ក្ដី​ ​ក៏​ពួក​គេ​អាច​រួច​ផុត​ពី​សេច​ក្ដី​ស្លាប់​យ៉ាង​ចម្លែក​។​

​បើ​សម្រាប់​អ្នក​អរូបិយ​ជំនឿ​​ គេ​គិត​ថា​អាច​​ដោយ​សារ​គុណ​បុណ្យ​ជួយ​ ឬ​មាន​អ្នក​តាម​ថែ​រក្សា​ការ​ពារ​ពួក​គេ​។​ ករណី​នេះ​វា​ជា​រឿង​​ដែល​បាន​កើត​ឡើង​ពិត​មែន ​ទោះ​បី​អ្នក​វិទ្យាសាស្ត្រ​មិន​អាច​បក​ស្រាយ​ចេញ​ក៏​ដោយ​។ ​ឧទាហរណ៍​ដូច​ជា​ករណី​ធ្លាក់​យន្ត​ហោះ​ខ្នាត​តូច​មួយ​គ្រឿង​នៅ​ក្នុង​ព្រៃ​អាម៉ាហ្សូន​​កាល​ពី​ខែ​ឧសភា ឆ្នាំ​២០២៣​ដែល​បណ្ដាល​ឱ្យ​យន្ត​ហោះ​ខូច​ខ្ទេច​ឡើង​បត់​ក្បាល​ជា​ពីរ​។ មនុស្ស​ពេញ​វ័យ​ចំនួន​៣​នាក់​ស្លាប់​អស់​រលីង​។ ប៉ុន្តែ​នៅ​សល់​កូន​ក្មេងតូច​ៗ​ចំនួន​៤​នាក់​អាច​នៅ​រស់​រាន​មាន​ជីវិត​ ដោយ​គ្មាន​របួស​ស្នាម​អ្វី​ធំ​ដុំ​​ទាល់​តែ​សោះ​។ សូម​ចុច​ត្រង់​នេះ​ដើម្បី​អាន​អត្ថ​បទ​ធ្លាក់​យន្ត​ហោះ​នៅ​ព្រៃ​អាម៉ាហ្សូន​។​ https://kohsantepheapdaily.com.kh/article/1739584.html

​ងាក​មក​តាម​ដាន​ករណី​ភ្លូក​ឡាន​បឺស​ចូល​ក្នុង​​ជ្រលង​ភ្នំ​​វិញ​​ម្ដង​។ អាជ្ញាធរ​ប្រាប់​ថា​រថ​យន្ត​នេះ​ចាក​ចេញ​ដំណើរ​​ទាំង​កណ្ដាល​យប់​ស្ងាត់​ពី​ខេត្ត​អ៊ីឡយឡូ​ (Iloilo)​ ​​ឆ្ពោះ​ទៅ​ទី​ក្រុង​ឃូឡាស៊ី (Culasi) ប្រទេស​ហ៊្វីលីពីន​។​ មិន​ទាន់​ដល់​គោល​ដៅ​ផង​ក៏​ស្រាប់​តែ​ជួប​នឹង​គ្រោះ​អកុសល​នេះ​តែ​ម្ដង​។ សាក្សី​និយាយ​ថា​រថ​យន្ត​នេះ​បើក​នៅ​លើ​ដង​ផ្លូវ​សុខៗ​ស្រាប់​តែ​រេ​ចង្កូត​ចាក​ឆ្ងាយ​ពី​គន្លង​ផ្លូវ​ និង​ធ្លាក់​ទៅ​ក្នុង​ជង្ហុក​ភ្នំ​តែ​ម្ដង​។​ នេះ​សំណាង​ហើយ​ដែល​​មិន​ធ្លាក់​ដល់​បាត​ភ្នំ។​​ កុំ​អី​អាច​នឹង​​មាន​មនុស្ស​ស្លាប់​កាន់​តែ​ច្រើន​ជាង​នេះ​​។​ អ្នក​ខ្លះ​​និយាយ​ថា​តៃកុង​ឡាន​ខិត​ខំ​ទប់​ចង្កូត​ និង​ជាន់​ហ្វ្រាំង​ណាស់​ដែរ​​ ​ប៉ុន្តែ​ហ្វ្រាំង​មិន​សូវ​ស៊ី​។

​ក្រុម​អ្នក​ជួយ​សង្គ្រោះ​យល់​ថា​ទី​កន្លែង​នេះ​ហាក់​ដូច​ជា​មាន​ជើង​កប​ចាំ​យក​ជីវិត​មនុស្ស​ស្រស់​ៗ​តែ​ម្ដង​។ ជាក់​ស្ដែង​​​នេះ​មិន​មែន​ជា​លើក​ទី​១​ទេ​។ កាល​ពី​មុន​នេះ​មិន​យូរ​ប៉ុន្មាន​ក៏​មាន​ករណី​ឡាន​បើក​ធ្លាក់​​ផ្លូវ​នៅ​ត្រង់​ចំណុច​ដដែល​ហ្នឹង​តែ​ម្ដង​។ ​ក្រុម​អ្នក​ជួយ​សង្គ្រោះ​ប្រកាស​បិទ​បញ្ចប់​បេសក​កម្ម​ស្វែង​រក​អ្នក​ស្លាប់ និង​អ្នក​របួស​ត្រឹម​នេះ​បន្ទាប់​ពី​ពួក​គេ​រក​ឃើញ​គ្រប់​​ចំនួន​។ ​អាជ្ញាធរ​ដាក់​ការ​ស្ដី​បន្ទោស​ទៅ​លើ​​ការ​​ឌីហ្សាញ​ផ្លូវ​​ដែល​​មាន​លក្ខណៈ​ខុស​បច្ចេក​ទេស​ទើប​បាន​ជា​មាន​គ្រោះ​ថ្នាក់​ផ្ទួន​ៗ​គ្នា​បែប​នេះ៕​

ប្រភព៖ Reuters និង​ Channel News Asia
https://www.reuters.com/world/asia-pacific/philippines-bus-falls-off-ravine-least-16-killed-2023-12-05/  
https://www.channelnewsasia.com/asia/philippines-bus-falls-antique-ravine-16-killed-least-3968226

អត្ថបទសរសេរ ដោយ

កែសម្រួលដោយ