ទីក្រុងរ៉ង់ហ្គូន៖ អតីតមេដឹកនាំមីយ៉ាន់ម៉ា និងជាអ្នកគាំទ្រលទ្ធិប្រជាធិបតេយ្យដ៏ឆ្នើមម្នាក់ លោកស្រីអង់សានស៊ូជី តាមព័ត៌មានផ្សាយថាត្រូវអាជ្ញាធរផ្លាស់លោកស្រីពីពន្ធនាគារទៅជាប់ឃុំនៅក្នុងផ្ទះវិញហើយ។ រដ្ឋាភិបាលស៊ីវិលថ្មីរបស់មីយ៉ាន់ម៉ាដែលមានក្រុមយោធាជួយជ្រោមជ្រែងពីក្រោយខ្នងមិនបានបញ្ជាក់ថាគេបានផ្លាស់លោកស្រីស៊ូជីទៅទីកន្លែងណាពិតប្រាកដទេ។ ប៉ុន្តែបើតាមការចុះផ្សាយរបស់សារព័ត៌មានដឹហ្កាឌាន (The Guardian) លោកស្រីត្រូវបានដាក់ឃុំនៅក្នុងផ្ទះ។
សារព័ត៌មានរបស់រដ្ឋផ្សាយព័ត៌មានស្ដីពីការផ្លាស់ប្ដូរទីកន្លែងឃុំខ្លួននេះកាលពីថ្ងៃព្រហស្បតិ៍។ ប្រព័ន្ធផ្សព្វផ្សាយនេះថែមទាំងបង្ហាញរូបថតលោកស្រីស៊ូជីអង្គុយក្បែរបុគ្គលិកម្នាក់។ ប៉ុន្តែមិនបានបញ្ជាក់ឱ្យច្បាស់ថាតើរូបនោះថតនៅពេលណា និងថតនៅទីកន្លែងណាទេ។ លោកស្រីស៊ូជីស្ថិតក្រោមការឃុំឃាំងរបស់ក្រុមយោធាចាប់តាំងពីមានរដ្ឋប្រហារខែកុម្ភៈ ឆ្នាំ២០២១។ លោកស្រីត្រូវតុលាការផ្ដន្ទាទោសពីបទពុករលួយ និងបទចោទជាច្រើនករណីទៀត។
ក្រុមបស្ចិមប្រទេស និងអង្គការសហប្រជាជាតិអំពាវនាវជាបន្តបន្ទាប់ឱ្យក្រុមយោធាដោះលែងលោកស្រីស៊ូជីដែលមានអាយុកាន់តែចាស់ជរាណាស់ទៅហើយរហូតដល់៨០ឆ្នាំ ហើយសុខភាពក៏មិនសូវមាំទាំទៅទៀត។ ក្រោយការបោះឆ្នោតជ្រើសតាំងអ្នកតំណាងរាស្ត្រជាបីដំណាក់កាល រដ្ឋាភិបាលស៊ីវិលបានបង្កើតឡើងកាលពីខែមេសា។ ក្រុមយោធាអះអាងថាការបោះឆ្នោតនេះជាការធ្វើអន្តរកាល ឬការបម្លែងខ្លួនពីរបបដឹកនាំដោយយោធាមកជាស៊ីវិលវិញម្ដង។
ក្រុមអ្នកសង្កេតការណ៍អះអាងថារដ្ឋាភិបាលថ្មីចង់បង្ហាញថាខ្លួនកំពុងជ្រើសរើសវិធីដឹកនាំបែបបត់បែនទៅតាមកាលៈទេសៈដូចដែលពួកគេកំពុងបង្ហាញថាជួយសម្រួលឱ្យលោកស្រីស៊ូជីជាប់ឃុំបានប្រសើរជាងមុន។ កូនប្រុសទី២របស់លោកស្រីស៊ូជី លោកគីមអារីស (Kim Aris) ដែលកំពុងរស់នៅចក្រភពអង់គ្លេស បានចេញសេចក្ដីប្រកាសមួយក្រោយការប្រកាសរបស់រដ្ឋាភិបាលមីយ៉ាន់ម៉ានោះ។
លោកអារីសថ្លែងថាការផ្លាស់ប្ដូរទីកន្លែងជាប់ឃុំរបស់ម្ដាយលោកពីពន្ធនាគារទៅទីកន្លែងសម្ងាត់នោះមិនមែនមានន័យថាជាការទទួលបានសិទ្ធិសេរីភាពនោះឡើយ។ លោកថ្លែងបន្តទៀតថាម្ដាយរបស់លោកនៅតែជាចំណាប់ខ្មាំងរបស់គេដដែល។ មិនត្រឹមតែប៉ុណ្ណោះ លោកស្រីត្រូវបានកាត់ផ្ដាច់ទាំងស្រុងពីពិភពខាងក្រៅ និងស្ថិតនៅក្រោមការគ្រប់គ្រងយ៉ាងតឹងរ៉ឹងបំផុតក្រោមដៃមនុស្សដែលបន្តគ្រប់គ្រងលោកស្រីទាំងខុសច្បាប់៕ ប្រភព៖ NHK និងប្រភពដទៃទៀត
ចែករំលែកព័តមាននេះ