ប្រទេសវ៉េណេស៊ុយអេឡា ៖ ជើងហោះហើរត្រង់លើកដំបូងបង្អស់រវាងសហរដ្ឋអាមេរិក និងប្រទេសវ៉េណេស៊ុយអេឡាក្នុងរយៈពេលប្រាំ៧ឆ្នាំ បានចុះចតនៅថ្ងៃទី៣០ ខែមេសា ឆ្នាំ២០២៦ (ម៉ោងក្នុងស្រុក) នៅទីក្រុងការ៉ាកាស (Caracas)…
ប្រទេសវ៉េណេស៊ុយអេឡា ៖ ជើងហោះហើរត្រង់លើកដំបូងបង្អស់រវាងសហរដ្ឋអាមេរិក និងប្រទេសវ៉េណេស៊ុយអេឡាក្នុងរយៈពេលប្រាំ៧ឆ្នាំ បានចុះចតនៅថ្ងៃទី៣០ ខែមេសា ឆ្នាំ២០២៦ (ម៉ោងក្នុងស្រុក) នៅទីក្រុងការ៉ាកាស (Caracas) ដែលជាទំព័រថ្មីមួយនៃការភ្ជាប់ទំនាក់ទំនងរវាងប្រទេសទាំងពីរ ចាប់តាំងពីទីក្រុងវ៉ាស៊ីនតោនបានទម្លាក់មេដឹកនាំឆ្វេងនិយម លោក នីកូឡាស ម៉ាឌូរ៉ូ (Nicolas Maduro)។ នេះបើតាមប្រភពពី AFP, France24, Reuters និងប្រភពផ្សេងទៀតបានចេញផ្សាយ។
ជើងហោះហើរដែលដំណើរការដោយក្រុមហ៊ុនអាកាសចរណ៍អាមេរិក Envoy Air ដែលជាក្រុមហ៊ុនបុត្រសម្ព័ន្ធក្រុមហ៊ុន American Airlines បានហោះឡើងនៅម៉ោង ១០:២៦ព្រឹកចេញទីក្រុងម៉ៃអាមី (Miami) ក្នុងដំណើរទៅកាន់ទីក្រុងការ៉ាកាស ជាកន្លែងដែលសហរដ្ឋអាមេរិកភ្ជាប់ទំនាក់ទំនងការទូតឡើងវិញ បន្ទាប់ពីមានភាពតានតឹងអស់រយៈពេលជាច្រើនឆ្នាំ ខណៈដែលជើងហោះហើរលេខ ៣៥៩៩ មួយនេះ បានចុះចតតិចជាង៣ម៉ោងក្រោយមក។
ការហោះហើរនេះ រួមមានមន្ត្រីជាន់ខ្ពស់មកពីទីក្រុងវ៉ាស៊ីនតោនផងដែរ នៅក្នុងដំណើរទៅជួបជាមួយមន្ត្រីរដ្ឋាភិបាលវ៉េណេស៊ុយអេឡា ដែលនេះគឺជាការរំពឹងទុកមិននឹកស្មានមួយ។ អ្នកដំណើរខ្លះបានថតរូប Selfie យ៉ាងរីករាយនៅពេលចុះពីលើយន្តហោះ ដែលត្រូវបានចាត់ទុកថា ជើងហោះហើរតំណាងឱ្យការបញ្ចប់នៃភាពឯកោអស់រយៈពេលជាច្រើនឆ្នាំរបស់វ៉េណេស៊ុយអេឡាដោយសហរដ្ឋអាមេរិក។
មិនតែប៉ុណ្ណោះ វាក៏បានបង្ហាញពីការវិលត្រឡប់នៃប្រទេសតំបន់ការាបៀន (Caribbean) មួយនេះ ចូលទៅកាន់ដែនអាកាសពិភពលោកឡើងវិញ បន្ទាប់ពីក្រុមហ៊ុនអាកាសចរណ៍ជាច្រើនបានផ្អាកការហោះហើរទៅទីនោះកាលពីចុងឆ្នាំមុន ព្រោះសម្ពាធនយោបាយ និងសេដ្ឋកិច្ចយ៉ាងខ្លាំងពីសហរដ្ឋអាមេរិកលើរដ្ឋាភិបាលលោក ម៉ាឌូរ៉ូ។ រថយន្តពន្លត់អគ្គីភ័យវ៉េណេស៊ុយអេឡា ២ គ្រឿងបានបាញ់ទឹកគ្របដណ្តប់ពីលើយន្តហោះនោះ ដើម្បីជាការអបអរផងដែរ។
ជើងហោះហើរថ្មីនេះ បានកើតឡើងចំពេលដែលឧស្សាហកម្មអាកាសចរណ៍ពិភពលោក បាននឹងកំពុងរងផលប៉ះពាល់យ៉ាងខ្លាំង ដោយសារការឡើងថ្លៃតម្លៃប្រេង បណ្តាលមកពីជម្លោះនៅមជ្ឈិមបូព៌ា ចាប់តាំងពីសហរដ្ឋអាមេរិក និងអ៊ីស្រាអែលបើកការវាយប្រហារតាមអាកាសលើអ៊ីរ៉ង់ កាលពីថ្ងៃទី២៨ ខែកុម្ភៈ ឆ្នាំ២០២៦ នាំឱ្យទីក្រុងតេហេរ៉ង់ឆ្លើយតបវិញ តាមរយៈការបិទច្រកសមុទ្រហ័រមូស (Hormuz) ដែលផ្លូវដឹកជញ្ជូនប្រេងដ៏សំខាន់មួយរបស់ពិភពលោក៕
ចែករំលែកព័តមាននេះ