ក្រោយក្រសោបជាប់អាមេរិក! វៀតណាមបន្តភាពជាដៃគូពាណិជ្ជកម្មដ៏ធំជាមួយចិនទៀត
វៀតណាម-ចិន ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានជួបពិភាក្សា
វៀតណាម-ចិន ៖ នាយករដ្ឋមន្ត្រីវៀតណាម លោក ផាំ មិញជិញ (Pham Minh Chinh) បានជួបពិភាក្សាជាមួយនឹងនាយករដ្ឋមន្ត្រីចិន លោក លី ឈាង (Li Qiang) នៅទីក្រុងណាននីង (Nanning) តំបន់ស្វយ័តក្វាងស៊ីចូវ (Guangxi Zhuang) ភាគខាងត្បូងប្រទេសចិន កាលពីថ្ងៃទី១៦ ខែកញ្ញា ឆ្នាំ២០២៣ ខណៈដែលថ្នាក់ដឹកនាំទាំងពីរបានសង្កត់ធ្ងន់លើតម្រូវការ សម្រាប់ការបន្តកិច្ចសហប្រតិបត្តិការលើវិស័យពាណិជ្ជកម្ម និងហេដ្ឋារចនាសម្ព័ន្ធ។ គួររំលឹកថា កិច្ចព្រមព្រៀងកំពូល AI កើតឡើង អំឡុងដំណើរទស្សនកិច្ចលោក ចូ បៃដិន នៅទីក្រុងហាណូយ
នាយករដ្ឋមន្ត្រីវៀតណាម ដែលស្ថិតនៅទីក្រុងណាននីង ដើម្បីចូលរួមកម្មវិធីពិព័រណ៍ចិន-អាស៊ាន (CAEXPO) និងកិច្ចប្រជុំកំពូលពាណិជ្ជកម្ម និងវិនិយោគចិន-អាស៊ាន (CABIS) បានលើកឡើងពីតម្រូវការសម្រាប់ភាគីទាំងពីរក្នុងការបង្កើនគុណសម្បត្តិភូមិសាស្ត្រ និងការបំពេញបន្ថែមផ្សេងទៀត ដើម្បីចិញ្ចឹមបីបាច់កិច្ចសហប្រតិបត្តិការសំខាន់ៗ នៅក្នុងតំបន់អភិវឌ្ឍន៍ប្រកបដោយតុល្យភាព និងនិរន្តរភាព។
ឆ្លៀតក្នុងឱកាសនោះ លោកបានស្នើចិនពន្លឿន ការបើកទីផ្សារសម្រាប់ផលិតផលកសិកម្ម និងជលផលវៀតណាម បង្កើតលក្ខខណ្ឌអំណោយផល សម្រាប់ការបង្កើតការិយាល័យផ្សព្វផ្សាយពាណិជ្ជកម្មរបស់វៀតណាម នៅទីក្រុងចេងទូ (Chengdu) ខេត្តស៊ីឈួន (Sichuan) និងទីក្រុងហៃគូ (Haikou) ខេត្តហៃណាន (Hainan) ក៏ដូចជារួមគ្នា លើកកម្ពស់ប្រសិទ្ធភាពគយ ទប់ស្កាត់ការកកស្ទះទំនិញនៅច្រកព្រំដែន។
លោកបន្ថែមថា វៀតណាមបានត្រៀមខ្លួនជាស្រេច ដើម្បីបង្កើតលក្ខខណ្ឌអំណោយផលសម្រាប់ក្រុមហ៊ុនចិន ដើម្បីធ្វើអាជីវកម្មនៅវៀតណាម ជាពិសេសគម្រោងបច្ចេកវិទ្យាធំ គុណភាពខ្ពស់ និងទំនើប ដែលតំណាងឱ្យកម្រិត នៃការអភិវឌ្ឍន៍របស់ចិន ដែលនាំមកនូវផលប្រយោជន៍សេដ្ឋកិច្ច និងសង្គម។ ទស្សនៈលោក ប្រទេសទាំងពីរត្រូវពង្រឹងការតភ្ជាប់ហេដ្ឋារចនាសម្ព័ន្ធដឹកជញ្ជូន និងតាមព្រំដែន ហើយសិក្សាការងាររួមគ្នាក្នុងការរៀបចំផែនការ និងសាងសង់ផ្លូវរថភ្លើងច្រើនខ្សែ នៅភាគខាងជើងវៀតណាម និងកែលម្អសមត្ថភាពដឹកជញ្ជូនទំនិញទ្វេភាគី និងតាមរយៈប្រទេសទី៣។
នាយករដ្ឋមន្ត្រីវៀតណាម ក៏បានស្នើឱ្យមានការខិតខំប្រឹងប្រែងរួមគ្នា ដើម្បីជំរុញកិច្ចសហប្រតិបត្តិការទេសចរណ៍ ដោះស្រាយបញ្ហាដែលអូសបន្លាយក្នុងគម្រោងមួយចំនួនស្ថិតក្នុងស្មារតីសុខដុមរមនាផលប្រយោជន៍ និងការចែករំលែកហានិភ័យ ព្រមទាំងពន្លឿនការអនុវត្តជំនួយដែលមិនអាចដកវិញបានពីចិនមកវៀតណាម។
ដោយឡែក លោកនាយករដ្ឋមន្ត្រីចិនបានអះអាងថា ប្រទេសចិន នឹងបន្តបើកទីផ្សាររបស់ខ្លួន សម្រាប់ទំនិញវៀតណាម ជាពិសេសផលិតផលកសិកម្ម និងជលផលប្រកបដោយគុណភាព ពង្រីកទំហំ និងបង្កើនប្រសិទ្ធភាពពាណិជ្ជកម្មតាមរយៈការធ្វើឱ្យប្រសើរឡើងនូវហេដ្ឋារចនាសម្ព័ន្ធព្រំដែន ការតភ្ជាប់គោលនយោបាយ និងការកសាងច្រកព្រំដែនឆ្លាតវៃ។ កិច្ចខិតខំប្រឹងប្រែងនឹងត្រូវបានធ្វើឡើង ដើម្បីលើកកម្ពស់ប្រតិបត្តិការដោយប្រើប្រាក់យន់ចិន សម្រាប់ពាណិជ្ជកម្មរវាងប្រទេសទាំងពីរ។
លោកបានបន្ថែមថា លោកបានដឹកនាំក្រសួងពាក់ព័ន្ធរបស់ចិន ឱ្យចូលរួមយ៉ាងសកម្មជាមួយវៀតណាម ដើម្បីបង្កើនតំបន់សហប្រតិបត្តិការជាក់លាក់ និងរួមគ្នាកសាងខ្សែសង្វាក់ផ្គត់ផ្គង់ និងផលិតកម្មប្រកបដោយស្ថិរភាព ក៏ដូចជាស្នើឱ្យបង្កើនការផ្លាស់ប្តូររវាងប្រជាជនប្រទេសទាំងពីរ និងការយល់ដឹងជាសាធារណៈអំពីមិត្តភាពប្រពៃណីទ្វេភាគី ជាពិសេសក្នុងចំណោមយុវជនជំនាន់ក្រោយ។
រដ្ឋាភិបាលចិន នឹងលើកទឹកចិត្តប្រជាពលរដ្ឋខ្លួនឱ្យធ្វើដំណើរទៅប្រទេសវៀតណាម គាំទ្រការបើកផ្លូវហោះហើរថ្មីរវាងប្រទេសទាំងពីរ និងឆាប់រហ័ស បូករួមនឹងការអនុវត្តគម្រោងជំនួយមនុស្សធម៌ ថែទាំសុខភាព និងអប់រំនៅវៀតណាម។ មេដឹកនាំទាំងពីរបានឯកភាពលើសារៈសំខាន់ នៃការគ្រប់គ្រងលើការខ្វែងគំនិតគ្នាឱ្យបានត្រឹមត្រូវ និងរក្សាសន្តិភាព និងស្ថិរភាពនៅសមុទ្រខាងកើតផងដែរ។
គួរបញ្ជាក់ជូនថា នេះគឺជាការសហការដៃគូពាណិជ្ជកម្មដ៏ធំជាប្រវត្តិសាស្ត្រ ហើយឆ្នាំ ២០២៣ ត្រូវបានចាត់ទុកជាឆ្នាំមាសរបស់វៀតណាម បន្ទាប់ពីប្រទេសក្នុងតំបន់អាស៊ីអាគ្នេយ៍មួយនេះ ទើបតែចុះកិច្ចព្រមព្រៀងពាណិជ្ជកម្មដ៏សំខាន់ជាច្រើនជាមួយនឹងសហរដ្ឋអាមេរិក កាលពីពេលថ្មីៗនេះ ពោលគឺអំឡុងពេលដំណើរទស្សនកិច្ចរយៈពេលខ្លីរបស់លោកប្រធានាធិបតី ចូ បៃដិន (Joe Biden) កាលពីថ្ងៃទី១០ ខែកញ្ញា កន្លងទៅ៕ (ប្រភពពី VnExpress)
ចែករំលែកព័តមាននេះ