រាជធានីភ្នំពេញ ៖ សម្តេចមហាបវរធិបតី ប្រមុខរាជរដ្ឋាភិបាលបានគូសបញ្ជាក់ថា ឪពុកម្តាយអ្នកក្រីក្រ ដែលមានការលំបាក តែងតែតស៊ូឲ្យកូនរៀនបានខ្ពស់ខ្ពងជាងខ្លួន ដោយសារគាត់គិតថា មានតែចំណេះដឹងទេ ទើបមាននិរន្តរ៍ភាព…
រាជធានីភ្នំពេញ ៖ សម្តេចមហាបវរធិបតី ប្រមុខរាជរដ្ឋាភិបាលបានគូសបញ្ជាក់ថា ឪពុកម្តាយអ្នកក្រីក្រ ដែលមានការលំបាក តែងតែតស៊ូឲ្យកូនរៀនបានខ្ពស់ខ្ពងជាងខ្លួន ដោយសារគាត់គិតថា មានតែចំណេះដឹងទេ ទើបមាននិរន្តរ៍ភាព និងអាចជួយកូនគាត់បាននៅពេលអនាគត ។
សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងក្នុងពិធី «សម្ពោធអគារអន្តេវេសិកដ្ឋានតេជោសន្តិភាព និងសមិទ្ធផលនានាក្នុងវត្តស្វាយពពែ» នាព្រឹកថ្ងៃទី៩ ខែឧសភា ឆ្នាំ២០២៥ បានបញ្ជាក់ថា ៖«ឪពុកម្តាយដែលមានជីវភាពក្រីក្រ ឬរស់នៅតំបន់ដាច់ស្រយាល គាត់តែងតែខិតខំឲ្យកូនរៀនសូត្រ ព្រោះគាត់យល់ឃើញថា មានតែចំណេះដឹងទេទើបមាននិរន្តរ៍ភាពទ្រព្យសម្បត្តិដែលឪពុកម្តាយឲ្យ គឺអាចចាយអស់ តែទ្រព្យសម្បត្តិដែលបង្កក្នុងខ្លួនឲ្យខិតខំរៀនសូត្រយកចំណេះដឹង ឥរិយាបថល្អ មិនងាយបាត់បង់នោះទេ» ។
សម្តេចមហាបវរធិបតី ក៏បានលើកករណីសិស្សម្នាក់ ដែលប្រឡងជាប់សិស្សពូកែលេខ១ផ្នែកគណិតវិទ្យានៅខេត្តព្រៃវែង ឪពុកម្តាយក្រីក្រ ដោយឪពុកប្រកបរករត់កង់បី និងម្តាយជាអ្នកស៊ីឈ្នួលលាងចាន និងបោកគក់ឲ្យគេ តែគាត់បានតស៊ូឲ្យកូនគាត់ខិតខំរៀនសូត្ររហូតកូនទទួលបានការសិក្សាល្អ ។
សម្តេចមហាបវរធិបតី បានបញ្ជាក់ថា ៖ «អីញ្ចឹងមិនប្រាកដថា កូនអ្នកក្ររៀនចាញ់កូនអ្នកមាននោះទេ ហើយសមត្ថភាពនៃការខិតខំរៀនសូត្រនេះក៏បង្ហាញពីសមត្ថភាពនៅពេលចេញធ្វើការនៅពេលអនាគត ដោយមិនមានម៉ែឪណាមកជួយរហូតនោះទេ» ។
ជាមួយគ្នានោះដែរ សម្តេចមហាបវរធិបតី នាយករដ្ឋមន្ត្រីបានលើកឡើង ជាការពិតណាស់ក៏មានមនុស្ស១សែនមាន១នាក់ ឬ៤ ឬ១០នាក់ មានទ្រព្យសម្បត្តិឲ្យហើយទទួលបានការងារល្អ ៕
ចែករំលែកព័តមាននេះ