លោកជំទាវអភិបាលខេត្តប៉ៃលិន ជួបសំណេះសំណាល និងផ្តល់វត្ថុអនុស្សាវរីយ៍លើកទឹកចិត្ត ជូនដល់ថ្នាក់ដឹកនាំមន្ត្រីរាជការជាស្ត្រី
ខេត្តប៉ៃលិន ៖ រហូតឈានមកដល់ថ្ងៃទី១០ ខែមីនា ឆ្នាំ២០២៦ លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន…
ខេត្តប៉ៃលិន ៖ រហូតឈានមកដល់ថ្ងៃទី១០ ខែមីនា ឆ្នាំ២០២៦ លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញជួបសំណេះសំណាល និងផ្តល់វត្ថុអនុស្សាវរីយ៍លើកទឹកចិត្ត ជូនដល់ថ្នាក់ដឹកនាំ និងមន្ត្រីរាជការដែលជាស្ត្រី នៃរដ្ឋបាលខេត្តប៉ៃលិន ក្នុងឱកាសចូលរួម អបអរសាទរខួបលើកទី១១៥ ទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ «សន្តិភាព សន្តិសុខសម្រាប់ស្ត្រី និងគ្រួសារ» ហើយក៏ណែនាំឱ្យស្ត្រីទាំងអស់មានភាពរឹងមាំឡើងកាន់តែខ្លាំង ដើម្បីខ្លួនឯង ក្រុមគ្រួសារ និងសង្គមជាតិ ។
ប្រភពព័ត៌មានបានឱ្យដឹងថា ថ្នាក់ដឹកនាំ និងមន្ត្រីរាជការដែលជាស្ត្រី នៃរដ្ឋបាលខេត្តប៉ៃលិន មានការសប្បាយរីករាយក្នុងចិត្តយ៉ាងក្រៃលេង ដោយសារលោកជំទាវអភិបាលខេត្តប៉ៃលិន តែងតែយកចិត្តទុកដាក់ដល់បងប្អូនមន្ត្រីរាជការជាស្ត្រី ជានិច្ចមិនគិតថា ជាថ្ងៃបុណ្យ ឬថ្ងៃបំពេញការងារធម្មតានោះឡើយ គឺរាល់សុខទុក្ខរបស់ស្ត្រីគឺជាសុខទុក្ខរបស់លោកជំទាវអភិបាលខេត្តផងដែរ ។
ប្រភពបន្តទៀតថា ខណៈពេលជួបសំណេះសំណាល លោកជំទាវអភិបាលខេត្តប៉ៃលិន បានក្រើនរំលឹកដល់ស្ត្រីទាំងអស់ ឱ្យខិតខំប្រឹងប្រែងតស៊ូ ក្នុងជីវភាព ជាពិសេសខិតខំប្រឹងប្រែងរៀបចំខ្លួនឱ្យបានល្អ ដោយធ្វើយ៉ាងណាត្រូវពង្រឹងសមត្ថភាពរបស់ខ្លួនបន្ថែមទៀត ព្រោះស្ត្រីខ្លាំងក្រុមគ្រួសារក៏មានការរីកចម្រើន ដែលជួយរួមចំណែកជាមួយនឹងប្តី ក្នុងការកសាងក្រុមគ្រួសារមួយឱ្យទទួលបានជោគជ័យ មានសុភមង្គល អាចនឹងធ្វើឱ្យខេត្តប៉ៃលិន ព្រមទាំងប្រទេសកម្ពុជា មានការរីកចម្រើនថែមទៀត ។
ជាចុងក្រោយ មន្ត្រីរាជការជាស្ត្រីទាំងអស់ ក៍សូមជូនពរដល់លោកជំទាវអភិបាលខេត្ត និងក្រុមគ្រួសារោឱ្យមានសុខភាពល្អ កម្លាំងម៉ាំមួន ទទួលបានជោគជ័យគ្រប់ភារកិច្ចផងដែរ ហើយស្ត្រីជាមន្ត្រីរាជការទាំងអស់ប្តេជ្ញានឹងខិត្តខំបំពេញតួនាទីភារកិច្ចរបស់ខ្លួន ឱ្យបានល្អ និងកាន់តែប្រសើរថែមទៀតនៅថ្ងៃខាងមុខ ដើម្បីចូលរួមចំណែកកសាងសង្គមជាតិរបស់យើងឱ្យទទួលបានភាពរីកចម្រើនជឿនលឿនទៅមុខ ៕
ចែករំលែកព័តមាននេះ