ក្រោយពីមានការផ្ទុះឡើងនូវក្តីកង្វល់ និងការរិះគន់មួយចំនួនពីសំណាក់ប្រជាពលរដ្ឋ ដែលប្រកបរបរនេសាទនៅក្នុងស្រុកអង្គរបូរី ពាក់ព័ន្ធនឹងវិធានការរឹតបន្តឹងលើការនេសាទពីសំណាក់រដ្ឋបាលស្រុកថ្មី លោក កង អាណាន់ អភិបាលស្រុកអង្គរបូរី បានចេញមុខផ្តល់ការបំភ្លឺជាផ្លូវការ ដើម្បីបញ្ចប់ភាពមន្ទិលសង្ស័យ…
ក្រោយពីមានការផ្ទុះឡើងនូវក្តីកង្វល់ និងការរិះគន់មួយចំនួនពីសំណាក់ប្រជាពលរដ្ឋ ដែលប្រកបរបរនេសាទនៅក្នុងស្រុកអង្គរបូរី ពាក់ព័ន្ធនឹងវិធានការរឹតបន្តឹងលើការនេសាទពីសំណាក់រដ្ឋបាលស្រុកថ្មី លោក កង អាណាន់ អភិបាលស្រុកអង្គរបូរី បានចេញមុខផ្តល់ការបំភ្លឺជាផ្លូវការ ដើម្បីបញ្ចប់ភាពមន្ទិលសង្ស័យ និងកាត់បន្ថយភាពតានតឹងនៅក្នុងមូលដ្ឋាន។
នៅក្នុងកិច្ចសម្ភាសន៍ជាមួយក្រុមអ្នកសារព័ត៌មាន នៅព្រឹកថ្ងៃទី១២ ខែឧសភា ឆ្នាំ២០២៦ លោកអភិបាលស្រុកបានបញ្ជាក់យ៉ាងច្បាស់ថា ចំពោះការអនុវត្តច្បាប់ និងការចុះបង្ក្រាបនាពេលថ្មីៗនេះ គឺមិនមែនធ្វើឡើងក្នុងលក្ខណៈទូទៅដែលប៉ះពាល់ដល់ឆ្នាំងបាយរបស់ពលរដ្ឋស្លូតត្រង់
នោះទេ។
គោលដៅចម្បងនៃវិធានការរុះរើ និងបង្ក្រាប គឺធ្វើឡើងតែនៅក្នុង «តំបន់អន្លង់អភិរក្ស» ប៉ុណ្ណោះ។ តំបន់ទាំងនេះ គឺជាកន្លែងដែលច្បាប់ហាមឃាត់ដាច់ខាត ដើម្បីទុកជាជម្រកពងកូន និងថែរក្សាពូជត្រីឱ្យនៅគង់វង្សសម្រាប់អនាគត។ ចំពោះឧបករណ៍នេសាទ ជាពិសេស «សម្រះ» របស់បងប្អូនប្រជាពលរដ្ឋដែលដាក់នៅតាមសណ្តរស្ទឹង ឬទីតាំងដែលមិនមែនជាតំបន់អភិរក្ស គឺអាជ្ញាធរមិនមានគោលការណ៍រុះរើ ឬហាមឃាត់ឡើយ។ បងប្អូនអាចបន្តប្រកបរបរចិញ្ចឹមជីវិតជាធម្មតា។
លោក កង អាណាន់ បានបង្ហាញពីឆន្ទៈក្នុងការដោះស្រាយបញ្ហាដោយសន្តិវិធី និងការយោគយល់គ្នា។ លោកបានបង្ហើបថា នៅដើមសប្តាហ៍នេះ លោកនឹងដឹកនាំក្រុមការងារចុះទៅជួបសំណេះសំណាលផ្ទាល់ជាមួយបងប្អូនប្រជានេសាទតាមខ្នងផ្ទះ និងតាមទីតាំងជាក់ស្តែង។
ការចុះជួបផ្ទាល់នេះ មានគោលបំណងជួយពន្យល់ពីភូមិសាស្ត្រ ដោយបង្ហាញឱ្យពលរដ្ឋបានដឹងច្បាស់ថា កន្លែងណាជាតំបន់អភិរក្សហាមឃាត់ និងកន្លែងណាជាតំបន់ដែលអាចនេសាទបានតាមលក្ខណៈគ្រួសារ។ មិនតែប៉ុណ្ណោះ លោកនឹងបើកឱកាសឱ្យពលរដ្ឋបានលើកឡើងនូវការលំបាក ដើម្បីឱ្យអាជ្ញាធរស្វែងរកដំណោះស្រាយសមស្រប ដោយមិនឱ្យខូចប្រយោជន៍សាធារណៈ និងមិនឱ្យប៉ះពាល់ដល់ជីវភាពប្រចាំថ្ងៃរបស់រាស្ត្រ។
ក្នុងនាមជាអភិបាលស្រុកដែលទើបកាន់តំណែងថ្មី លោកបានសង្កត់ធ្ងន់ថា រដ្ឋបាលស្រុកមិនមានបំណងធ្វើឱ្យពលរដ្ឋមានការលំបាកនោះទេ។ ទោះជាយ៉ាងណាក៏ដោយ លោកក៏បានអំពាវនាវដល់បងប្អូនប្រជានេសាទទាំងអស់ សូមកុំមានការព្រួយបារម្ភហួសហេតុតាមការបំប៉ោងព័ត៌មានមួយចំនួន។ ត្រូវចូលរួមសហការជាមួយអាជ្ញាធរក្នុងការការពារតំបន់អន្លង់អភិរក្ស ព្រោះវាជាប្រភពចំណូលយូរអង្វែងរបស់សហគមន៍ទាំងមូល។ ចៀសវាងការប្រើប្រាស់ឧបករណ៍នេសាទខុសច្បាប់ (ដូចជាឧបករណ៍ឆក់ ឬស្បៃមុងក្រឡាញឹក) ដែលបំផ្លាញពូជត្រីតូចៗ។
ការបកស្រាយរបស់លោកអភិបាលស្រុកអង្គរបូរីនៅពេលនេះ គឺជាសញ្ញាវិជ្ជមានមួយដែលបង្ហាញពីភាពជាអ្នកដឹកនាំដែលយកចិត្តទុកដាក់លើសុខទុក្ខរបស់រាស្ត្រ។ បញ្ហាចម្រូងចម្រាសកន្លងមក ហាក់ដូចជាកើតចេញពីការខ្វះចន្លោះនៃការប្រាស្រ័យទាក់ទងគ្នា ប៉ុន្តែតាមរយៈការចុះជួបផ្ទាល់នាពេលខាងមុខ គេរំពឹងថាភាពសុខដុមរមនានឹងត្រលប់មកមូលដ្ឋានស្រុកអង្គរបូរីវិញមិនខាន ៕
ចែករំលែកព័តមាននេះ