ប្រទេសឥណ្ឌា ៖ នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) កាលពីថ្មីៗនេះ បានអំពាវនាវពលរដ្ឋឥណ្ឌាឱ្យផ្អាកទិញមាស…
ប្រទេសឥណ្ឌា ៖ នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) កាលពីថ្មីៗនេះ បានអំពាវនាវពលរដ្ឋឥណ្ឌាឱ្យផ្អាកទិញមាស កាត់បន្ថយការធ្វើដំណើរកម្សាន្តទៅក្រៅប្រទេស យ៉ាងហោចណាស់១ឆ្នាំ ដើម្បីការពារស្ថិរភាពសេដ្ឋកិច្ចជាតិ នៅចំពោះមុខនៃវិបត្តិនយោបាយ និងសង្គ្រាមនៅតំបន់មជ្ឈិមបូព៌ា ដែលកំពុងតែបង្កការរំខានយ៉ាងខ្លាំងដល់ខ្សែច្រវាក់ផ្គត់ផ្គង់ថាមពលសកល និងការដឹកជញ្ជូនតាមច្រកសមុទ្រហ័រមូស (Hormuz)។
ថ្លែងទៅកាន់ការជួបជុំសាធារណៈមួយនៅក្នុងរដ្ឋតេឡាំងហ្គាណា (Telangana) ភាគខាងត្បូងប្រទេសឥណ្ឌា កាលពីថ្ងៃទី១០ ខែឧសភា ឆ្នាំ២០២៦ លោក ម៉ូឌី បានអំពាវឱ្យប្រជាជនឥណ្ឌាកាត់បន្ថយការធ្វើដំណើរកម្សាន្ត និងរៀបចំពិធីផ្សេងៗ នៅក្រៅប្រទេស ហើយងាកមកកម្សាន្តកន្លែងទេសចរណ៍ក្នុងស្រុក ដើម្បីជួយជំរុញសេដ្ឋកិច្ចជាតិ។ ការធ្វើដំណើរទៅក្រៅប្រទេស ធ្វើឱ្យមានការប្តូរប្រាក់រូពីទៅជារូបិយប័ណ្ណបរទេស និងចំណាយទៅលើជើងហោះហើរ និងសណ្ឋាគារនៅខាងក្រៅប្រទេស ដែលប៉ះពាល់ដល់ទុនបំរុងជាតិ និងធ្វើឱ្យតម្លៃប្រាក់រូពីឥណ្ឌាដាំក្បាល។
ការផ្អាកទិញមាស ក៏ជារឿងសំខាន់សម្រាប់ប្រទេសឥណ្ឌាផងដែរ ព្រោះឥណ្ឌាជាប្រទេស បញ្ជាទិញ និងនាំចូលមាសធំលំដាប់ទី២លើពិភពលោក ខណៈមាសអន្តរជាតិត្រូវទិញដូរជាប្រាក់ដុល្លារអាមេរិក ដូច្នេះ ការនាំចូលនៅក្នុងទំហំទឹកប្រាក់ដល់៧២ពាន់លានដុល្លារអាមេរិកក្នុង១ឆ្នាំៗ បានធ្វើឱ្យលុយដុល្លារហូរចេញពីប្រទេសយ៉ាងច្រើនសន្ធឹកសន្ធាប់។ដ្បិតវិបត្តិសង្គ្រាមបានរំខានដល់ផ្លូវដឹកជញ្ជូនតាមច្រកហ័រមូស ធ្វើឱ្យតម្លៃប្រេងឆៅពិភពលោកហក់ឡើងខ្ពស់។
ដូច្នេះ ឥណ្ឌាត្រូវបង្ខំចិត្តរក្សាទុកប្រាក់ដុល្លារបម្រុងទាំងនោះ ដើម្បីធានាការនាំចូលទំនិញចាំបាច់បំផុតដូចជា ប្រេងឥន្ធនៈ និងជីកសិកម្មជាដើម សម្រាប់ផ្គត់ផ្គង់ជីវភាព និងផលិតកម្មក្នុងស្រុក។
ក្រៅពីការអំពាវនាវឱ្យផ្អាកទិញមាស និងដើរលេងនៅបរទេសហើយនោះ លោក ម៉ូឌី ក៏បានដាក់ចេញនូវការអំពាវនាវមួយចំនួនទៀតក្នុងពេលតែមួយរួមទាំង ជំរុញឱ្យក្រុមហ៊ុននានាអនុវត្តគោលការណ៍ធ្វើការពីផ្ទះ ឬតាមអនឡាញ និងកាត់បន្ថយការប្រើប្រាស់ប្រេងសាំង និងម៉ាស៊ូត ដោយងាកមកប្រើយានយន្តអគ្គិសនី និងប្រព័ន្ធដឹកជញ្ជូនសាធារណៈជំនួសវិញ ជាពិសេសកាត់បន្ថយការធ្វើដំណើរដែលមិនចាំបាច់ ។
លោក ម៉ូឌី បានផ្សារភ្ជាប់ការអំពាវនាវនេះទៅនឹងស្មារតីស្នេហាជាតិខាងសេដ្ឋកិច្ច ដោយសង្កត់ធ្ងន់ថា ការស្នេហាជាតិមិនមែនមានតែការលះបង់ជីវិតនៅលើសមរភូមិនោះទេ តែគឺការបំពេញកាតព្វកិច្ចជួយការពារសេដ្ឋកិច្ចជាតិនៅក្នុងជីវភាពប្រចាំថ្ងៃ ៕ ប្រភព ៖ NDTV, Aljazeera និងប្រភពផ្សេងទៀត
ចែករំលែកព័តមាននេះ