ចំណេះដឹង៖ យោងតាមការផ្សាយពីប្រភពបរទេស យប់ជ្រៅគឺជាពេលវេលាដែលមនុស្សងាយនឹងចុះខ្សោយផ្លូវចិត្តបំផុត។ សម្រាប់អ្នកដែលមានភាពវៃឆ្លាតផ្លូវអារម្មណ៍ (EQ) ទាប ពួកគេតែងតែបណ្ដោយឱ្យខ្លួនឯងធ្លាក់ក្នុងអន្ទាក់នៃទម្លាប់អវិជ្ជមាន ដែល “បឺតជញ្ជក់” ថាមពលចិត្តដោយមិនដឹងខ្លួន។ ការយល់ដឹងពីទម្លាប់ទាំងនេះ នឹងជួយឱ្យអ្នកអាចការពារសុខភាពផ្លូវចិត្ត និងបង្កើនភាពរឹងមាំនៃអារម្មណ៍បានកាន់តែប្រសើរ៖

ការបណ្ដោយខ្លួនឱ្យជក់នឹងការអូសមើលបណ្ដាញសង្គម រួចយកជីវិតខ្លួនឯងទៅប្រៀបធៀបនឹងភាពសក្ដិសមរបស់គេ គឺជាកត្តាចម្បងដែលធ្វើឱ្យអ្នកអស់សង្ឃឹមនឹងជីវិត។ ផ្ទុយទៅវិញ អ្នកដែលមាន EQ ខ្ពស់ តែងតែដឹងខ្លួនថារូបភាពលើអ៊ីនធឺណិតគ្រាន់តែជាផ្នែកមួយដែលគេសម្រិតសម្រាំងបង្ហាញប៉ុណ្ណោះ ហើយពួកគេជ្រើសរើសការដាក់ទូរសព្ទចុះដើម្បីការពារដំណេក និងអារម្មណ៍ខ្លួនឯង។ ការចំណាយពេលយប់ជ្រៅដើម្បីរំលឹកតែរឿងចាស់ៗដែលឈឺចាប់ អានសារចាស់ ឬមើលរូបថតអតីតកាល គឺជាការបើកមុខរបួសឱ្យកាន់តែធំ។ មនុស្សដែលមាន EQ ខ្ពស់ ជ្រើសរើសការរៀនសូត្រពីអតីតកាលក្នុងនាមជាមេរៀន មិនមែនទុកវាជាច្រវាក់មកចងជើងខ្លួនឯងនោះទេ។

ទម្លាប់ម្យ៉ាងទៀតគឺការផ្ញើសាររកអ្នកណាម្នាក់គ្រាន់តែដើម្បីបំបាត់ភាពឯកោ ឬព្យាយាមរកជម្លោះដើម្បីទាក់ទាញការចាប់អារម្មណ៍។ បុគ្គលដែលមានភាពរឹងមាំផ្លូវចិត្ត តែងប្រើពេលវេលានេះដើម្បីបំពេញក្ដីសុខឱ្យខ្លួនឯង តាមរយៈការអានសៀវភៅ ឬស្ដាប់តន្ត្រីស្រាលៗ ព្រោះគេយល់ថាគ្មានអ្នកណាអាចមកបំពេញចន្លោះប្រហោងក្នុងចិត្តយើងបាន ក្រៅពីខ្លួនយើងឡើយ។ ចំណែកការគិតបារម្ភហួសហេតុពីអនាគត និងការបន្ទោសខ្លួនឯងដដែលៗចំពោះកំហុសឆ្គង ក៏ជាថ្នាំពុលដែលបំផ្លាញសេចក្ដីសុខ។ អ្នកមាន EQ ខ្ពស់ តែងចេះអត់ឱនឱ្យខ្លួនឯង និងរំលឹកពីចំណុចល្អៗដែលគេបានធ្វើក្នុងថ្ងៃនេះ ដើម្បីត្រៀមខ្លួនទទួលយកថ្ងៃស្អែកដោយកម្លាំងចិត្តមាំមួន៕