បុគ្គលិកអង្គការម្នាក់ដែលបើករថយន្តបុ.កម៉ូតូ២នាក់ម្តាយនិងកូនតូច បណ្តាលឱ្យស្លា.ប់ភ្លាមៗនៅនឹងកន្លែងនោះ ត្រូវបានចៅក្រមស៊ើបសួរនៃសាលាដំបូងខេត្តសៀមរាប សម្រេចឱ្យនាំខ្លួនទៅយកឃុំខ្លួនជាបណ្តោះអាសន្ន នៅពន្ធនាគារ
ខេត្តសៀមរាប ៖ បុគ្គលិកអង្គការម្នាក់ដែលបើករថយន្តបុ.កម៉ូតូ២នាក់ម្តាយនិងកូនតូច បណ្តាលឱ្យស្លា.ប់ភ្លាមៗនៅនឹងកន្លែងនោះ ត្រូវបានលោក យូ ធារិទ្ធ ចៅក្រមស៊ើបសួរនៃសាលាដំបូងខេត្តសៀមរាប សម្រេចឱ្យកម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប នាំខ្លួនទៅយកឃុំខ្លួនជាបណ្តោះអាសន្ន នៅពន្ធនាគារខេត្តសៀមរាបហើយ។
បុគ្គលិកអង្គការខាងលើរូបនេះ មានឈ្មោះ អ៊ូ សុផាន់ ណារ៉ុង ភេទប្រុស អាយុ៥៦ឆ្នាំ មុខរបរអង្គការ រស់នៅភូមិចុងកៅស៊ូ ស្ថិតក្នុងសង្កាត់ស្លក្រាម ក្រុង-ខេត្តសៀមរាប។
សូមរំលឹកផងដែរថា ហេតុការណ៍គ្រោះថ្នាក់ដ៏រន្ធ.ត់នេះ បានកើតឡើងកាលកពីថ្ងៃទី១២ ខែកញ្ញា ឆ្នាំ២០២៣ វេលាម៉ោង១៦និង១០នាទីរសៀល នៅចំណុចខាងកើតមូលដ្ឋានកងរាជអាវុធហត្ថក្រុងសៀមរាប ចម្ងាយ៣០ម៉ែត្រ ស្ថិតក្នុងភូមិអញ្ជាញ សង្កាត់នគរធំ ក្រុង-ខេត្តសៀមរាប។
បើតាមមន្ត្រីកម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានប្រាប់តាមតេឡេក្រាម នៅព្រឹកថ្ងៃទី១៥ ខែកញ្ញា ឆ្នាំ២០២៣នេះថា ករណីគ្រោះថ្នាក់ចរាចរណ៍រវាងម៉ូតូនិងរថយន្ត ដែលមានរថយន្តមួយគ្រឿងម៉ាក Lexus470 ពណ៌ខ្មៅ ពាក់ផ្លាកលេខ ភ្នំពេញ2H-3866 បើកបរដោយឈ្មោះ អ៊ូ សុផាន់ ណារ៉ុង ភេទប្រុស អាយុ៥៦ឆ្នាំ មុខរបរអង្គការ រស់នៅភូមិចុងកៅស៊ូ សង្កាត់ស្លក្រាម ក្រុង-ខេត្តសៀមរាប បើកបរទិសដៅពីកើតទៅលិច ក្នុងស្ថានភាពស្រវឹងជោកជាំ ហើយក៏បុ.កម៉ូតូមួយគ្រឿង ម៉ាក Honda Dream ពណ៌ខ្មៅ ផ្លាកលេខ សៀមរាប1AG.7894 អ្នកបើកបរម៉ូតូឈ្មោះ ចិត្រ សោភា ភេទស្រី អាយុ១៧ឆ្នាំ រស់នៅភូមិធ្លកអណ្តូង សង្កាត់ស្លក្រាម ក្រុង-ខេត្តសៀមរាប ទិសដៅពីលិចទៅកើត ដោយមានដឹកកូនស្រីម្នាក់ឈ្មោះ រ៉ា សុជាតា ភេទស្រី អាយុទើបតែ១ឆ្នាំ២ខែប៉ុណ្ណោះ បណ្ដាលឱ្យអ្នកបើកបរម៉ូតូស្លា.ប់ទាំងម្តាយ និងកូនភ្លាមៗ។
មន្ត្រីកម្លាំងការិយាល័យនគរបាលចរាចរណ៍ផ្លូវគោកបន្តថា ក្រោយកើតហេតុ កម្លាំងការិយាល័យនគរបាលជំនាញ បានចុះធ្វើការវាស់វែង រួចប្រមូលយកវត្ថុតាងម៉ូតូ និងតាមស្រាវជ្រាវរករថយន្តឃើញ ហើយក៏អូសយកទៅកាន់ស្នងការដ្ឋាននគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាបតែម្ដង។
មន្ត្រីបញ្ជាក់ទៀតថា ស.ពជនរងគ្រោះទាំង២នាក់ម្តាយនិងកូន ត្រូវបានកម្លាំងការិយាល័យនគរបាលជំនាញ ប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋាន ស្ថិតក្នុងភូមិធ្លកអណ្តូង សង្កាត់ស្លក្រាម ក្រុង-ខេត្តសៀមរាប ហើយយកទៅបូជានៅវត្តប្រាសាទត្រាំនាគ។
បច្ចុប្បន្ន ជនសង្ស័យដែលជាបុគ្គលិកអង្គការរូបនោះ ត្រូវបានលោក យូ ធារិទ្ឋ ចៅក្រមស៊ើបសួរនៃសាលាដំបូងខេត្តសៀមរាប សម្រេចឱ្យកម្លាំងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត នាំយកទៅឃុំខ្លួនបណ្តោះអាសន្ននៅពន្ធនាគារខេត្តសៀមរាបហើយ។
គួររំលឹកថា ៖ បុគ្គលិកអង្គការម្នាក់បើកឡានពន្លះម៉ូតូ២នាក់ម្តាយ និងកូនតូច យ៉ាងរន្ធ.ត់ ៕
ចែករំលែកព័តមាននេះ