ជុំវិញរឿងរ៉ាវលោកអធិការស្រុកស្រែអំបិល ចុះចាប់បង្ក្រាបទីតាំងល្បែ.ងមាន់ជល់តាមអនឡាញ បន្ទាប់ពីទទួលលុយសំណូកថ្នូរនឹងបិទភ្នែកបិទច្រមុះមិនបង្ក្រាបបានរយៈ៣ថ្ងៃប៉ុណ្ណោះ ថែមទាំងរឹបអូសយកលុយថ្លៃស៊ីសងជាង១លានរៀលទៀតនោះ លោកស្នងការខេត្តថា
ខេត្តកោះកុង ៖ ជុំវិញរឿងរ៉ាវលោកអធិការស្រុកស្រែអំបិល ចុះចាប់បង្ក្រាបទីតាំងល្បែ.ងមាន់ជល់តាមអនឡាញ បន្ទាប់ពីទទួលលុយសំណូកថ្នូរនឹងបិទភ្នែកបិទច្រមុះមិនបង្ក្រាបបានរយៈ៣ថ្ងៃប៉ុណ្ណោះ ថែមទាំងរឹបអូសយកលុយថ្លៃស៊ីសងជាង១លានរៀលទៀតនោះ លោកស្នងការខេត្តថា ស្រាប់តែលោកអធិការនោះ ផ្ញើរបាយការណ៍ ក្រោយបែករឿងថា លុយជាង១លានរៀលនោះ ខាងក្រុមហ៊ុនល្បែ.ងឲ្យគាត់យកមកធ្វើរោងបាយទេ មហាជនហោថា «អធិការមុខលុយ»។
ឯលោកឧត្តមសេនីយ៍ស្នងការ ថា កំពុងតែពិភាក្សាជាមួយជំនាញពិនិត្យមើលខ្លឹមសារក្នុងរបាយការណ៍របស់លោកអធិការ ដើម្បីមានវិធានការនៅពេលក្រោយ ។
លោកវរសេនីយ៍ទោ ដូង វណ្ណា អធិការនគរបាលស្រុកស្រែអំបិល ដែលចុះចាប់ទីតាំងល្បែ.ងមាន់ជល់អនឡាញ និងឡូតូ ស្ថិតនៅក្នុងភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង ហើយបានដកហូតយកវត្ថុតាងជាច្រើននោះ រួមមាន ៖ ទូរទស្សន៍ ម៉ាស៊ីនកុំព្យូទ័រ និងលុយសម្រាប់ស៊ីសងចំនួន១លាន៤០ម៉ឺនរៀលទៀត។
តែមួយសន្ទុះក្រោយមក លោកអធិការក៏បានប្រគល់វត្ថុតាងទាំងនោះឲ្យម្ចាស់វិញភ្លាមៗផងដែរ ប៉ុនែ្តលុយដែលត្រូវដកហូតទុកដែរនោះ ក៏មិនបានរាយការណ៍ទៅថ្នាក់លើ ស្នងការរងទទួលផែន និងស្នងការខេត្តនោះទេ ។
ពាក់ព័ន្ធបញ្ហាខាងលើនេះ លោកឧត្តមសេនីយ៍ត្រី ឃឹម សាណេ ស្នងការរងទទួលផែនព្រហ្មទណ្ឌ នៃស្នងការដ្ឋាននរគបាលខេត្តកោះកុង បានបញ្ជាក់យ៉ាងខ្លីថា លោកអធិការស្រុកស្រែអំបិល មិនរាយការណ៍មកលោកតាមគ្រុបការងារនោះទេ។
លោកឧត្តមសេនីយ៍ទោ គង់ មនោ ស្នងការនគរបាលខេត្តកោះកុង បានបញ្ជាក់តាមទូរស័ព្ទដល់ក្រុមអ្នកយកព័ត៌មានយើងនៅថ្ងៃទី១១ ខែកញ្ញានេះថា លោកអធិការស្រុកស្រែអំបិល បានរាយការណ៍មកលោកជាប្រយោលសុំអនុញ្ញាតធ្វើការងាររដ្ឋបាល។ ចំណែកឯពាក់ព័ន្ធការចុះចាប់ទីតាំងមាន់ជល់អនឡាញ និងឡូតូ ព្រមទាំងដកហូតយកសម្ភារៈជាវត្ថុតាង និងលុយសម្រាប់ស៊ីសងជាង១លានរៀល ក្រោយមកលោកអធិការបានប្រគល់វត្ថុតាងឲ្យម្ចាស់វិញ ហើយលុយ លោកអធិការដកទុកនោះ លោកមិនបានដឹងនោះទេ ប៉ុន្ដែក្រោយមកទើបលោកទទួលបានរបាយការណ៍ពីលោកអធិការស្រុកស្រែអំបិលថា រឿងលុយនោះ គឺខាងក្រុមហ៊ុនឲ្យទៅលោកអធិការសម្រាប់ធ្វើរោងបាយ។
បើតាមប្រភពពីអ្នកច្បាប់ម្នាក់ បានលើកឡើងថា នៅពេលកងកម្លាំងសមត្ថកិច្ចនរគបាល ឬកងកម្លាំងកងរាជអាវុធហត្ថ ចុះបង្ក្រាបបទល្មើសជាក់ស្ដែង ហើយធ្វើការហូតយកសម្ភារៈជាវត្ថុតាង អ្នកដឹកនាំចាំបាច់ត្រូវរាយការណ៍ជូនថ្នាក់លើ ដើម្បីថ្នាក់លើសាមីអង្គភាព ស្នើសុំគោលការណ៍បន្ដពីឯកឧត្តមព្រះរាជអាជ្ញា។ ហើយបើថ្នាក់អធិការ នៅពេលចុះបង្ក្រាបបទល្មើស និងដកហូតយកសម្ភារៈ ដែលជាវត្ថុតាងត្រូវរាយការណ៍ជាបន្ទាន់ជូនទៅសាមីអង្គភាព ស្នងការនរគបាលខេត្ត/ក្រុង ដើម្បីលោកស្នងការរាយការណ៍បន្ដជូនឯកឧត្តមព្រះរាជអាជ្ញា ដើម្បីស្នើសុំសុំគោលការណ៍ ។
អ្នកច្បាប់ដដែលបន្តទៀតថា ថ្នាក់អធិការ ពេលចុះបង្ក្រាបបទល្មើស ហើយដកហូតយកវត្ថុតាងណាមួយ បែរជាប្រគល់វត្ថុតាងមួយនោះទៅឲ្យម្ចាស់វិញ លោកអធិការត្រូវរាយការណ៍ជាបន្ទាន់ទៅកាន់លោកស្នងការខេត្ត/ក្រុង ដើម្បីលោកស្នងការមានអំណះអំណាងរាយការណ៍ជូនបន្តទៅឯកឧត្តមព្រះរាជអាជ្ញាវិញដែរ។ ហើយចំពោះការដោះលែងវត្ថុតាង ឬមិនដោះលែងវត្ថុតាង គឺឆន្ទានុសិទ្ធិរបស់ឯកឧត្តមព្រះរាជអាជ្ញា។
យោងតាមមាត្រា១១៣ នៃក្រមនីតិវិធីព្រហ្មទណ្ឌ នៅពេលចាប់បានភស្តុតាងពីជនជាប់សង្ស័យពេលបង្ក្រាបបទល្មើសនោះ វត្ថុតាងនោះត្រូវបានសមត្ថកិច្ចនគរបាលយុត្តិធម៌ ជាអ្នកឃាត់ និងរក្សាទុក រួចរាយការណ៍ និងបញ្ជូនភស្តុតាងដែលពាក់ព័ន្ធទាំងនោះ មកកាន់តុលាការ និងសមត្ថកិច្ចដែលពាក់ព័ន្ធ សម្រេចរក្សាទុកវត្ថុតាងទាំងនោះ ទៅតាមផ្លូវច្បាប់ ដើម្បីស៊ើបអង្កេតបន្ត។
ចំពោះករណីអធិការស្រុកស្រែអំបិល កាលពីថ្ងៃទី០២ ខែកញ្ញា ឆ្នាំ២០២៣ លោកវរសេនីយ៍ទោ ដូង វណ្ណា អធិការនគរបាលស្រុកស្រែអំបិល បានបញ្ជាឲ្យកូនចៅចុះចាប់ទីតាំងមាន់ជល់អនឡាញ និងឡូតូមួយកន្លែង ស្ថិតនៅក្នុងភូមិត្រពាំង ឃុំស្រែអំបិល ស្រុកស្រែអំបិល ខេត្តកោះកុង បានដកហូតយកវត្ថុតាងដូចជា ៖ ទូរទស្សន៍ ម៉ាស៊ីនកុំព្យូទ័រ និងលុយសម្រាប់ស៊ីសងជាង១លានរៀល។ លុះដល់ថ្ងៃទី០៣ ខែកញ្ញា ឆ្នាំ២០២៣ ក៏បានប្រគល់សម្ភារៈសម្រាប់បម្រើឲ្យល្បែ.ងមាន់ជល់ទូរទស្សន៍អនឡាញនេះទៅឲ្យម្ចាស់វិញ ចំណែកឯលុយសម្រាប់ស៊ីសងចំនួនជាង១លានរៀលនោះ ត្រូវបានលោកអធិការដកហូតរក្សាទុក ដោយមិនបានបញ្ជូនវត្ថុតាង និងរាយការណ៍ជូនថ្នាក់លើបានដឹងនោះទេ តើលទ្ធផលផ្លូវច្បាប់ និងទទួលបានបែបណាដែរ……?
គួររំលឹកថា ៖ ម្ចាស់ទីតាំងល្បែ.ងមួយកន្លែងចោទប្រកាន់អធិការថា ទទួលលុយហើយបង្ក្រាបទៀត តែលោកអធិការបដិសេធ (វីដេអូ)៕
ចែករំលែកព័តមាននេះ